22°C , Mostly cloudy with thunderstorms | Kigali-Rwanda

Kwiteza imbere binyuze mu gukunda umurimo ni ishema-Rwanyindo

Yanditswe na IYAREMYE YVES

Ku ya 02-05-2018 saa 05:36:06

Minisitiri w’Abakozi ba Leta n’Umurimo, Rwanyindo Kayirangwa Fanfan, yabwiye Abanyarwanda ko gukora bakiteza imbere, bagateza imbere aho batuye n’igihugu muri rusange, ari ishema umuntu wese akwiye guharanira.

Ni ubutumwa ku munsi w’ejo hashize ku itariki ya 1 Gicurasi 2018, mu muhango wo kwizihiza umunsi mpuzamahanga w’umurimo, umunsi ku rwego rw’igihugu wizihirijwe mu karere ka Rubavu.

Minisitiri w’Abakozi ba Leta n’Umurimo Rwanyindo Kayirangwa Fanfan (Foto Iyaremye Y)

Minisitiri Rwanyindo yasabye Abanyarwanda gukunda umurimo kandi bagaharanira kubyaza umusaruro amahirwe bafite yo kugira ubuyobozi buborohereza gukora bakiteza imbere.

Yagize ati “Iterambere igihugu kimaze kugeraho tuzakomeza kurigeraho tunarusheho, kuko dufite ubuyobozi bwiza bufasha bukanorohereza buri wese, hagamijwe iterambere rirambye.

Hari amahirwe menshi yagiye ashyirwaho hagamijwe gufasha Abanyarwanda kwiteza imbere, turashimira by’umwihariko urubyiruko rukomeje kwihangira imirimo rukanafasha igihugu mu rugamba rwo kurwanya ubushomeri, bikazamura buri wese, kandi gukora ukiteza imbere ni ishema rikwiye guharanirwa na buri wese”.

Minisitiri Rwanyindo kandi yanashishikarije Abanyarwanda gukunda ibikorerwa mu Rwanda, bagaharanira kubikoresha mu buzima bwabo bwa buri munsi, ku buryo ingano y’ibyo bakenera biva mu mahanga igabanuka.

Yakomeje agira ati “Ibikorerwa mu Rwanda mu dukiriro n’ahandi ni zimwe mu ngero nziza zigaragaza ko kwihangira ibyacu bishoboka, bisaba guhindura imyumvire ya buri wese kuko ni ingenzi, twamara guhindura imyumvire tugakunda ibikorerwa iwacu, tukabyitabira, bizatuma n’amahanga abona ibanga ryabyo”.

Yakomeje asaba abantu bose kudasuzugura umurimo uwo ari wo wose, kuko umurimo ukozwe neza mu buryo bunoze uteza imbere uwukora.

Habiyaremye Jean Marie Vianney, rwiyemezamirimo utunganya amahembe akayakoramo imitako itandukanye, ubwo yahabwaga ijambo yagize ati “Turashima Leta ikomeje kudushishikariza kuba twakwihangira imirimo, turashima uburyo bwose bwagiye bushyirwaho butworohereza bigatuma duhanga umurimo unoze unaduteza imbere n’igihugu muri rusange, ni ishema ryacu”.

Mu kwizihiza umunsi mpuzamahanga w’umurimo, hahembwe uturere twahize utundi mu kunoza umurimo, abanyamakuru bahize abandi gukora inkuru zikangurira abantu kwihangira umurimo, ibigo byafashije abarangiza amashuri kwimenyereza umwuga, na ba rwiyemezamirimo bato bitwaye neza.

TANGA IGITEKEREZO

Leave a Reply

Be the First to Comment!

avatar