19°C , Partly sunny | Kigali-Rwanda

Kwibohora 26: Akarere ka Ngororero mu iterambere gakesha imiyoborere myiza

Yanditswe na Imvaho Nshya

Ku ya 03-07-2020 saa 22:22:03
Imidugudu y'ikitegererezo ikomeje kubakwa mu rwego rwo gutuza heza abaturage

Akarere ka Ngororero gaherereye mu Ntara y’Iburengerazuba, karishimira iterambere kagezeho nyuma y’urugamba rwo kubohora u Rwanda rwatangijwe n’ingabo zari iza RPA-Inkotanyi ari nazo zahagaritse Jenoside yakorewe Abatutsi mu 1994.

Ubuyobozi bw’Akarere burashimira inzego z’umutekano, ingabo na Polisi by’Igihugu, by’umwihariko Nyakubahwa Perezida Paul Kagame wayoboye urugamba rwo kubohora Igihugu bityo abaturage b’Akarere ka Ngororero bakaba bamaze gutera imbere.

Umuyobozi w’Akarere ka Ngororero Ndayambaje Godefroid, ahamya ko mu myaka 26 ishize, Akarere kateye intambwe mu kwikura mu bukene ku buryo bugaragara.

Ati: “Akarere mu myaka ishize kari gakennye cyane ku buryo ubukene bukabije bwari kuri 69%, ubu bwaragabanutse bugera kuri 47% hakurikijwe ibarura rya 2008 ndetse n’iryabaye 2018. Ubukene bukabije twavuye 40% tugera kuri 20,8%”.

Mu 2008, Akarere kari gafite amashanyarazi ku kigero cya 3% ubu ari kuri 31,5%. Amazi yari kuri 40% ubu ageze kuri 70%,  bikaba bigaragaza intambwe yatewe mu karere.

Umuyobozi w’Akarere ka Ngororero Ndayambaje Godefroid, yagaragaje intambwe bateye mu myaka 26 u Rwanda rumaze rwibohoye (Foto Kayitare J.P)

Meya Ndayambaje avuga ko mu bukungu Akarere kateye intambwe ishimishije aho mu buhinzi; hari amaterasi y’indinganire angana na hegitari 5,355 avuye kuri hegitari 659 muri 2009. Amaterasi yikora kugeza ubu arabarirwa kuri hegitari 9,124 aho mu gihe cyashize nta materasi yikora yaharangwaga.

Umusaruro w’icyayi ugeze kuri toni 2,681 ku mwaka, mu gihe mbere ya 2008 wasangaga udashobora kurenza toni 650.

Gahunda ya Girinka yatangiye mu 2009, Akarere ka Ngororero katangiriye ku busa, ubu kamaze gutanga inka 11,563 muri iyo gahunda ya Perezida wa Repubulika Paul Kagame yo kugabira buri rugo rutishoboye.

Hamaze guhangwa imirimo myinshi kuko nko mu 2012 wasangaga imirimo ihangwa itarenga 139 ariko ubu, Akarere kamaze kugira 14,823 by’imirimo yahanzwe ituma ubuzima bw’abaturage buhinduka bakagira indi mirimo itari iy’ubuhinzi.

Meya Ndayambaje,  avuga ko Akarere ka Ngororero kari gafite amasoko abiri manini mu 2009 none ubu gafite amasoko 6. Gafite akandi masoko 5 matoya aringaniye.

Ati: “Ikindi ntitwagira sitasiyo ya peteroli, ubu dufite sitasiyo za lisansi eshatu kandi mbere nta n’imwe twagiraga. Nta gare itegerwamo imodoka twagiraga ariko ubu dufite  ebyiri.”

Mbere y’uko Igihugu kibohorwa n’ingabo zari iza RPA, Akarere ka Ngororero ntikagiraga aho abantu bashobora gusura mu rwego rw’ubukerarugendo, ariko ubu mu Murenge wa Kageyo hari ahitwa ku Mukore wa Rawabugiri aho uyu mwami yakiriye umukeraregendo w’Umudage Von Goetsen mu 1894.

