27°C , Partly sunny | Kigali-Rwanda

“Kugira indirimbo nziza si ukuririmba urukozasoni”

Yanditswe na Gisubizo Gentil M.

Ku ya 12-08-2020 saa 15:20:38
Confy afite ikizere cy'ahazaza ha muzika ye

Munyaneza Confiance ukoresha amazina ya ‘Confy’ mu muziki abona kuri we, kuririmba indirimbo zamamaza ibikorwa by’urukozasoni atari byo bitera indirimbo gukundwa, nubwo muri iyi minsi bisa n’ibigezweho.

Confy ni umuhanzi uri mu banyempano bakizamuka. Mu kiganiro yagiranye n’Imvaho Nshya, yakomoje ku kuba abahanzi bo mu Rwanda bakwiye gutanga ubutumwa bwubaka sosiyete nyarwanda mu ndirimbo zabo.

Yagize ati: “Umuhanzi ni nk’indorerwamo rubanda birebamo, iyo utanze ubutumwa runaka mu bihangano byawe bushobora kubaka cyangwa bugasenya sosiyete bitewe n’ikintu runaka cyatumye uhimba iyo ndirimbo. ku bwange mbona kuririmba ibishegu (amagambo y’urukozasoni) ntaho twaba tuganisha umuryango mugari w’Abanyarwanda uba uduhanze amaso.”

Confy uri mu bahanzi batanga ikizere k’ejo hazaza, yatangiye umuziki mu mwaka wa 2015, ariko akomwa mu nkokora no kubura ubujyanama bidindiza iterambere rye.

Confy umuhanzi ukizamuka wifuza kurenza muzika ye imbibi

Mu nzozi afite, yumva atazigera acika intege kubera urukundo afitiye umuziki.

Ati: “Nagize ikibazo cyo kubura umujyanama (Manager) wamfasha kuzamura impano yange no kuyimenyekanisha, hari umwe mu bakomeye hano mu Rwanda, nahamagaye bucya yakumiriye (Block) nimero yange ndetse n’ubutumwa kuri WhatsApp. Gusa ntibyigeze binca intege ahubwo byanyeretse ko ngomba gukorana umuhate nkamenyekanisha ibikorwa byange.”

Yongeyeho ko abajyanama (Managers) bakwiye kujya bita ku mpano iri mu muntu batitaye ku wo ari we, ko ikimurimo kiba gisumba kure nyir’ubwite.

Ati: “Abajyanama hari igihe ubagana ugasanga baguciye amazi kubera uko umeze, batitaye ku mpano ikurimo kandi nyamara wenda wifitimo ikiruta cyane uko uri, ikindi navuga ni uko n’abashoramari bakwiye gushora amafaranga mu muziki wacu, kuko bimaze kugaragara ko umaze gutera imbere bikomeye; ibyo utabibona yaba yigiza nkana.”

Confy yifuza kuzaba umuhanzi mpuzamahanga, intego ye ni ukuririmba ubutumwa bufite icyo bumariye sosiyete nyarwanda, buha ikerekezo kiza urubyiruko rw’u Rwanda.

Uyu muhanzi amaze gukora indirimbo zirindwi (7) ebyiri muri zo zifite amashusho, muri izi ndirimbo harimo iyitwa ‘Wowe’ ari na yo yahereyeho atangira kuririmba kinyamwuga. Afite kandi ‘That’s Why’, ‘Shenge’, ‘No Bad’ ndetse na ‘Bae’ imaze umunsi umwe isohotse.

Umwanditsi:

Gisubizo Gentil M.

2 Comments on ““Kugira indirimbo nziza si ukuririmba urukozasoni””

  1. Ndumva uyu musore afite vision nziza nakomerezaho ibyiza birimbere . ba promoters mwitaye kurubyiruko nkuru nimkumga nziza muri muika nyarwamda

    Yes you can comfy……. Courage

Tanga Igitekerezo

Email yanyu ntigaragazwa ku rubuga. Amazina na Email ni ngombwa.