19°C , Mostly cloudy | Kigali-Rwanda
Ambasaderi Mugambage Frank atanga ubutumwa ku bari bitabiriye kwibuka ku nshuro ya 25 Jenoside yakorewe Abatutsi

#Kwibuka25: U Rwanda rumaze gutera intambwe rwiyubaka – Amb. Mugambage

Yanditswe na Twagira Wilson

Ku ya 11-04-2019 saa 09:28:28

Ambasaderi w’u Rwanda mu gihugu cya Uganda, Mugambage Frank, yavuze ko u Rwanda rumaze kwiyubaka kandi hari intambwe imaze guterwa mu bumwe n’ubwiyunge.

Yabitangaje ku mugoroba wo kwibuka Jenoside yakorewe Abatutsi mu Rwanda, mu 1994. Ni umuhango wabereye muri kaminuza ya Makerere muri Uganda, uhuza umuryango w’Abanyarwanda baba muri Uganda mu rwego rwa Diaspora hamwe na Ambasaderi w’u Rwanda muri icyo gihugu i Mugambage Frank.

Muri uyu muhango wo kwibuka, Amb. Mugambage yagarutse ku butumwa bugaragaza intambwe u Rwanda rumaze gutera rugana ku kwiyubaka, na gahunda y’ubumwe n’ubwiyunge ikomeje.

Mu butumwa bwe, Ambasaderi Mugambage yasobanuriye abari mu gikorwa cyo kwibuka barimo n’inshuti z’u Rwanda ko abo ari bo bose bashobora gukomeza umugambi wo kugambana bagamije gusubiza u Rwanda mu icuraburindi rwanyuzemo bitazabashobokera.

Amb. Mugambage yagize ati “Mu myaka 25 ishize, u Rwanda rwanyuze mu bibazo byinshi, kandi rubinyuramo neza. Ubu rwakoze ibishoboka ku birebana no kwiyubaka, no guteza imbere gahunda y’ubumwe n’ubwiyunge, no kubaka amahoro arambye mu banyarwanda. U Rwanda rwiyemeje kurwanya abo ari bo bose bashobora kwifuza gusubiza u Rwanda aho rwavuye.’’

Kananura Donald uhagarariye umuryango w’Abanyarwanda baba mu gihugu cya Uganda muri Diaspora, yasabye abagize Diasora baba muri icyo gihugu gushyiraho umusanzu wabo mu gukumira no kwamagana abagifite ingengabitekerezo ya Jenoside aho baba hose haba muri Uganda n’ahandi.

Muri uwo muhango kandi hari n’Umuhinde Mohamud Thobani ukomoka mu Buhinde wagize uruhare mu gushyingura imibiri y’Abatutsi isaga 900 ayivanye mu kiyaga cya Vigitoriya ubu iruhukiye mu rwibutso rwa Golo mu Ntara ya Mpigi muri Uganda yifatanyije n’Abanyarwanda baba muri Uganda mu muhango wo kwibuka wateguwe na Ambasade y’u Rwanda mu gihugu cya Uganda.

Uwo muhango wo kwibuka ku nshuro ya 25 Jenoside yakorewe Abatutsi mu Rwanda waranzwe no gucana urumuri rugaragaza ikizere.

Ambasaderi Mugambage Frank atanga ubutumwa ku bari bitabiriye kwibuka ku nshuro ya 25 Jenoside yakorewe Abatutsi

TANGA IGITEKEREZO

Leave a Reply

Your email address will not be published. Required fields are marked *