Kugeza ubu Akarere gafite ahantu hatatu hakusanyirizwa umukamo w’amata kandi hakora neza mu gihe mbere kagiraga ikusanyirizo rimwe gusa. Muri aka karere hari n’inganda zitonora igihingwa cya Kawa zigera kuri 5.

Ngororero bibohoye imirire mibi n’igwingira ry’abana mu myaka 26 ishize

Meya Ndayambaje avugako mbere kubona umuhanda wa kaburimbo mu Karere ka Ngororero byari igitangaza ariko ubu hari umuhanda wa kirometero 50 uhuza Ngororero n’uturere twa Muhanga na Nyabihu, ukaba ufasha abaturage mu guhahirana.

Ati: “Imihanda y’igitaka yariyongereye, ubu tumaze kugira ibirometero 528 kuko dufite imihanda twafashijwemo muri gahunda ya VUP ari na yo ituma ibirometero by’imihanda byiyongera. Kugeza uyu munsi dufite ibiraro birindwi byo mu kirere, ahari imisozi ihanamye cyane ku buryo abaturage kubona uko bambuka imigezi minini biba bigoranye cyane, kandi dukomeje kubaka ibindi. Dufite amatara yo ku muhanda ibirometero 8 byose biracaniwe, tukaba tubyishimira kuko biragaragaza ko twibohoye.”

Akomeza avuga ko imiturire yahindutse kuko mbere ntabwo Akarere kagiraga amazu yubatse neza nk’umudugudu w’ikitegererezo ariko gafite imidugudu 4 kuko igishushanyombonera kigaragaza ko gafite imidugudu 194 ishobora guturwaho n’abaturage igafasha kurwanya ibiza.

Mu rwego rw’ubuzima, mu Karere ka Ngororero hubatswe ibitaro biriri, ibigo nderabuzima n’amavuriro y’ingoboka biriyongera. Ati: “Twari dufite ibigo nderabuzima 4 ariko ubu dufite ibigo nderabuzima 15 izo ni impinduka. Nta vuriro ry’ingoboka (Postes de Santé) twagiraga ariko ubu dufite 26 muri yo 17 arakora neza, andi 9 turimo kuyashakira abakozi kugira ngo ashobore gukora. Dufite farumasi (Pharmacie) zigenga n’iya Leta.”

Mu burezi hamaze kubakwa ibyumba by’amashuri 713 uhereye 2019, uyu munsi Akarere gafite Ibigo by’amashuri 121 harimo:
Amashuri y’inshuke :110
IBIGO BY’AMASHURI ABANZA: 103
IBIGO BY’AMASHURI YISUMBUYE: 43
IBIGO BY’IMYUGA N’UBUMENYINGIRO :9
Amashuri ya Leta (Public schools): 24
Amashuri Leta ifatanya n’amadini ku bw’amasezerano: 90
Amashuri yigenga: 7

Mu miyoborere myiza Ngororero yateye intambwe ishimishije kuko inkiko gacaca zagiye zikemura imanza, uyu mwaka wonyine ubuyobozi bw’Akarere buvuga ko bwari bufite imanza 425, muri zo izigera kuri 255 zarakemutse gasigaranye 170 zirimo 105 zishobora gukemuka mu mezi atarenze abiri.

Hubatswe utugari 50 kuri 73 kandi twubatse neza n’udusigaye biteganijwe ko tuzubakwa muri iyi minsi. Imirenge uko ari 13 ifite aho ikorera kandi hameze neza.

Ibibazo by’abaturage bikemuka binyuze mu nteko z’abaturage, kugeza ubu ngo abaturage bajya mu manza ni bake ugereranije no mu gihe cya mbere aho wasangaga abaturage bari mu nkiko, kuri ubu inkiko ngo ntizikibona abantu zakira kubera ko komite z’abunzi zakira ibibazo igihe cyose kandi zikabikemura.

