21°C , Partly cloudy | Kigali-Rwanda

Kwibohora byazanye impinduka mu burezi- REB

Yanditswe na KAYITARE JEAN PAUL

Ku ya 04-07-2020 saa 00:06:41
Ubuyobozi bwa REB bugaragaza ko mu rwego rw'Uburezi ikoranabuhanga ryateye imbere kubera imiyoborere myiza

Ubuyobozi bw’Ikigo gishinzwe guteza imbere Uburezi mu Rwanda (REB), burishimira intambwe Igihugu kimaze gutera mu myaka 26 kibohowe n’ingabo zari iza FPR.

Dr. Ndayambaje Irénée, Umuyobozi Mukuru wa REB, agaragaza ko uburezi mu Rwanda bwabohowe byinshi mu myaka 26 ishize.

Ati: “Uburezi bwarazahutse (bwarabohotse) kuko iyo hatabaho kubohora Igihugu, mu burezi twagombye kuba dufite ibikituboshye”.

Avuga ko iyo ikoranabuhanga rigenda ritera imbere mu zindi nzego ntiritere imbere mu burezi, urwo rwego rwari kuba rukiboshye, bityo ko uburezi bujyana n’igihe, ndetse bukanagenda buvugururwa busanishwa n’aho Isi igana.

Ati: “Bimwe mu byo tumaze kugeraho nyuma y’imyaka 26 u Rwanda rubohowe, ni aho twatangiye kubaka ibyumba by’amashuri birenga ibihumbi 22, ni ubwa mbere muri iyi myaka hubatswe ibyumba by’amashuri bingana bitya mu gihe gito, kandi bije gukemura ibibazo birimo ubucucike n’ingendo ndende.”

Dr. Ndayambaje yerekana ko iyo umwarimu arimo kwigisha abana benshi imbere ye kubakurikirana bimugora bityo, n’abana ubwabo kugira ngo bashobore gukurikira no kubona umwanya wo kubaza mu minota 40 umwarimu ari mu ishuri biba bigoye.

Dr Ndayambaje Irénée, Umuyobozi Mukuru REB, avuga ko uburezi bwateye imbere mu myaka 26 ishize (Foto Kayitare J.P)

Sitati nshya y’umwarimu igaragaza kwibohora nyako

Dr Ndayambaje akomeza avuga ko hari byinshi byanahindutse mu myaka 26 ishize ku ruhande rw’umwarimu.

Dr Ndayambaje agira ati: “Ikindi gikomeye twagezeho kandi twishimira muri iyi myaka 26 ishize twibohoye ni ukubaba abarimu barahawe sitati yihariye. Mu mwaka wa 2016 hasohotse Iteka rya Perezida Nº 24/01 ryo ku wa 24/11/2016 rishyiraho sitati yihariye igenga abarimu b’amashuri y’inshuke, abanza n’ayisumbuye. Iyi sitati turishimira by’umwihariko ko yongeye kuvugururwa muri uyu mwaka wa 2020 n’Iteka rya Perezida No 064/01 ryo ku wa 16/03/2020 rishyiraho sitati yihariye igenga abarimu b’amashuri y’inshuke, abanza, ayisumbuye n’ay’imyuga n’ubumenyingiro. Ibi ni ibintu bikomeye bigaragaza umwihariko ku mwuga w’uburezi. Bivuze ko urwego rw’uburezi rufite uko rwubatse, uko runateganya iterambere ry’abakora uyu mwuga ndetse n’uko ubunararibonye muri uyu mwuga bwubakwa.”

Yongeraho ko muri iyo sitati harimo uburyo butandukanye bwo kurambagiza abarimu, kubashyira mu myanya ndetse no kurambagiza abayobozi b’ibigo by’amashuri n’uburyo na bo bahabwa inshingano.

Kwibohora bivuze imiyoborere myiza

Ubuyobozi bwa REB buvuga ko ibyiza byose byagezweho mu myaka 26 ishize bishingiye ku miyoborere myiza irangajwe imbere na Nyakubahwa Perezida wa Repubulika y’ U Rwanda Paul Kagame.

Dr Ndayambaje yagize ati: “Kuba twaribohoye tukaba tugeze uyu munsi, tubikesha imiyoborere myiza y’iki Gihugu. Bishatse kuvuga ko ubuyobozi bwiza ari ikintu gikomeye.”

Yakomeje agira ati: “Kwibohora mu rwego rw’uburezi bivuze ko hari ibyari bidutsikamiye twashoboye kwigobotora nk’ikibazo cy’ubucucike mu byumba by’amashuri, ikibazo k’ingendo ndende, uko abarimu barambagizwa, bacungwa n’uko batezwa imbere. Ibyo bivuze ko kwibohora bivuze kugira ibyo tugenda turenga, dusiga inyuma”.

