28°C , Sunny | Kigali-Rwanda

Kung Fu: Abatoza bavuye mu Bushinwa bagiye guhugura abatoza n’abakinnyi bo mu Rwanda

Yanditswe na BUGINGO FIDELE

Ku ya 12-09-2019 saa 17:31:22
Yang Tianyu na Chen Liwei, abatoza bavuye mu Bushinwa baje guhugura abatoza mu Rwanda

Abatoza babiri bakomoka mu Bushinwa, Yang  Tianyu na Chen Liwei kuva tariki 12 Nzeri 2019  bari mu Rwanda aho baje muri guhanda yo guhugura  abatoza  ndetse na bamwe mu bakinnyi bo mu Rwanda  mu gihe k’ibyumweru bibiri.

Aba batoza bakigera mu Rwanda batangaje ko  baje gusangira n’abatoza  bo mu Rwanda ubumenyi mu mukino wa Kung Fu Wushu ufite inkomoko mu Bushinwa  kugira ngo bazamure urwego rwabo. Bakomeje batangaza ko bishimiye uko bakiriwe  ndetse n’imiterere y’u Rwanda.

Perezida w’ishyirahamwe ry’umukino wa Kung Fu Wushu mu Rwanda “RKWF”, Uwiragiye Marc yatangaje ko aba batoza bavuye mu ishuri  ryitwa Shaolin Yanlu Wushu  mu Ntara ya Henan.

Yakomeje avuga ko ari ubwa mbere babonye abatoza nk’aba  bafite ubumenyi bwisumbuye  mu mukino wa Kung Fu Wushu kuko baba barayitangiye bakiri bato.

Yagize ati : “Twizeye  ko bazadufasha  mu kuzamura urwego rwacu rw’imikinire kandi bizadufasha kuko dushaka natwe kugera ku rwego rwo kuba twakwitabira shampiyona y’isi.”

 Amahugurwa biteganyijwe ko atangira kuri uyu wa Gatanu tariki 13 Nzeri 2019 akazasozwa tariki 26 Nzeri 2019. Perezida wa RKWF, Uwiragiye  atangaza ko abatoza ndetse n’abakinnyi bagera kuri 25 ari bo biteganyijwe ko bazahugurwa mu bijyanye no kwiyereka “Taoulu” n’ibindi bijyanye n’umukino wa Kung Fu Wushu.

Aya mahugurwa azanahuzwa n’igitaramo   cyo kwizihiza isabukuru y’imyaka 70  ya Repubulika ya  rubanda  rw’Abashinwa ( People’s Republic of China) kizabera muri Kigali Convention Center tariki 15 Nzeri 2019.

Aba batoza baje mu Rwanda ku bufatanye  bwa RKWF n’ihuriro  ry’abaturage ba Henan ritsura umubano n’ibihugu by’amahanga “ Henan People’s Association for Friendship with Foreign Countries”  binyujijwe muri Ambasade y’u Bushinwa mu Rwanda.

Yang Tianyu na Chen Liwei, abatoza bavuye mu Bushinwa baje guhugura abatoza mu Rwanda

Aba batoza bakigera mu Rwanda bakiriwe n’abayobozi batandukanye mu ishyirahamwe ry’umukino wa Kung Fu Wushu

TANGA IGITEKEREZO

Leave a Reply

Your email address will not be published. Required fields are marked *