27°C , Mostly cloudy | Kigali-Rwanda
Ingabire Gashagaza Solange uvuga ko nta kigomba kubuza umukobwa gukora siporo ku rwego rwo hejuru

Kubyara ntibikwiye kubuza umugore gukora siporo ku rwego rwo hejuru-Ingabire

Yanditswe na BIZIMANA ERIC

Ku ya 12-03-2018 saa 07:55:25

Ingabire Gashagaza Solange, umukinnyi w’ikipe y’igihugu y’u Rwanda   muri  Karate arasaba abakobwa kudasubira inyuma cyangwa se ngo bahagarike gukina ku rwego mpuzamahanga nyuma yo gushaka no kubyara.

Ingabire Gashagaza Solange uvuga ko nta kigomba kubuza umukobwa gukora siporo ku rwego rwo hejuru

Ibi arabitangaza nyuma yo kubyara umwana wa mbere, aho Ingabire abifashijwemo n’umugabo we akomeje imyitozo izamufasha kugaragara mu ikipe y’igihugu izakina  shampiyona y’Afurika  muri Karate « African Karate Championship 2018 » izabera mu Rwanda  kuva  tariki  28 Kanama kugeza  02 Nzeri 2018 akaba akina ibijyanye no kurwana “Kumite” mu batarengeje ibiro 68.

Ubuhamya bw’uyu mubyeyi watwaye umudali wa Bronze muri shampiyona y’Afurika ya 2014 n’ishyaka ryo kongera kuba umukinnyi ukomeye ni urugero ku bakobwa  bareka  gukina imikino bakundaga nyuma yo kuba abagore.

Ingabire ni muntu ki?

Ingabire Gashagaza Solange yavukiye mu Murenge wa Gasaka mu Karere ka Nyamagabe tariki 05 Kanama mu 1994.

Ni umwana wa kabiri mu muryango w’abana batatu (abahungu babiri n’umukobwa umwe) ba Mukarwego Francine na nyakwigendera Gashagaza Gaspard.

Yize mu ishuri ribanza rya EP Gikongoro kuva mu 2001 kugeza mu 2006; yakomereje kuri  GS ACEPR mu mwaka wa mbere mbere yo kujya muri EP Ngara i Nyamagabe. Ikiciro cya kabiri cy’amashuri yisumbuye yakigiye kuri ES Sumba i Nyamagabe, yiga Kaminuza muri Kampala International University muri Uganda ahawe buruse nk’umwana ugaragaza impano mu mikino.

Muri Kanama 2017, Ingabire yashakanye na  Nshyimyumuremyi Augustin bakaba bamaze kubyarana umwana  w’umuhungu.

Yagiye muri Karate ashaka gukubita umukobwa biganaga

Ingabire avuga ko yagiye muri Karate ashaka kwihorera ku mukobwa biganaga wakundaga kumwiyenzaho bakiri mu mwaka wa mbere w’amashuri yisumbuye birangira atwawe nayo. Aho yazamuwe na Mwizerwa Dieudonne wari umutoza we ubu akaba ari umusifuzi mpuzamahanga muri Karate.

Ingabire Gashagaza Solange (hagati) ubwo yegukanaga umudali wa zahabu muri shampiyona y’igihugu

Ati ”Uwo mukobwa nashakaga kuzamukubita kuko yakundaga kuncaho akanyanduranyaho, ariko nkitonda kuko natinyaga ko yaba andusha imbaraga. Nahisemo kujya muri Karate kugira ngo nzamukubite neza neza , ntazantsinde. Nabajije icyo bisaba kwiga Karate barambwira ngo ni ubuntu, ntangira ubwo , gusa wa mwana twaje gutandukana ngiye mu mwaka wa kabiri (ntanamukubise ) kuko icyari kinjyanyemo ntagikomeje nagezemo ndushaho kuyikunda mbigira umukino mu gihe numvaga nziga udutekinike duke nkagaruka mpangana nawe”.

Kimwe na bagenzi be bari babikunze, Ingabire yinjiye mu ikipe ya Karate ya Nyamagabe atangira kuzamuka mu marushanwa  ahuza amashuri (Interscolaire), aza kwinjira mu ikipe y’igihugu mu 2013.

Yaje kuvamo umukinnyi utwara imidari muri Afurika

Ajya kumenyekana mu 2013, Ingabire yatsinze Kabera Reheema wari nimero ya mbere muri Karate y’abagore mu Rwanda abantu batabikeka binamuviramo guhamagarwa mu ikipe y’igihugu y’abatarengeje imyaka 19.