Umudugudu wubakiwe abatishoboye mu Karere ka Ngororero mu rwego rwo guhangana n’ibibazo bibangamira abaturage

Ibikorwa byatashywe mu rwego rwo kwizihiza umunsi wo kwibohora

Ku wa Gatanu tariki 03 Nyakanga 2020 muuri buri burenge w’Akarere ka Ngororero hatashywe ibikorwa bitandukanye. Birimo Umudugudu w’ikitegererezo wa Muhanda ugizwe n’amazu 2 yubatswe ku buryo bujyanye n’igihe, azakira imiryango umunani. Afite agaciro kangana na miriyoni zikabakaba 133 z’amafaranga y’u Rwanda (132, 808,059 Frw).

Hatashywe ikusanyirizo ry’amata mu Murenge wa Nyange rifite agaciro ka 39,787,659 frws, ndetse hashimirwa abaturage bo mu mudugudu wa Vungu babaye aba mbere muri mituweli y’umwaka ushize. Muri uyu murenge hatashywe inzu yubatswe n’Inama y’Igihugu y’Abagore bubakiye mugenzi wabo utari ufite icumbi.

Meya Ndayambaje yabwiye Imvaho Nshya ko hatashywe ibiro by’akagari, ibyumba by’amashuri mu mirenge itandukanye nka Hindiro na Gatumba, hanatahwa amazu 79 mu rwego rwo kurwanya ibibazo bibangamiye imibereho myiza y’abaturage.

 

Mu karere ka Ngororero hatashywe ka ndi imiyoboro y’amazi ikurikira:
1. Kivugiza ya 2 ifite uburebure bwa km 20,3 n’agaciro ka miriyoni 133 z’amafaranga y’u Rwanda
2. Kibanda-Bitabage 15,6km, miriyoni 167
3. Mugobati- Mavumo km38, miriyoni 309

4. Gataba-Ruhindage 6,7km, Bitare-Rususa km 11, Kaseke-Gataba km 3,9: iyi uko ari 3 yatwaye miriyoni 227.

Ubuyobozi bw’Akarere ka Ngororero bwibutsa abaturage gukomeza kubahiriza amabwiriza yo kwirinda ikwirakwira ry’icyorezo cya Koronavirusi, bambara neza agapfukamunwa, gukaraba intoki inshuro nyinshi, guhana intera ya metero hagati y’umuntu n’undi no kwirinda
kuramukanya bahana ibiganza.

Akarere ka Ngororero gatuwe n’abaturage 382,984 bari mu miryango 93, 416 aho 53% ari abagore naho 47% bakaba abagabo.

Ubworozi mu Karere ka Ngororero bumaze gutera imbere mu myaka 26 ishize

Amashanyarazi ni kimwe mu bikorwa remezo bigaragara mu Karere ka Ngororero

Abaturage bavuma amazi meza muri Ngororero

 

 

Umwanditsi:

Imvaho Nshya

4 Comments on “Kwibohora 26: Akarere ka Ngororero mu iterambere gakesha imiyoborere myiza”

  1. Dushimiye abayobozi ba karere Ka Ngororero uburyo bakorana umurava mukuzahura Akarere mubukene cyane ko ibikorwa byivugira na baturage bagenda biteza imbere.Ngororero Team ok.

  2. Nukuri,akarere ka Ngororero ntawe utabonako abagatuye bibohoye,natwe abo konkeje ntituzatezuka,tuzagateza imbere kurusha uko gahagaze kurubu.bayobozi,mukomeze mudutekerereze.

  3. Akarere ka Ngororero nikamwe muturere twahinduye imibereho yabaturage kuburyo bugaragara cyane Kandi bakomereze aho nibindi bizagenda biza kubufatanye nubuyobozi bwiza bwigihugu cyacu!
    Dukomeze dusigasire ibimaze kugerwaho

Tanga Igitekerezo

Email yanyu ntigaragazwa ku rubuga. Amazina na Email ni ngombwa.