20°C , Mostly cloudy | Kigali-Rwanda

Kwibuka abaguye Nyanza ya Kicukiro, tuzirikana ubugwari bwa Loni – Ahishakiye

Yanditswe na MUKAGAHIZI ROSE

Ku ya 11-04-2018 saa 07:42:18

Umunyamabanga Nyubahirizategeko w’Umuryango Ibuka,  Ahishakiye Naphtal, avuga ko urwibutso rwa Nyanza ya Kicukiro ruherereye mu karere ka Kicukiro mu murenge wa Kagarama, rwubatswe ku bufatanye bwa Leta y’Ubumwe bw’Abanyarwanda n’umuryango Ibuka, rushyinguwemo imibiri y’abazize Jenoside yakorewe Abatutsi barenze ibihumbi 12. Bamwe muri aba bishwe bari babanje guhungira mu maboko y’ingabo za Loni zari zaraje kubungabunga amahoro ariko bikarangira zibasize zisubirira iwabo, ari yo mpamvu kubibuka haba hagawa ubugwari Loni yagize.

Umunyamabanga Nyubahirizategeko wa Ibuka Ahishakiye Naphtal (Foto Mukagahizi R.)

Mu kiganiro kihariye n’Imvaho Nshya, Ahishakiye yavuze ko itariki ya 11 Mata 1994 ari itariki idashobora gusibangana mu mateka y’abatuye aka karere kuko ari yo yabaye inzira y’umusaraba w’abaguye kuri urwo rwibutso.

Yagize ati “Uru rwibutso  rushyinguwemo imibiri y’abazize Jenoside yakorewe Abatutsi barenze ibihumbi 12. Ni imibiri yahashyinguwe mu byiciro bitatu, ikiciro cya mbere ni imibiri igera ku bihumbi 3000 bashyinguwe aha ariko baranahiciwe, abandi ni imibiri y’abantu yagiye yimurwa yari ishyinguye ahantu rusange igera ku bihumbi 6000 yari ishyinguye mu rwibutso rwa Nyandungu bimuriwe aha ngaha mu rwego rwo guhuza inzibutso noneho n’abantu ku giti cyabo uko imibiri igenda iboneka baraza bakayishyingura, ubu irarenga ibihumbi 12.”

Akomeza agira ati “Ngarutse gatoya ku mibiri y’Abatutsi  biciwe aha ngaha ni abantu mbere yuko bicwa bari bahisemo guhungira ku ngabo z’Umuryango w’abibumbye zari ziri muri Eto ya Kicukiro,  zari zihari zaraje kubungabunga amahoro, zaraje kureba iyubahirizwa ry’amasezerano y’amahoro ya Arusha hagati ya Leta yari iyobowe na Habyarimana Yuvenali na RPF-Inkotanyi ariko noneho Abatutsi nk’abantu bahohoterwaga  kuko hariho umugambi wo gutegura Jenoside, ku itariki ya 7 Mata 1994  ubwo Jenoside  nyiri izina yakorerwaga Abatutsi yatangiraga, Abatutsi bakimara kubona ubwicanyi butangiye batangiye kwihutira kujya muri ETO ari benshi ku buryo mu gihe gito bari bamaze kugera ku bihumbi 3000.”

Izo ngabo za Loni zari zaravuye mu gihugu cy’Ububiligi ngo zageraga kuri 90, zakiriye Abatutsi bazihungiyeho ariko ntihagira ubufasha zibagenera mu bireba n’ibiribwa cyangwa ibindi.

Nyuma y’iminsi 4, izo mpunzi zakomeje kubwira izo ngabo ko harimo kuba Jenoside ariko hagati aho ku ruhande rwa Guverinoma yateguraga Jenoside ngo hari abajyaga kubonana n’abo bazungu harimo Col. Rusatira ariko ntihagire umenya icyo bavuganye.

Bigeze tariki 11 Mata 1994, izo ngabo zavuze ko Leta yabo y’Ababiligi yanzuye ko basubira iwabo, bazinga ibyabo harimo n’imbwa zabo burira indege barataha.

Icyo gihe, ngo interahamwe zahise zihagota ku buryo uwinjiyemo atabashaga gusohoka cyangwa uri hanze ngo abashe kwinjira, nyuma zifata umwanzuro wo kujya kubicira i Nyanza ya Kicukiro.

Ahishakiye yagize ati “Uru rwibutso ubundi nk’izindi nzibutso ziri mu gihugu rufasha kwibuka ariko by’umwihariko iyo turi kuri uru rwibutso tuzirikana ubugwari bw’umuryango w’Abibumbye mu gihe cya Jenoside yakorewe Abatutsi kuko imibiri ishyinguye aha ni iy’abantu bari bari mu biganza by’izo ngabo kandi ibimenyetso bihagije birahari ko izo ngabo zari zifite amakuru yuko harimo kwicwa Abatutsi ariko zikabasiga zikigendera.”

Aha ni ho ahera atanga ubutumwa bugira buti “Turahumuriza umuntu wabuze uwe mu gihe cya Jenoside yakorewe Abatutsi, turamusaba gukomera ariko na none iyo tureba amateka nk’aya, nk’Abanyarwanda twese isomo dukwiye gukuramo ni isomo ryo kwigira, abantu bagaharanira kwibeshaho kuko bajya bavuga ngo ak’imuhana kaza imvura ihise ariko si ko byagenze hano i Nyanza ya Kicukiro kuko aba twibuka bishwe ingabo za Loni zari zihari zarahabasize zizi neza ko bagiye kwicwa.”

Asaba Abanyarwanda gukura isomo rikomeye ku byabaye i Nyanza ya Kicukiro, bakumva yuko bafite inshingano yo kwiyubakira igihugu, bazagenda bahererekanya nta kurindira undi uwo ari we wese.

TANGA IGITEKEREZO

Leave a Reply

Be the First to Comment!

avatar