Muri uyu mwaka yitabiriye shampiyona y’Afurika mu batarengeje imyaka 19 yabereye muri Tunizia maze yegukana umudali wa Bronze amaze guhura  n’umunya Misiri ku mukino wa mbere n’ umunya Cote d’Ivoire abifashijwemo na Rurangayire Guy wari wungirije Umurusiya mu ikipe y’igihugu. Nyuma yitabiriye shampiyona y’isi yabereye muri Espagne ariko ntiyegukana umudali.

Muri Kampala University, Ingabire yagiye yitabira amarushanwa atandukanye ahuza za kaminuza muri Uganda naho akitwara neza.

Muri 2014   Ingabire  yitabiriye shampiyona y’Afurika mu bakuru  yabereye muri Senegal ari nayo ikipe y’u Rwanda iherukamo «African Karate Championship 2014 »  aho  yegukanye   umudali wa Bronze.

Ingabire yagize  ati “Mu  shampiyona y’isi  ntibiba byoroshye kuko uhurirayo n’abantu baba bamaze imyaka ibiri bitegura ukabona ntimuri ku rwego rumwe. Ikindi kigora usanga habamo imikino myinshi, niba nko muri shampiyona y’Afurika  mukina imikino ine mwagera muri shampiyona y’isi  ugasanga uzakina imikino 8 cyangwa 10, ibyo birakugora”.

Ingabire  wanitabiriye imikino y’Afurika “All African Games 2015” yabereye  muri Congo Brazaville, ku bw’amahirwe make ntiyabasha kubona umudari nyuma yo gusa n’urengwa n’uko yari agiye gutsinda umwarabu.

Yagize  ati “Ibyabaye muri All African Games 2015  n’ubu sindabyumva neza. Nge natsinze  umunya Algeria ku busa, ariko nkiyumvisha ko bidashoboka  kuko twemera ko ari bo ba mbere muri Afurika bazi Karate, byarandenze kandi umukino utararangira, yarangarukanye, aranzamukana turanganya aranantsinda. N’Umunya Misiri twahuye bwa nyuma arantsinda mbura umudali nawurebaga”.

Aha Matoub Lampya wo muri Algeria  niwe waje kwegukana umudali wa Zahabu naho Abdelsalam Radwa wo mu Misiri  yegukana umudali wa Bronze.

Kubyara ntibivuze kureka Siporo wakundaga

Ingabire Gashagaza Solange  avuga ko kubyara atari impamvu ku bagore  bakinaga ku rwego rwo hejuru. Ati “Nge nshaka gusubiramo cyane kuva ubu mfite umuryango wange. Umugabo azi neza ko  mbikunda ni nayo mpamvu yampaye uburenganzira bwo gusubira muri siporo.Ubu nge ndi gukora imyitozo nyuma yo kubyara kandi niteguye no kuzagaragara mu ikipe y’igihugu umutoza naramuka ampamagaye”.

Ashingiye ku myitozo amaze iminsi akora yizeza abantu ko azagaragara mu bakinnyi b’ikipe y’igihugu bazakina  shampiyona y’Afurika u Rwanda ruzakira. Ati ”Nge ntuye hafi yaho nize kandi hasanzwe hari ikipe ya Karate nkoreramo, dukora buri munsi, kandi nshaka umwanya ntibagiwe inshingano zo kwita ku muryago wange. Ndumva nifitemo imbaraga n’ikizere cyo kuzatsinda amajonjora yo muri uku kwezi kwa Kane  yo kuzashaka abakinnyi bazakina  shampiyona  y’Afurika. Ubwo umutoza nabona mfite ubushobozi nk’uko njye mbyiyumvamo nzakomeza kandi nange mbyiyumvamo”.

Ingabire yanzura asaba abagore kutareka Siporo babitewe no kubyara cyangwa se no gushaka. Ati “Ndabwira abagore cyane cyane abari abakinnyi bakomeye, siporo ihoraho. Nge nababwira nti niba mwarakoze siporo muyikunze kandi ikaba ari ubuzima mugomba kuyikomeza kuko nta gihinduka ngo ni uko wabyaye. Ikindi abana bakuze babona ukina, bituma nabo babikunda, bikaba uruhererekane. Nge nababwira ko kubyara no gushaka ntaho bihuriye no kureka siporo”.

 

TANGA IGITEKEREZO

Leave a Reply

Be the First to Comment!

avatar