Ibi abishingira ku kuba tariki ya 21 Gashyantare 2020, Minisiteri y’Uburezi yarasohoye amabwiriza N0 001/MINEDUC/2020 agena ibyerekeye kwimura, gusibiza, kwirukana no guhindurirwa ishuri. Ishyirwa mu bikorwa ry’aya mabwiriza rikaba ryitezweho umusaruro ukomeye.

Hitezwe ko ibyumba by’amashuri birenga 22,000 bizaba byuzuye bitarenze muri Nzeri 2020

Ubuhamya bw’umwarimu

Mudenge Wilson, Umuyobozi w’Urwunge rw’Amashuri rwa Rwikiniro mu Karere ka Gatsibo, yemeza ko urwego rw’uburezi rwibohoye kuko ngo guhezwa bitakibaho.

Yagize ati: “Ndemera ko mu rwego rw’uburezi twibohoye kuko mbere y’uko u Rwanda rubohorwa, uburezi bwahezaga bamwe. Uko guheza mvuga ni uko hari abitirirwaga ubwoko bw’Abatutsi n’ubw’Abatwa bahezwaga, nubwo rimwe na rimwe abitwaga Abatwa byavugwaga ko basigajwe inyuma n’amateka, ntabwo babaga barabonye n’amahirwe yo kwiga.”

Avuga ko kuri ubu abana bose biga ndetse ugereranije na kera usanga ibyangombwa nkenerwa mu burezi biboneka kuruta kera.

Akomeza avuga ati: “Hari ukwibohora, kuba ingendo abanyeshuri bakora zirimo kugabanuka ku buryo abana bazajya biga nta nkomyi, ibyo ni byo mbona bigaragaramo kwibohora mu burezi.”

Karamuzi Fred utuye mu Karere ka Kicukiro mu Murenge wa Nyarugunga, ahamya ko afite abana biga, akishimira ko afite Igihugu kita ku baturage bose kitavanguye.

Inzego z’uburezi ndetse n’abaturage batandukanye bemeza ko by’umwihariko muri muri iki gihe cya COVID-19, abana bitaweho bakomeza amasomo bari iwabo kugeza muri Nzeri igihe biteganyijwe ko bazasukura amasomo yabo.

Ati: “Urebye ukuntu abana bacu bose biga ni ikintu gishimishije hakiyongeraho kuba inzego z’uburezi zarashoboye gushyiraho uburyo bwo kwigisha abana muri iki gihe cya COVID-19, ni ibigaragaza ko twibohoye mu buryo bwose”.

Umubare w’abana bagana ishuri mu Rwanda wakomeje kuzamuka uko imyaka yagiye ihita indi igataha, mu myaka itatu ishize ku ijanisha ryakozwe na Minisiteri y’Uburezi rigaragaza ko iyi mibare yari ihagaze ku gipimo cya 98% mu mashuri abanza.

Mu mwaka wa 2011 umubare w’abana bigaga mu mashuri abanza banganaga na 2,341,146 ni ukuvuga 96% y’abagombaga kuba biga muri iki kiciro. Muri 2016 umubare wabo warazamutse ugera ku 2,546,263 bangana na 98%.

Umuyobozi w’Ikigo k’ishuri rya Rwikiniro, Mudenge Wilson, avuga ko mu burezi hagaragaramo Kwibohora

Mu rwego rwo guteza imbere uburezi bw’ibanze bw’imyaka 9 na 12, kuva mu mwaka wa 2009 kugeza mu wa 2017 hubatswe ibyumba by’amashuri 16,439 n’ubwiherero 31,934.

Umubare w’abarimu babyigiye mu mashuri yisumbuye wavuye kuri 63.4% muri 2011 ugera kuri 69.2% mu mwaka wa 2016.

Amashuri y’Imyuga n’Ubumenyingiro (TVET) yariyongereye. Yavuye kuri 251 mu mwaka 2011 agera kuri 394 muri 2016. Umubare w’abanyeshuri wavuye kuri 67,919 muri 2011 ugera ku 93,158 muri 2016.

Ku birebana n’amashuri makuru na za kaminuza, hagati ya 2000 na 2015, harangije abanyeshuri 105,039. Muri bo, 16,716 (16%) barangije ikiciro cya mbere (Diploma), 83,022 (79%) barangije ikiciro cya kabiri cya kaminuza (Bachelors Degree) naho 5,301 (5%) barangije ikiciro cya gatatu (Masters and PhD).

Muri aba banyeshuri bose barangije, abize amasomo atari siyansi (Non STEM/Science, Technology, Engineering and Mathematics) ni 64.1% mu gihe abarangije STEM bangana na 35.9%.  Gahunda ya Guverinoma y’imyaka irindwi (2017-2024) ni uko mu mwaka wa 2024, 60% y’abanyeshuri barangiza ikiciro rusange (Tronc Commun/O-Level) bazajya kakomereza amasomo yabo mu myuga n’ubumenyingiro (TVET) 40% akaba ari bo bajya mu mashuri y’ubumenyi rusange (General education).

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.