21°C , Partly cloudy | Kigali-Rwanda

Kwibuka26: Baravuga imyato ‘SEVOTA’ yabafashije kwiyubaka no kubaka u Rwanda

Yanditswe na NTAWITONDA JEAN CLAUDE

Ku ya 12-04-2020 saa 10:28:28
Christine Mukayigire ufashe agaseke, arashima ibyo yagejejweho na SEVOTA

Abanyamuryango b’Umuryango SEVOTA (Solidarité pour l’Épanouissement des Veuves et des Orphelins visant le Travail et l’Auto-promotion) bishimira ko biyubatse, bagakira ibikomere batewe n’ibyababayeho muri Jenoside yakorewe Abatutsi.

Umuryango SEVOTA washinzwe ku ya 28 Ukuboza 1994, kuya 28 Ukuboza 2019 wagize imyaka 25,  uwizihiza kuya 8 Mutarama 2020.Uyu muryango wagize uruhare rukomeye cyane mu kubungabunga ubwisanzure bw’abapfakazi n’imfubyi binyuze mu murimo no kwiteza imbere.

Kugeza ubu SEVOTA igizwe n’amashyirahamwe arenga 114 agizwe n’abanyamuryango 1,897 biganjemo imfubyi n’abapfakazi ba Jenoside yakorewe Abatutsi; n’amatsinda (club) 38 arimo abana n’urubyiruko 2,896. Abafashijwe n’uyu muryango bahamya ko  watumye bava mu bwigunge binyuze mu mahuriro y’isanamitima no komorana ibikomere, amahugurwa anyuranye azamura imibereho n’ubukungu, ndetse n’ibikorwa nyongeramusaruro by’ubuhinzi, ubworozi ndetse n’ububoshyi bikorerwa mu matsinda y’ubufashanye n’ubufatanye.

Abanyamuryango ba SEVOTA, barahura bakishimira ibyiza babonye nyuma yo kuva mu bwigunge

Mukayigire Christine, utuye mu Mudugudu wa Nyabitare, Akagari ka Gihira, Umurenge wa  Gacurabwenge mu Karere ka Kamonyi, yagize ati: “SEVOTA yaraduhumurije cyane. Twiyubatsemo ikintu cya Ndi Umunyarwanda, twese dutahiriza Umugozi umwe, Ahubwo natwe dukomeza  gufasha abandi bafite ibibazo by’ihungabana kubera amasomo n’inyigisho twahawe.”

Aline (amazina yahinduwe) ni umwe mu rubyiruko rw’abagenerwabikorwa ba SEVOTA rwafashijwe gukira ihungabana ryo kumenya amakuru ku ihohoterwa ryakorewe umubyeyi we muri Jenoside yakorewe Abatutsi.

Yagize ati: “Mbere na mbere ndashimira Leta y’u Rwanda itarobanura, ihereza umuntu wese uburenganzira akwiriye, ikindi ndashimira SEVOTA ku bufasha bwinshi yampaye harimo ubwo kumfasha gukira ibikomere no kumperekeza mu rugendo rwo kwiyubaka indihira amashuri yisumbuye.”

Umuhuzabikorwa w’Umuryango SEVOTA wanawutangije Madamu Mukasarasi Godelieve, yabwiye Imvaho Nshya ko mu myaka 25 SEVOTA imaze yakuye benshi mu bwigunge, bituma biyubaka ntibongera guheranwa n’agahinda ukundi.

Uyu muryango watangiriye imirimo yawo ahitwa i Taba mu Karere ka Kamonyi itangijwe n’ abapfakazi 26 na Godelieve nyine wa 27 bagezweho n’ingaruka za Jenoside yakorewe Abatutsi.

Nyuma y’imyaka itatu watangiye kwagura ibikorwa ahahoze ari Komini Taba, Runda, Kayenzi na Komini Musambira zaje kubyara Akarere ka Kamonyi, uza no kwaguka ugeza ibikorwa byawo mu turere dutandukanye tw’Igihugu.

