26°C , Partly sunny | Kigali-Rwanda
Dr Karambizi Venuste umwarimu akaba n'impuguke muri politiki mpuzamahanga, asanga kwihobora kw'Afurika bizagerwaho

Kwibohora kw’Afurika birashoboka – Dr Karambizi

Yanditswe na KAYITARE JEAN PAUL

Ku ya 11-05-2018 saa 05:52:07

Mu myaka 50 ibihugu by’Afurika bibonye ubwigenge, hari ibyagezweho byinshi. Kugira ngo Afurika yibohore byuzuye bisaba gushyira hamwe, guhindura imyumvire kandi buri muturage w’Afurika akabigiramo uruhare nkuko umwarimu akaba n’impuguke muri politiki mpuzamahanga, Dr Karambizi Venuste, yabitangarije Imvaho Nshya.

Dr Karambizi Venuste umwarimu akaba n’impuguke muri politiki mpuzamahanga, asanga kwihobora kw’Afurika bizagerwaho

Mu kiganiro kihariye Imvaho Nshya yagiranye na Dr Karambizi Venuste, asobanura ko Afurika ishobora kwibohora kuko hari ahandi byakozwe kandi bigashoboka.

Atanga urugero ku gihugu cy’u Bushinwa aho mu myaka ya 1949 Mao Tse-Tung yatangije impinduramatwara yanamwitiriwe, kandi ngo si uko u Bushinwa bwari bukize cyane kandi bwari bufite ibyo bufite ubu. Ati “Kuzamuka ni ubushake kuko Afurika ifite kaminuza nyinshi, ifite abanyabwenge, haba hakenewe gukosora, abantu bakicara bakavuga bati ubundi kiriya kirakorwa na nde, ko dufite kaminuza abazivamo bafite ikerekezo kiganisha ku majyambere? Ibyo Afurika irabifite.”

Dr Karambizi avuga ko Afurika izakomeza kugira abayobozi kandi bameze nka Perezida Paul Kagame wamaze kumva ikigomba gukorwa, ngo hari kandi n’abazagera ikirenge mu ke kugira ngo ikerekezo cyo kwibohora kw’Afurika kigerweho.

Ati “Afurika izakomeza igire abayobozi nka Perezida Kagame wamaze kumva ikigomba gukorwa, hari abazabigana, hari abato, urubyiruko ruvuka, bigomba kuza ariko hari akazi gakomeye kagomba gukorwa. Ibi birasaba guhindura imyumvire, kwiyemeza no kurambirwa kumva ko Afurika yakomeza kuba iciro ry’imigani. Ubwigenge bwuzuye bw’Afurika buzagerwaho buri wese nahaguruka, n’abayobozi bagakangura abayoborwa”.

Inkunga zizageza ubwo zidakenerwa

Bimwe mu bigaragaza ko Afurika yibohoye bitangiye kwigaragaza ariko hakanibazwa niba kwibohora kw’Afurika bizashoboka. Dr Karambizi ashimangira ko bizashoboka kandi byoroshye kubigeraho nubwo hari aho byatangiye mu bihugu bimwe by’Afurika.

Ati “Iyo urebye mu Rwanda turavuga ngo ingengo y’imari yacu iva mu banyagihugu ku kigereranyo cya 62%, asigaye muri 38% harimo inguzanyo kandi na yo ni nk’amafaranga yacu u Rwanda ruba rwagujije ruba rugomba kuzishyura. Imfashanyo hambere yari nka 17%, birashoboka ko no muri iki gihe ingengo y’imari yiyongereye n’imfashanyo yagabanutse”.

Akomeza agaragaza ko mu 1994 Jenoside yakorewe Abatutsi ikirangira, wasangaga nk’u Rwanda rwiringira inkunga yo hanze hafi 100%, akavuga ko icyo u Rwanda rwashoboye n’abandi bazagishobora.

Ati “U Rwanda 38% by’ingengo y’imari ituruka hanze ruzayivaho kandi birashoboka. Iyo ufashe igihugu nka Kenya, bo bamaze kugera kuri 95% by’ingengo y’imari yo mu gihugu, ubwo ni ukuvuga ko inkunga y’amahanga ari 5%. Niba Kenya ibishobora n’abandi babishobora, icyo bisaba ni ugukangura ibindi bihugu kuko Afurika ifite ibintu byose”.

Ku rundi ruhande, Dr Karambizi avuga ko ibyo amahanga afasha Afurika biba byavanywe muri Afurika bityo ugasanga afasha uyu mugabane mu biwuvuyemo. Ashimangira ko aho bipfira, ubutunzi bw’Abanyafurika bucukurwa mu butaka, ibyo basarura bavunikiye, babyohereza hanze y’Afurika hanyuma na bo bagahabwa amafaranga make nkuko abakoloni babigennye kuva mu bukoloni, bakagenda bakabihindura bagakuramo amafaranga menshi noneho bagafashamo duke Afurika, ariko Abanyafurika bakumva ko bahawe menshi kandi bayakuye mu butunzi bwabo.

Ibyo byose bigomba guhindurwa n’Abanyafurika ubwabo kandi ibyatuma bihinduka birahari. Ati “Hari ukwigenga mu by’uburezi, ubuzima, ubucuruzi no mu nganda. Afurika ituwe n’abarenga miliyari, bakoze ubucuruzi hagati yabo byateza imbere Afurika kandi icyo ni kimwe mu bigaragaza ukwibohora kwayo. Kaminuza dufite, kera muri Afurika ntazari zihari n’ubwo tuvuga ngo hari ikibazo k’ireme ry’uburezi ariko n’izo kaminuza zirahari”.

Dr Karambizi ashimangira ko buri wese aho akorera yahindura Afurika. Ati “Buri wese aho akorera yaba umuhinzi, umucuruzi, utwara moto, umupolisi, umusirikare, umwarimu, umushakashatsi, umuganga, umunyamakuru twese tugahindura imyumvire n’imikorere noneho abayobozi bacu bagashyira hamwe bose bakumva ko bafite uruhare mu guhindura Afurika, nta cyabuza ko Afurika yahinduka”.

 

 

 

TANGA IGITEKEREZO

One Comment on “Kwibohora kw’Afurika birashoboka – Dr Karambizi”

  1. Ibyo Dr avuga nibyo ahubwo igisigaye ni ugushyiraho ibigomba gukorwa buri mwaka ku buryo twakwiha intego.

    Ibyerekeye guhahirana nibyo ahubwo nabwo bigomba kugira gahunda hakajyaho urubuga rugagagaza ibiri muri buri gihugu noneho abandi bakajya kubishakayo
    Dukomeze twungurane ibitekerezo

Leave a Reply

Your email address will not be published. Required fields are marked *