27°C , Partly sunny | Kigali-Rwanda
Icyamamare mu mukino wa Kung Fu no gukina filimi, Jackie Chan ari kumwe n'abana bo mu Rwanda

Kung Fu : Abana bitabiriye iserukiramuco mu Bushinwa babonanye  n’icyamamare  Jackie Chan

Yanditswe na BUGINGO FIDELE               

Ku ya 22-01-2019 saa 15:31:09

Perezida w’ishyirahamwe ry’umukino wa Kung Fu Wushu mu Rwanda  “RKWF”, Uwiragiye Marc wari wagiye ayoboye  itsinda ryari rigizwe n’abakinnyi bakiri bato 15 mu Bushinwa mu iserukiramuco “Global Spring Festival 2019” yatangaje  ko  aba bana bahuye imbonankubone n’icyamamagare mu mukino wa Kung Fu akaba anakina filime,  Chan Kong-Sang   uzwi  nka Jackie Chan.

Icyamamare mu mukino wa Kung Fu no gukina filimi, Jackie Chan ari kumwe n’abana bo mu Rwanda

Ibi birori by’iserukiramuco byabereye  mu mujyi wa Changsha  mu ntara ya Hunan  tariki 18 Mutarama 2019.   Abakinnyi  bari bitabiye  ibi birori ubwo bagarukaga mu Rwanda tariki 20 Mutarama 2019,  Perezida wa RKWF, Uwiragiye Marc yatangaje  bagize urugendo rwiza.

Yavuze ko bavuye mu Rwanda  tariki 13 Mutarama 2019 n’indege ya Qatar Airline bakagera hariya tariki 14 Mutarama 2019 aho bahise batangira kwitoza ibyo bazakina muri ibi birori  b’iserukiramuco byahuriranye  n’itangira ry’umwaka wa 2019  mu Bushinwa.

Uwiragiye avuga ko   abana bakinnye maze mu gusoza bakira icyamamagare muri uyu mukino akaba anakina filimi, Jackie Shan winjiye  afite amatsiko yo gusuhuza no kuganira n’Abanyarwanda.

Nyuma yo kwiyereka bafashe ifoto hamwe n’abana bo mu Bushinwa

Ati “Abana bacu ni bo bagiye kumusanganira aho yinjiriye aganira nabo. Byabaye byiza kandi ni intambwe nziza turimo gutera mu mukino wacu”. Akomeza avuga ko ibi byateye imbaraga n’ishyaka aba bana b’u Rwanda  ryo gukina uyu mukino batera ikirenge mu cya Jackie Shan.

Abana bo mu Rwanda mbere yo kwiyereka

Hari ibyo u Rwanda rwungutse

Aba bakinnyi 15 bari mu kigero k’imyaka 7 na 21, Perezida wa RKWF, Uwiragiye Marc yavuze ko muri uru rugendo bungutse byinshi  kuko  babonye uko abana b’abashinwa bitoza . Ati “Natwe byaduhaye  igitekerezo y’icyo tugomba gukora kuko kwigana  ibyiza ntako bisa”.

Aba bana bari baserukiye u Rwanda bakoze imyiyereko ya Kung Fu bari kumwe n’ab’Abashinwa

Indi nyungu ni uko  igihugu  cy’u Rwanda cyarushijeho  kumenyekana kuko byari ibirori byiza byitabiriwe n’abantu batandukanye. Uwiragiye akaba yaravuze ko u Rwanda ari cyo gihugu cyonyine cy’Afurika cyari kitabiriye ibi birori.

Ati “Kuba ari twe twatumiwe muri Afurika  twabyakiriye neza kandi  byatweretse ko hari aho tugeze muri uyu mukino.  Byaturutse rero  ahanini ku irushanwa ryo kwibuka twateguye muri 2018 kuko benshi baratubazaga bati ni mwe mwatsinze Zambia?,  bivuze ko hari ikintu abantu bamenye”.

Yakomeje avuga ko  ishyirahamwe ry’umukino wa Kung Fu ku isi  bahise bashyira iri rushanwa ku ngengabihe y’amarushanwa mpuzamahanga.

Abana bari bitabiriye iri serukiramuco

Aba bana 15 barimo abahungu  11  ari bo  Iragena Steven, Cyuzuzo Yvan, Kayumba Hero, Kwizera Claudien, Niragire Idrisa, Izihirwe Majibu Amicus, Tuyishime Jean Aime, Iradukunda Pacifique, Nkomejegusenga Simon, Iranzi Amri Nuhu na Iradukunda Chance. Abakobwa ni 4 ari bo  Ishimwe Sarah, Murungi Aliance Nadi , Ishimwe Zulfati na Mwubahamana Liliose.

Ubwo bari bagarutse mu Rwanda

Bageze mu Rwanda bakiriwe n’ababyeyi babo

TANGA IGITEKEREZO

Leave a Reply

Your email address will not be published. Required fields are marked *