17°C , Partly cloudy | Kigali-Rwanda

Kwihangira umurimo bisaba ibitekerezo n’ubushake

Yanditswe na Mukagahizi Rose

Ku ya 26-01-2020 saa 12:14:22
Kwihangira imirimo bigira uruhare mu kwiteza imbere ndetse no guteza imbere Igihugu

Muri gahunda ya Guverinoma y’imyaka irindwi, NST1, igihugu kihaye intego yo guhanga imirimo miriyoni imwe n’igice (1 500 000) kuva mu 2017 kugera 2024, bamwe baravuga ko kwihangira imirimo bisaba ibitekerezo n’ubushake.

Nyuma ya Jenoside yakorewe Abatutsi mu 1994, Leta y’u Rwanda yafashe iya mbere mu gukangurira Abanyarwanda gutinyuka kwihangira umurimo, na bo bakagira uruhare mu kwiteza imbere no guteza imbere Igihugu, kuko Igihugu cyari gitangiye kwiyubaka no guhangana n’ingaruka za Jenoside.

Abagore n’urubyiruko bagiye bafashwa gutinyuka bakihangira imirimo ariko byahereye ku gufasha abagore guhindura imyumvire bagatinyuka na bo bakumva ko bashoboye.

Abagore bamwe bakoresheje amahirwe Igihugu cyabahaye na bo batangira kwihangira umurimo.

Butoya Marie Claire ni umwe mu bagore wihangiye umurimo, acururiza mu isoko rya Nyarugenge (Kigali City Market) yavuze ko yabanje gukorera abandi ariko nyuma akazi kaza guhagarara, asanga adakwiye kwicara ngo abeho ntacyo akora, yahise afata ikemezo cyo kwihangira imirimo.

Mu kiganiro n’Imvaho Nshya yagize ati “Kwihangira imirimo nta bwo biba byoroshye ahubwo bisaba gutinyuka, nange naratinyutse mpera ku bushobozi buke nari mfite ntangira kwikorera, byaramfashije cyane kuko ubu ngeze ku rwego rushimishije”.

Yakomeje avuga ko hari intera ikomeye amaze kugeraho akesha akazi ke ko gucuruza imyenda n’ibindi bintu ku buryo yiteje imbere ku rwego rushimishije yiyubakira inzu nziza zirenze imwe ndetse abasha kwigurira imodoka imufasha mu kazi ke ka buri munsi. Ubu ageze ku rwego rwo kurenga imipaka akajya kurangura aho ashaka ku Isi.

Butoya asanga hari itandukaniro rinini riri hagati yo kwikorera no gukorera abandi, kuko inyungu yose iba iye atagenerwa.

Yakomeje atanga inama zirebana no gutinyuka, urubyiruko cyangwa abagore bakikorera nabo bakihangira imirimo, kuko bitagombera amafaranga menshi ahubwo ik’ingenzi ni ukumenya igikenewe.

Mu bindi, avuga ko iyo umugore yikoreye aba afite uruhare runini mu guteza imbere umuryango n’Igihugu kuko iyo atanga umusoro aba afitiye Igihugu akamaro kanini Igihugu kibaho kidategereje inkunga z’abandi

Umuyobozi Mukuru Ushinzwe Umurimo muri Minisiteri y’Abakozi ba Leta n’Umurimo (MIFOTRA) Mwambari Faustin, asanga ik’ibanze mu kwihangira umurimo atari amafaranga, ahubwo ari ukugira ibitekerezo n’ubushake.

Ashimangira ko abantu muri rusange bakwiye gutinyuka bakihangira umurimo cyane cyane bagahera ku gitekerezo nyuma bakagishyira mu bikorwa, bakabyaza umusaruro amahirwe ahari n’ibindi.

Uyu muyobozi yibutsa ko Leta atari yo irema imirimo ahubwo ishyiraho uburyo bwiza bwo gutuma abikorera batera imbere imirimo ikiyongera.

Umwanditsi:

Mukagahizi Rose

Tanga Igitekerezo

Email yanyu ntigaragazwa ku rubuga. Amazina na Email ni ngombwa.