17°C , Mostly cloudy | Kigali-Rwanda
Itsinda ry'abana bakina Kung Fu ubwo bari bahagurutse mu Rwanda berekeje mu Bushinwa

Kung  Fu: Abana 15 bagiye mu Bushinwa kwitabira  iserukiramuco

Yanditswe na BUGINGO FIDELE

Ku ya 14-01-2019 saa 21:20:18

Tariki 13 Mutarama 2019 ni bwo itsinda ry’abakinnyi 15 bakina umukino wa Kung Fu   n’ababaharekeje bahagurutse mu Rwanda berekeje mu Bushinwa  mu mujyi wa Changsha  mu ntara ya Hunan aho bagiye kwitabira isurukiramuco.

Ibi birori by’iserukiramuco “Global Spring Festival 2019” bizaba tariki 18 Mutarama 2019. Perezida w’ishyirahamwe ry’umukino wa Kung Fu Wushu mu Rwanda  “RKWF” akaba ari nawe wagiye ayoboye iri tsinda, Uwiragiye Marc yatangaje ko  bagiye ku butumire bwa Televiziyo ya hariya yitwa  Hunan Satellite TV”. Ati “Bari batumiye abakinnyi 20 ariko tuza kwemeranywa 15 ari nabo tujyanye”.

Uwiragiye yavuze ko muri ibi birori bizaba tariki 18 Mutarama 2019 bizagaragaramo abakinnyi bo mu Bushinwa bazahura n’aba bakinnyi bo mu Rwanda ndetse n’ab’ahandi bafite aho bahuriye n’Ubushinwa cyane cyane abakina uyu mukino wa Kung Fu ufite inkomoka muri iki gihugu.

Yakomeje avuga ko hari byinshi bazunguka kuko Ubushinwa  buri ku rwego rwo hejuru bityo gukina nabo bikaba bituma abakinnyi babigiraho byinshi bizabafasha kuzamura urwego rwabo.

Aba bana bagiye muri iri serukiramuco mu Bushinwa bari mu kigero k’imyaka 7 na 21. Umwe muri aba bana witwa Ishimwe Sarah ufite imyaka 14  akaba akomoka i Musanze yavuze ko bagiye mu irushanwa yitwara neza bamwadika mu bazajya mu Bushinwa. Yemeza ko  bizamufasha kuzamura urwego rwe.

Abana 15 bagiye mu iserukiramuco mu Bushinwa

Aba bana 15 barimo abahungu  11  ari bo  Iragena Steven, Cyuzuzo Yvan, Kayumba Hero, Kwizera Claudien, Niragire Idrisa, Izihirwe Majibu Amicus, Tuyishime Jean Aime, Iradukunda Pacifique, Nkomejegusenga Simon, Iranzi Amri Nuhu na Iradukunda Chance. Abakobwa ni 4 ari bo  Ishimwe Sarah, Murungi Aliance Nadi , Ishimwe Zulfati na Mwubahamana Liliose.

Mbere y’ibi birori aba bakinnyi bakaba barimo gukora imyitozo nyuma y’ibirori bizaba tariki 18 Mutarama 2019 iri tsinda rizagaruka mu Rwanda tariki 20 Mutarama 2019.

Itsinda ry’abana bakina Kung Fu ubwo bari bahagurutse mu Rwanda berekeje mu Bushinwa

Ubwo abana bahabwaga ubutumwa n’umuyobozi w’ikigo cya Confucius Institute

 

Abana n’ababahekereje ubwo bafataga ifoto y’urwibutso

Abana bari baherekejwe n’ababyeyi

TANGA IGITEKEREZO

Leave a Reply

Your email address will not be published. Required fields are marked *