28°C , Sunny | Kigali-Rwanda

Kwibohora 25: Abakuru b’ibihugu barindwi bategerejwe mu Rwanda

Yanditswe na Nshimyumukiza Janvier Popote

Ku ya 02-07-2019 saa 18:21:14
Ambasaderi Nduhungirehe Olivier, Umunyamabanga wa Leta muri Minisiteri y'Ububanyi n'Amahanga ushinzwe Umuryango w'Afurika y'Iburasirazuba

Imyiteguro yo kwizihiza umunsi wo Kwibohora ku nshuro ya 25 kuwa 4 Nyakanga 2019 irarimbanyije, aho u Rwanda rwitegura kwakira abashyitsi baturutse hirya no hino ku Isi, barimo abakuru b’ibihugu barindwi.

Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, yabwiye Imvaho Nshya abashyitsi bazaza kwifatanya n’Abanyarwanda kuri uwo munsi ngarukamwaka.

Muri bo hari Perezida wa Togo Faure Essozimna Gnassingbé, uwa Namibia Hage Gottfried Geingob uzazana na madamu we, uwa Repubulika ya Centre Africa Faustin-Archange Touadéra, uwa Somalia Mohamed Abdullahi Mohamed, uwa Zimbabwe Emmerson Mnangagwa, Perezida wa Botswana Mokgweetsi Masisi n’uwa Sierra Leone Julius Maada Bio.

Amb. Nduhungirehe asobanura ko usibye abo bakuru b’ibihugu, hazaza abandi bashyitsi barimo Visi Perezida wa Nigeria Oluyemi Oluleke Osinbajo, Minisitiri w’Intebe wa Tanzania Kassim Majaliwa, Minisitiri ushinzwe Umuryango w’Afurika y’Iburasirazuba muri Uganda Ali Kirunda Kivejinja, Umunyamabanga Mukuru w’Umuryango w’Ibihugu bikoresha Igifaransa (OIF) Madamu Mushikiwabo Louise n’abaminisitiri b’ububanyi n’amahanga b’ibihugu bitandukanye.

Ambasaderi Nduhungirehe Olivier, Umunyamabanga wa Leta muri Minisiteri y’Ububanyi n’Amahanga ushinzwe Umuryango w’Afurika y’Iburasirazuba

Kuwa 4 Nyakanga buri mwaka, u Rwanda rwizihiza umunsi wo kwibohora, hibukwa urugamba rwo kubohora igihugu rwatangijwe n’ingabo zahoze ari iza RPF-Inkotanyi, rukarangira ku ya 4 Nyakanga 1994 zinahagaritse Jenoside yakorewe Abatutsi.

Amb. Nduhungirehe asaba Abanyarwanda kuzirikana urugendo rwo kwiyubaka igihugu kimazemo imyaka 25 “nyuma y’umwijima n’imiborogo” cyanyuzemo mu 1994 muri Jenoside yahitanye abasaga miliyoni mu gihe k’iminsi 100 gusa.

Avuga ko kiriya gihe u Rwanda rwapfuye, ati “ariko kubera ubutwari bw’ingabo za FPR-Inkotanyi zabohoye igihugu ndetse zigatuma hajyaho na Guverinonoma y’Ubumwe bw’Abanyarwanda irangajwe imbere na Nyakubahwa Paul Kagame, hashyizweho politiki yo kunga Abanyarwanda, kugarura umutekano, n’iterambere rirambye.”

Kwibohora ni urugendo rukomeza

Amb. Nduhungirehe ahamya ko u Rwanda rumaze kwiyubaka mu nzego zitandukanye nko kwiteza imbere mu bukungu n’imibereho myiza y’abaturage, ati “Ni ibintu byo kwishimira ariko kwibohora ntibirarangira, tugomba gukomeza no mu myaka iri imbere tugakomeza tugaharanira kurwanya ubukene, tugaharanira ubwisungane no guteza imbere ubukungu kugira ngo tuzagere mu kerekezo twihaye cya 2020.”

Asaba Abanyarwanda gukomeza kunga ubumwe mu gihe bitegura kwinjira no mu kerekezo 2050 kizakurikira 2020, banaharanira gushyira mu bikorwa Gahunda ya Guverinoma y’Imyaka 7 (2017-2024), ati “Ibyo byose ni ukwibohora kugira ngo dukomeza dutere imbere.”

Umuyobozi w’Umujyi wa Kigali wungirije ushinzwe iterambere ry’ubukungu, Busabizwa Parfait, yasabye abaturage kwimakaza isuku muri ibi bihe bitegura kwakira abashyitsi, ndetse asaba ko bazazindukira kuri Sitade Amahoro ku wa 4 Nyakanga ahazabera ibirori ku rwego rw’Igihugu.

Ati: “Turifuza ko bitarengeje saa moya za mu gitondo (7h00) abaturage bazaba bamaze kwinjira muri sitade bityo bakaba babona umwanya wo kwicara hakiri kare ndetse tuzanateganya n’aho abandi bose twabashyira mu gihe sitade yaba yuzuye cyane kugira ngo bakurikirane umuhango neza.”

TANGA IGITEKEREZO

Leave a Reply

Your email address will not be published. Required fields are marked *