17°C , Intermittent clouds | Kigali-Rwanda
Igaburo rya saa sita ryafashije abanyeshuri biga muri Gahunda y'uburezi bw'ibanze bw'imyaka 9 na 12

Kugaburira abana ku mashuri byongereye imitsindire muri 9 YBE

Yanditswe na MUGISHA BENIGNE

Ku ya 12-01-2018 saa 07:54:12

Minisiteri y’Uburezi iratangaza ko gahunda yo kugaburira abana ku mashuri yongereye ikigero k’imitsindire y’abanyeshuri mu mashuri y’uburezi bw’ibanze bw’imyaka 9.

Ibi ni ibyatangajwe na Munyakazi Isaac, Umunyamabanga wa Leta muri Minisiteri y’Uburezi (MINEDUC) ushinzwe amashuri abanza n’ayisumbuye, ubwo hari mu muhango wo gushyira ahagaragara amanota y’ibizamini bya Leta by’ikiciro rusange n’amashuri abanza, wabereye ku kiciro k’iyi Minisiteri giherereye ku Kacyiru, tariki ya 09 Mutarama 2018.

Igaburo rya saa sita ryafashije abanyeshuri biga muri Gahunda y’uburezi bw’ibanze bw’imyaka 9 na 12

Munyakazi yagize ati “Biragaragara ko abanyeshuri biga muri gahunda y’uburezi bw’imyaka 9 bongereye ikigero k’imitsindire mu bizamini bya Leta, iri terambere mu mitsindire riraturuka no kuri gahunda ya Leta yo kugaburira abana ku ishuri ifunguro rya saa sita kuko yagabanyije ingendo bakoraga bajya gufata amafunguro, kongeraho abigaga basinzira mu ishuri nyuma ya saa sita bitewe n’uko batabonye amafunguro kuko bataha kure.”

Akomoza kuri iyi gahunda y’uburezi, Munyakazi yagaragaje ko itashyiriweho abana b’abakene cyangwa b’abaswa, ko ahubwo ari gahunda ya Leta yorohereza abanyeshuri kwiga hafi y’iwabo bataha iwabo, aboneraho umwanya wo gusaba abantu bagifite imyumvire nk’iyo kuyihindura kuko Leta ikeneye ko uburezi bw’abana b’u Rwanda butera imbere, abana bose bakiga nta we uhejwe.

Yagize ati “Amashuri yo muri gahunda y’uburezi bw’imyaka 9 na 12 yoherezwamo abarimu na Leta nk’uko ibikora mu mashuri yayo acumbikira abanyeshuri, bahabwa ubufasha na Leta mu kugaburira abana ku mashuri nk’uko buhabwa n’ibindi bigo bya Leta bicumbikira abanyeshuri, nta mpamvu n’imwe rero yatuma aba bana badatsinda kandi neza.”

Gasana Janvier, ni umuyobozi mukuru w’Ikigo k’igihugu cy’uburezi (REB), na we yasobanuye ko amashuri ya Leta yose angana imbere yayo nk’uko abana bose bangana imbere y’umubyeyi.

Yagaragaje ko imitsindire y’amashuri yo muri gahunda y’uburezi bw’ibanze bw’imyaka 9 na 12 itanga ikizere ku Banyarwanda kuko biga neza nk’abandi, bagahabwa ibikenerwa byose ndetse bakaba banashoboye kimwe n’abandi biga mu mashuri acumbikira abanyeshuri.

Gasana yihanangirije buri wese ushaka gutandukanya aya mashuri n’andi ya Leta acumbikira abana, avuga ko yose ari amashuri kimwe kandi ko ibyo biga ari bimwe ko n’abarezi babigisha bafite ubushobozi kimwe.

Gasana yibukije ko mu mashuri abana basabamo imyanya n’amashuri y’uburezi bw’imyaka 9 na 12 arimo, ndetse anavuga ko nta we ukwiye gutungurwa n’uko ahawe umwanya muri aya mashuri kuko nayo arimo amashami abanyeshuri bakunze kandi biga.

Ati “Ntihazagire umunyeshuri utungurwa n’uko ahawe umwanya muri amwe mu mashami ari mu mashuri y’uburezi bw’ibanze bw’imyaka 9 na 12, nayo ni amashuri kimwe n’andi kandi afite ubushobozi, abarimu ndetse abayigamo baratsinda kimwe nk’abandi.”

Yaba Umunyamabanga wa Leta muri Minisiteri y’uburezi ushinzwe amashuri abanza n’ayisumbuye, yaba umuyobozi mukuru wa REB, bose bemeza ko kugaburira abana mu mashuri y’uburezi bw’ibanze bw’imyaka 9 na 12 byatangiye kugaraza umusaruro mu mitsindire y’abanyeshuri bayigamo mu bizamini bya Leta.

TANGA IGITEKEREZO

Leave a Reply

Be the First to Comment!

avatar