Kigali-Rwanda

Mostly cloudy with showers
19°C
 

Kwibuka27: Abakoresha imbuga nkoranyambaga basabwe kwirinda ingengabitekerezo ya Jenoside

Yanditswe na TUMUKUNDE GEORGINE

Ku ya 05-02-2021 saa 13:02:42
Dr Bizimana Jean Damascene Umunyamabanga Nshingwabikorwa wa CNLG

Mu gihe Abanyarwanda n’inshuti z’u Rwanda bitegura Kwibuka ku nshuro ya 27 Jenoside yakorewe Abatutsi mu 1994, Komisiyo y’Igihugu yo kurwanya Jenoside (CNLG) irakangurira abatanga ibiganiro n’inyandiko hifashishijwe ikoranabuhanga, bikanyuzwa kuri Youtube no ku mbuga nkoranyambaga kubahiriza ibiteganywa n’Itegeko ryerekeranye n’icyaha cy’ingengabitekerezo ya Jenoside n’ibyaha bifitanye isano na yo ndetse n’andi mategeko.

Mu itangazo yasohoye, CNLG yagaragaje ko yakoze isesengura ku biganiro bitandukanye binyuzwa kuri Youtube no ku zindi mbuga nkoranyambaga, igasanga hagenda hakoreshwa imvugo zirimo ingengabitekerezo ya Jenoside, zirangwa no guhakana no gupfobya Jenoside yakorewe Abatutsi, kuyitesha agaciro, izikurura amacakubiri mu Banyarwanda, kwangisha abaturage gahunda z’Ubuyobozi bw’Igihugu, kubakangurira kwigomeka no gutera abaturage intugunda hagamijwe kubyutsa imidugararo.

Ivuga ko buri mwaka iyo igihe cyo kwibuka Jenoside yakorewe Abatutsi cyegereje, hagaragara abantu bashyira imbaraga mu bikorwa byo kuyipfobya no kuyihakana no gutesha agaciro ibyiza u Rwanda rumaze kugeza ku Banyarwanda kuva FPR-Inkotanyi ihagaritse Jenoside muri Nyakanga 1994. No muri ibi bihe ngo ibyo bikorwa byatangiye kwigaragaza cyane cyane hifashishijwe imbuga nkoranyambaga.

CNLG iributsa ko iyi myitwarire ibujijwe kandi ihanwa n’amategeko u Rwanda rugenderaho.

Ishimangira ko buri Munyarwanda afite uburenganzira busesuye bwo gutanga ibitekerezo mu bwisanzure, nk’uko abyemererwa n’Itegeko Nshinga n’andi mategeko ariko atagomba gutandukira ngo akoreshe imvugo zigize ibyaha; zibujijwe n’ amategeko Igihugu kigenderaho.

Mu rwego rwo kwitegura neza ibikorwa byo Kwibuka ku nshuro ya 27 Jenoside yakorewe Abatutsi, CNLG irakangurira abakoresha imbuga nkoranyambaga n’ibindi biganiro kuvana isomo mu mateka akakaye ya Jenoside yakorewe Abatutsi, hirindwa imvugo zigamije gukwirakwiza ingengabitekerezo ya Jenoside yakorewe Abatutsi no kuyobya rubanda muri rusange.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.