Madamu Mukasarasi yagize ati: “SEVOTA ifasha abanyamuryango igendeye ku ntego eshatu: Amahoro, Urukundo n’Umusaruro. Uko imyaka yagiye ikurikirana abanyamuryango bayo biteje imbere mu buryo bugaragara. Abenshi muri bo bari barahuye n’ihungabana batewe n’ibyo bakorewe mu gihe cya Jenoside yakorewe Abatutsi, none bariho mu mahoro. Twatangiriye ku gusana imibereho yabo, tubigisha kongera kwikunda, kubabarira, gahunda ya Ndi Umunyarwanda aho iziye tuyigira iyacu n’izindi zimakaza ubumwe n’ubwiyunge.”

SEVOTA 25, Abanyamuryango, Abafatanyabikorwa, Abaterankunga n’ Abahagarariye inzego za Leta bizihiza isabukuru.

Abanyamuryango bakomeje guhumurizwa mu ngo zabo

Muri ibi bihe bikomeye Abanyarwanda n’inshuti z’u Rwanda bibuka ku nshuro ya 26 Jenoside yakorewe Abatutsi, barasabwa no kwitwararika ku cyorezo cya Koronavirusi (COVID-19) cyayogoje Isi bakurikiza amabwiriza yo ku guma mu ngo zabo.

Madamu Mukasarasi avuga ko yohereje ubutumwa buhumuriza Abanyamuryango bose abasaba no gukurikiza amabwiriza ya Leta yo kwirinda iki cyorezo kimaze gukwira Isi yose.

Yagize ati: “Gahunda yo gusura abagenerwabikorwa mu ngo zabo  byabaye ngombwa ko idashoboka. Nabandikiye ubutumwa bubahumuriza, mbasaba gukomera no gukomeza amahoro mu ngo, bubahiriza gahunda ya Leta . Twiteguye no gutanga ubufasha aho bikomeye, kandi kubahumuriza biracyakomeje.”

Mukasarasi ashimira cyane Ingabo z’u Rwanda zahoze ari iza FPR Inkotanyi zabarokoye, na Nyakubahwa Perezida wa Repubulika Paul Kagame Umubyeyi w’Igihugu nk’Umutoza w’Ikirenga mu bikorwa byose byiza byubaka abantu n’ibintu, kandi ukomeje kugoboka abababaye kurusha abandi muri ibi bihe byo gukumira no kwirinda Koronavirusi.

Umuhuzabikorwa w’Umuryango SEVOTA wanawutangije Madamu Mukasarasi Godelieve

Umwanditsi:

NTAWITONDA JEAN CLAUDE

2 Comments on “Kwibuka26: Baravuga imyato ‘SEVOTA’ yabafashije kwiyubaka no kubaka u Rwanda”

  1. Umuryango Sevota ni umuryango mwiza
    Uturere ukoreramo usanga abanyamuryango bose ari abaturage beza ndetse bafite ejo hazaza heza igishimishije kurushaho n’ibitaramo by’imbyino nyarwanda ziganjemo umuco , kandi usanga ibyo bitaramo birimo abakuru n’abato bivuze ko uyu muryango utanga icyerekezo cyiza ku Urwanda , Nsoje igitekerezo cyange Nshimira
    Umubyeyi yashinze Sevota , “Godelieve ” nge nakwise impano y’Urwanda , kuko umutima mwiza n’ubumuntu ugira , Nyagasani azakwitura .

    Ngaho komeza urerere Urwanda turagukunda !!!

  2. 1. Umuryango SEVOTA umubyeyi wa benshi turawushima cyane Kandi tunasaba ngo Imana ikomeze iwushyigikire na Mama mukuru wacu Imana imukomereze amaboko kuko akora byinshi byo gufasha umuryango nyarwanda.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.