18°C , Intermittent clouds | Kigali-Rwanda

Kung Fu:  Hagiye kuba ku nshuro  ya mbere  irushanwa ry’abakiri bato

Yanditswe na BUGINGO FIDELE

Ku ya Jul 13, 2019 saa 8:22

Mu ishyirahanwe ry’umukino wa Kung Fu Wushu  mu Rwanda “RKWF”  baratangaza ko tariki 28 Nyakanga 2019 hazaba irushanwa ry’abakinnyi bato “Junior Wushu Ambassador’s Cup 2019”, iri rushanwa rikazahurirana n’ibirori byo kwizihiza isabukuru y’imyaka 70  Repubulika y’u Bushinwa ibayeho ari  naho uyu mukino ukomoka.

Perezida wa RKWF, Uwiragiye Marc aganira n’Imvaho Nshya  yatangaje ko iki gikorwa kizaba mu byiciro 2 aho  bazabanza  gutangiza iri rushanwa ry’abakiri bato rizaba ribaye ku nshuro ya mbere ariko rikazajya riba buri mwaka.

Yakomeje avuga ko   iri rushanwa rizagaragaramo abana bafite imyaka iri hagati ya 4 na 15.  Uwiragiye avuga ko bashobora kuzakira abana bagera kuri 288 kuko batumiye amakipe yose yo mu Rwanda agera kuri 24 kandi ko nta kipe igomba kurenza abakinnyi 12.

Iri rushanwa “Junior Wushu Ambassador’s Cup 2019” rizaba tariki 28 Nyakanga 2019 kuva saa tatu za mu gitondo (09h00) kugeza saa saba (13h00), ribere kuri Sitade Nto Amahoro i Remera aho aba bakinnyi bazakina mu  kwiyereka “Taoulu”.

Nyuma y’iri rushanwa rizaba ribaye ku nshuro ya mbere hazaba ibirori by’ isabukuru y’imyaka 70  Repubulika y’u Bushinwa bizabera muri Kigali Convention Center  kuva saa kumi z’umugoroba (16h00) kugeza saa tatu (21h00). Ibi birori bikaba byarateguwe na Ambasade y’u Bushinwa mu Rwanda.

Muri ibi birori  naho hazabaho imyiyereko y’umukino wa Kung Fu Wushu y’abakiri bato ndetse n’abakinnyi bakuru. Hazanatangwa kandi ubutumwa butandukanye ku bayobozi bazaba bitabiriye nyuma habeho n’ubusabane.

Perezida wa RKWF, Uwiragiye Marc avuga ko ibi bikorwa byose  ari ikigaragaza umubano mwiza w’ibihugu byombi, u Rwanda n’u Bushinwa. Anavuga ko ari igikorwa kandi cyo guteza imbere siporo kuko bifuje gutangiza iri rushanwa ry’abakikiri bato kugira ngo babakundishe uyu mukino.

Uwiragiye anavuga ko bazabikomeza kuko bashaka ko hazamuka abana benshi kandi bazi umukino.

Hagiye kuba irushanwa ry’abana mu mukino wa Kung Fu Wushu ku nshuro ya mbere