17°C , Partly cloudy | Kigali-Rwanda
Perezida Paul Kagame hagati (uwa gatatu uvuye ibumoso) abanjirijwe n'Umunyamabanga Mukuru wa LONI António Guterres mu muhango wo kwibuka ku nshuro ya 25 Jenoside yakorewe Abatutsi wabereye ku kicaro gikuru cya LONI

#Kwibuka25: Impuruza za Dallaire zajyaga mu matwi atumva – Kagame

Yanditswe na Mugabo Lambert

Ku ya 12-04-2019 saa 18:42:38

Ku kicaro cy’Umuryango w’Abibumbye, mu muhango wo kwibuka ku nshuro ya 25 Jenoside yakorewe Abatutsi, ku munsi mpazamahanga wo gusubiza amaso inyuma amahanga akibuka iyi Jenoside, Perezida Paul Kagame yagaye Loni ko itumviye impuruza za Lt. Gen. Roméo Dallaire, ko zajyaga mu matwi atumva.

Ni igikorwa cyabaye kuri uyu wa Gatanu tariki 12 Mata 2019, i New York muri Leta Zunze Ubumwe z’Amerika, ku kicaro gikuru cy’Umuryango w’Abibumbye.

Lt. Gen. Roméo Dallaire, ni we wari uyoboye Ingabo z’Umuryango w’Abibumbye zari mu butumwa bw’amahoro mu Rwanda (UNAMIR/MINUAR) mu gihe cya Jenoside na mbere yayo.

Yakunze kumenyesha uyu muryango ko mu Rwanda hategurwa Jenoside, asaba ko yagira icyo akora akabihagarika, bavunira ibiti mu matwi, bamwima uburenganzira.

Perezida Kagame yagize ati: “Mu 1994, impuruza z’umuyobozi w’Ingabo z’Umuryango w’Abibumbye, Gen. Roméo Dallaire w’Umunyakanada, zajyaga mu matwi atumva. Kubura uburenganzira bwo kurinda abasivile, ni inzitizi ku byo umuyobozi mwiza w’ingabo ashobora kugeraho.”

Gusa, Kagame yavuze ko Lt. Gen. Dallaire yagumanye n’ingabo ze, bagakora ibyo bashobora gukora. Ati: “Captain Mbaye Diagne w’Umunyasenegale, yatanze ubufasha arokora ubuzima bwa benshi, mbere yo gutakaza ubwe”.

Akaba yaravuze ko kuri ubu hatewe intambwe ishimishije mu bijyanye no kubungabunga amahoro, ku bufasha bw’Umunyamabanga Mukuru w’Umuryango w’Abibumbye n’ibihugu bigize uyu muryango, kuri ubu kurinda abasivile ni iby’ibanze mu kubungabunga amahoro.

Umukuru w’Igihugu yagarutse ku ngingo y’uko u Rwanda ubu na rwo rutanga umusanzu warwo mu kubungabunga amahoro hirya no hino, ati “Mu myaka myinshi ishize, u Rwanda rwakunze kuba mu bihugu bitanu bya mbere bitanga umusanzu wabyo mu bikorwa by’Umuryango w’Abibumbye byo kubungabunga amahoro.” Kandi yavuze ko ruzakomeza iyi gahunda.

Yavuze ko u Rwanda rudatanga gusa abasirikare n’abapolisi mu bikorwa byo kubungabunga amahoro, ati “Nk’Igihugu cyatereranywe n’Umuryango Mpuzamahanga, twiyemeje ku ruhande rwacu kugira ibintu byiza kurushaho, kugira ngo dukomeze gutera intambwe.”

Yavuze ko kwibuka ari no gukumira Jenoside, kuko iyo abantu bacecetse kuri Jenoside biha urwaho abayihakana n’abapfobya. Kagame akaba yarashimye ibihugu bigize Umuryango w’Abibumbye ku bwo gufata ikemezo cyo gukoresha inyito nyayo kuri Jenoside yakorewe Abatutsi. Ati “Umwaka ushize Inteko Rusange yatoye ku bwiganze inyito nyayo: Jenoside yakorewe Abatutsi. Ndashimira ibihugu by’ibinyamuryango ku bw’iki kemezo.”

Perezida Paul Kagame yashimye ibihugu by’u Bufaransa na Canada kuko byagennye itariki ya 7 Mata nk’umunsi wo kwibuka Jenoside yakorewe Abatutsi, asaba n’ibindi bihugu gukurikiza urwo rugero.

Yashimye Umunyamabanga Mukuru w’Umuryango w’Abibumbye na Perezida w’Inteko rusange y’uyu muryango ku bw’ubufatanye mu gutegura iki gikorwa cyo kwibuka, anashimira kandi abitabiriye uyu muhango wo kwibuka ku nshuro ya 25 Jenoside yakorewe Abatutsi, avuga ko ari ikimenyetso cy’ubufatanye.

Perezida Paul Kagame hagati (uwa gatatu uvuye ibumoso) abanjirijwe n’Umunyamabanga Mukuru wa LONI António Guterres mu muhango wo kwibuka ku nshuro ya 25 Jenoside yakorewe Abatutsi wabereye ku kicaro gikuru cya LONI

TANGA IGITEKEREZO

Leave a Reply

Your email address will not be published. Required fields are marked *