19°C , Mostly cloudy | Kigali-Rwanda
Gafaranga Omar, Umuyobozi wa Ibuka mu karere ka Nyarugenge (Foto Mukagahizi R.)

#Kwibuka25: Barifuza ko amateka yihariye ya Camp Kigali atakwibagirana

Yanditswe na Mukagahizi Rose

Ku ya 11-04-2019 saa 09:22:53

Gafaranga Omar, Umuyobozi wa Ibuka mu Karere ka Nyarugenge yasabye abayobozi b’Umujyi wa Kigali n’Akarere ka Nyarugenge by’umwihariko ko hakubakwa inkuta zikandikwaho amazina y’abantu baburiye ubuzima mu kigo cyahoze ari icya gisirikare Camp Kigali, bityo amateka yaho ntazibagirane.

Abarokotse Jenoside yakorewe Abatutsi mu 1994 mu Murenge wa Nyarugenge barimo Gasana Canisius umwe mu barokokeye ku kigo cyahoze ari icya gisirikare cya Camp Kigali bavuga ko uretse ubuntu bw’Imana kuharokokera bitashobokaga, na bo bakifuza ko amateka y’ibyahabereye yakwandikwa.

Aha ni ho Gafaranga ahera agira ati “Ndifuza ko amateka yo muri iki kigo cya Camp Kigali dusigaye tugendamo uko dushaka atakwibagirana, bityo hakaba hakubakwa igikuta kikandikwaho amazina y’abaguye hano. Hakenewe ikimenyetso kigaragarira buri wese ndetse n’abanyamahanga bakajya baza bagasoma ayo mateka. Si aha gusa, hari icyahoze ari segiteri Biryogo bitaga kuri CND naho turifuza ko hashyirwa urukuta hakandikwaho amazina y’abahaguye.”

Umuyobozi w’Umujyi wa Kigali Wungirije Ushinzwe Ubukungu Busabizwa Parfait, yizeje ko ibyo umuyobozi wa Ibuka mu Karere ka Nyarugenge yasabye bizashyirwa mu bikorwa.

Avuga ko hari amateka yihariye yaranze Camp Kigali mu gihe cya Jenoside yakorewe Abatutsi mu 1994 ndetse n’ibikorwa byayibanjirije biyitegura.

Yagize ati “Haracyari ingaruka nyinshi Jenoside yasize haba mu bukungu, mu mibereho myiza, mu buzima ku bayirokotse ku buryo bidusaba imbaraga nyinshi twishyize hamwe kugira ngo duhangane nazo.”

Muri Camp Kigali hiciwe Abatutsi benshi muri Jenoside, ndetse n’abasirikari 10 barindaga Uwiringiyimana Agatha wari Minisitiri w’Intebe wishwe kuwa 7 Mata 1994.

Abahanga basobanura Jenoside ko nk’ igikorwa ndengakamere, gicurwa kugira ngo kirimbure igice kimwe cy’abaturage bishingiye ku bwoko bwabo, idini cyangwa n’indi myemerere by’umwihariko. Jenoside icurwa ikanashyirwa mu bikorwa akenshi ikorwa na Leta yari ikwiye kuba irengera abo baturage bayo.

Gafaranga Omar, Umuyobozi wa Ibuka mu karere ka Nyarugenge (Foto Mukagahizi R.)

TANGA IGITEKEREZO

Leave a Reply

Your email address will not be published. Required fields are marked *