19°C , Partly cloudy | Kigali-Rwanda

Kuva mu 2005 u Rwanda rwise amazina abana b’ingagi barenga 300

Yanditswe na NTAWITONDA JEAN CLAUDE

Ku ya 23-09-2020 saa 15:59:58

Mu Muco Nyarwanda, nyuma y’iminsi umunani uruhinja ruvutse, ababyeyi batumiraga abaturanyi, inshuti, n’abavandimwe, bakabagaburira ibiryo bya Kinyarwanda birimo umutsima w’amasaka, hanyuma abo bashyitsi bakita umwana amazina atandukanye, ku mugoroba cyangwa se mu rukerera Se w’umwana akamwita izina ry’ukuri.

Nubwo kuri ubu ari umuco ugenda ukendera mu Rwanda kubera ibihe bihindukana iterambere ry’ibigezweho, umuco ushushe nka wo umaze gushinga imizi mu muhango wo Kwita Izina abana b’ingagi uba buri mwaka.

Kuri uyu wa Kane tariki 24 Nzeri 2020, hitezwe uwo muhango ugiye kuba ku nshuro ya 16 guhera mu mwaka wa 2005. Hazitwa amazina abana b’igagi 24, baziyongera ku bamaze kwitwa amazina bigatuma bagera kuri 305.

Kuri ubu uwo muhango ukorerwa ingagi nk’umuryango w’inyamaswa zari zisigaye ari nke cyane ku Isi, mu rwego rwo kuzibungabunga no kuzirinda. Urugo rw’izo ngagi muri Pariki y’Igihugu y’Ibirunga ikora ku Rwanda, Uganda na Repubulika Iharanira Demokarasi ya Congo.

Buri mwaka uwo muhango wo Kwita Izina  witabirwa n’abayobozi ndetse n’abanyacyubahiro batandukanye bo mu Rwanda n’abaturutse mu mahanga. Ibirori biherekezwa n’ibikorwa bijyanye no kubungabunga Pariki y’Ibirunga.

Ku nshuro ya 16 Kwita Izina bizakorwa mu buryo budasanzwe

Kuri uyu wa Kane, ibirori byo Kwita Izina birabera ku ikoranabuhanga aho bifunguriwe buri wese wifuza kubikurikirana ahagana saa kenda z’amanywa. Iryo koranabuhanga ryifashishijwe bitewe n’icyorezo cya COVID-19 cyazanye imbogamizi mu ngendo mpuzamahanga.

Kuri iyi nshuro haritwa abana 24, umuhango witezweho kwitabirwa n’abantu ku giti cyabo, abayobozi n’abakora mu nzego zitandukanye, harimo abakora mu bikorwa byo kubungabunga urusobe rw’ibinyabuzima, ibyamamare n’abandi basanzwe bitabira uwo muhango imbonankubone mu Murenge wa Kinigi ho mu Karere ka Musanze

Umuyobozi ushinzwe ubukerarugendo muri RDB Belize Kaliza, yavuze ko uwo muhango wihariye no ku kuba uzaha agaciro abakora ku ruhembe rw’imbere mu kubungabunga ubusugire bw’ingagi zo mu Birunga.

Imbaraga zashyizwe mu kurinda ingagi zatumye umuryango wazo wiyongera

Yagize ati: “Uyu mwaka tuzaha agaciro akazi k’abakozi ba Pariki barimo ba veterineri, abacunga umutekano, n’abayobora ba mukerarugendo bahuza imbaraga mu kubungabunga ubuzima bw’ishyamba.”

Kwita Izina 2020 byahujwe no kwizihiza Umunsi Mpuzamahanga wahariwe Ingagi, ndetse ukaba n’umunsi Dian Fossey (wamenyekanye nka Nyiramacibiri) yashinzeho Ikigo “Dian Fossey Nyiramaciciri” kita ku ngagi mu mwaka wa 1967.

Kuri uyu munsi abatuye Isi bazakangurirwa kugira uruhare mu bikorwa byo kubungabunga ingagi n’ibidukikije muri rusange.

Gusura ingagi bigira uruhare rukomeye mu iterambere ry’Igihugu. Mu mwaka ushize u Rwanda rwakiriye ba mukerarugendo basaga miriyoni 1.6 barimo 17,249 basuye ingagi zo mu Birunga.

Impushya zo gusura Pariki y’Ibirunga zatanzwe uwo mwaka zifite agaciro ka miriyoni 25.1 z’amadorari y’Amerika (miriyari 24.3 z’amafaranga y’u Rwanda), akaba yariyongereye ho 25% ugereranyije n’umwaka wabanje wa 2018. Ayo mafaranga agize 91% by’amadovize yose yinjijwe na Pariki zose z’Igihugu.

Bamwe mu bazita amazina abana b’ingagi

Uyu mwaka abana b’ingagi bazitwa n’abaharanira ubuzima bwiza bw’imiryango yabo. Urutonde rw’abantu 21 barimo veretineri, abagide n’abatwara ba mukerarugendo, n’abashinzwe umutekano

Muri bo harimo Francois Bigirimana wakoze akazi ko kuyobora ba mukerarugendo muri Pariki y’Ibirunga, guhera mu mwaka wa 1982, akaba yaranakoranye na Dian Fossey Nyiramacibiri.

1. Angelique Nikuze: Akurikirana ubuzima bw’Ingagi
2. Prosper Kaberabose: Akurikirana ubuzima bw’Ingagi
3. Emmanuel Nzabonimpa: Akurikirana ubuzima bw’Ingagi
4. François Xavier  Ndungutse: Akurikirana ubuzima bw’Ingagi
5. Eric Kabeja: Umukozi muri Pariki y’Igihugu y’Ibirunga
6. Honorine Uwiragiye:  Akurikirana ubuzima bw’Ingagi
7. Emmanuel Munyembabazi: Acunga umutekano wa Pariki
8. Solange Mugeni: Atwaza imizigo ba mukerarugendo
9. Jean Damascene Hategekimana: Akurikirana ubuzima bw’Ingagi
10. Odile Nyiraguhirwa: Umugide muri Pariki y’Igihugu y’Ibirunga
11: Marie-Louise Mbabazi: Impuguke mu burezi no kubungabunga urusobe rw’ibiyabuzima bishingiye ku miryango muri RDB.
12. Loyce Gashumba: Umugide muri Pariki y’Igihugu y’Ibirunga
13. Jean Bosco Iryamukuru: Umugide muri Pariki y’Igihugu y’Ibirunga
14: Felicien Munyemanzi: Acunga umutekano wa Pariki y’Igihugu y’Ibirunga
15. Pelagie Mutuyimana: Akurikirana ubuzima bw’ingagi mu Birunga
16. Jacques Bisamaza: Atwaza imizigo ba Mukerarugendo
17. Fidele Nizeyimana: Akurikirana ubuzima bw’ingagi
18: Francois Bigirimana: Umugide muri Pariki y’Igihugu y’Ibirunga
19: Emmanuel Irakoze: Akurikirana ubuzima bw’ingagi
20: Faustin Nibishaka: Akurikirana ubuzima bw’ingagi
21: Dr. Antoine Mudakikwa: Veterineri uri mu kiruhuko k’izabukuru

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.