Kubungabunga ibishanga bizageza u Rwanda ku Cyerekezo 2050

Yanditswe na Imvaho Nshya

Ku ya 02-02-2021 saa 14:40:40

Mu gihe kuri uyu wa Kabiri tariki ya 2 Gashyantare 2021, u Rwanda rwifatanyije n’Isi yose kwizihiza Umunsi Mpuzamahanga wahariwe ibishanga, Abanyarwanda bibukijwe ko kubibungabunga bizagira uruhare mu kurwanya ubukene no gufasha Igihugu kugera ku ntego z’Icyerekezo 2050.

Mu ntego z’Icyerekezo 2050, biteganyijwe ko u Rwanda ruzaba mu bihugu bifite iterambere ritabangamiye ibidukikije kandi ryihanganira imihindagurikire y’ibihe, aho rutazaba rukibarirwa mu bihugu bifite ubukungu buciriritse.

Ubwo yafunguraga ibiganiro byateguwe mu rwego rwo kwizihiza uwo munsi wizihijwe hifashishijwe ikoranabuhanga, Minisitiri w’Ibidukikije Dr. Mujawamariya Jeane D’Arc, yashimangiye ko amazi, ibishanga n’ubuzima bidashobora gutandukana.

Muri ibyo biganiro byitabiriwe n’abarenga 130, yavuze ko insanganyamatsiko y’uyu munsi igira iti: “Tubungabunge Ibishanga Twita ku Mutungo Kamere w’Amazi,”  yibutsa abatuye Isi ko bugarijwe n’ikibazo cy’amazi gihangayikishije ubuzima bwose ku mubumbe.

Yagize ati: “Dukwiye kuzirikana ko nta watandukanya ibishanga, amazi n’ubuzima. Ibishanga n’amazi mu gihugu cyacu tubihozaho ijisho, ndetse ibishanga byinshi bifitanye isano n’imigezi ndetse n’ibiyaga. Kubungabunga ibishanga ni ingenzi mu kugabanya ubukene no guharanira iterambere ritangiza ibidukikije nk’uko bikubiye mu ntego z’Icyerekezo 2050 cy’Igihugu cyacu.”

35% y’ibishanga byarakamye guhera mu 1970

Minisitiri Dr. Mujawamariya yahishuye ko guhera mu mwaka wa 1970 ibishanga bibarirwa ku kigero cya 35% byakamye, bityo ku ya 2 Gashyantare buri mwaka ukaba ari umunsi Isi yibukaho itariki yasinyiweho  amasezerano yo kubungabunga ibishanga yasinyiwe i Ramsar muri Iran mu mwaka wa 1971.

Yakomeje agira ati: “Twizihiza Umunsi Mpuzamahanga w’Ibishanga tugamije gukangurira abatuye Isi kuzirikana agaciro k’ibishanga ku bantu no ku mubumbe. Isanganyamatsiko y’uyu mwaka iradukangurira kuzirikana akamaro n’agaciro k’ibishanga mu kubika amazi meza. Ibishanga bibika kandi bikanayungurura amazi, birinda imyuzure kandi bifasha mu guhangana n’ingaruka z’imihindagurikire y’ibihe. Reka twirinde kubyangiza no kubyanduza mu kwirinda ingaruka byagira ku buziranenge bw’amazi no ku ngano yayo.”

Minisitiri w’Ibidukikije Dr. Mujawamariya Jeanne d’Arc

Yakomeje avuga ko nubwo bifitiye rubanda akamaro gakomeye, usanga ikigero ibishanga bikamamo cyangwa bikangirika gikubye inshuro eshatu icyo amashyamba yangirikamo, ari na yo mpamvu mu myaka 51 ishize hamaze kuzima ibishanga ku kigero cya 35%.

Ibyo u Rwanda rwagezeho mu kubungabunga ibishanga

Minisitiri Dr. Mujawamariya yavuze ko ibikorwa by’ingenzi u Rwanda rumaze kugeraho mu kubungabunga ibishanga ari ugutunganya igishanga cya Rugezi n’icya Nyandungu byari byaratangiye kwangirika no kwimura inganda, inzu z’ubucuruzi n’izo guturamo zubatswe mu bishanga.

Mu guharanira imikoreshereze myiza y’ibishanga, u Rwanda rwashyizeho amategeko n’amabwiriza bigenga imikoreshereze yabyo arimo Iteka rya Minisitiri w’Intebe ryerekana urutonde rw’ibishanga n’uburyo bwihariye bwo kubitunganya, itegeko rigenga ibidukikije mu Rwanda ndetse n’Igishushanyo Mbonera cy’imikoreshereze y’ibishanga mu Mujyi wa Kigali.

Minisitiri Dr. Mujawamariya yagize ati: “Ibishanga biracyahura n’imbogamizi zirimo imikoreshereze y’ifumbire n’imiti yica udukoko byifashishwa mu buhinzi, isuri, ubucukuzi bwa Nyiramugengeri, ubucukuzi bw’amabuye y’agaciro butemewe, ibikorwa remezo bitemewe n’imyanda iva mu nganda.”

“[…] Ni muri urwo rwego hakenewe gukomeza gushyira mu bikorwa ingamba zifatika mu gufasha ibishanga gukora ibyo bigenewe gukora no gutanga serivisi zijyanye no kubungabunga ubuzima bwa muntu n’urusobe rw’ibinyabuzima muri rusange.

Yashimye Inzego zitandukanye zigira uruhare mu guharanira ko ibidukikije n’umutungo kamere by’umwihariko bikomeza kubungabungwa no kurindwa, harimo inzego za Leta, iz’abikorera n’imiryango itegamiye kuri Leta.

By’umwihariko yashimiye Abanyarwanda muri rusange ku ruhare rushimishije bagira mu kubungabunga ibidukikije, anibutsa abagifite inyubako n’ibindi bikorwa mu bishanga kubyimura mu maguru mashya kugira ngo bitange umusaruro byitezweho wo gusigasira ubuzima no guhangana n’imihindagurikire y’ibihe.

Yavuze ko nubwo umunsi mpuzamahanga w’uyu mwaka wizihijwe mu bihe bitoroshye byo kwirinda ikwirakwira ry’icyorezo cya COVID-19, byagaragaje ko icyo cyorezo gifite aho gihurira n’isano umuntu afitanye n’ibidukikije birimo kwanduza umwuka ahumeka, no kudacunga neza imyanda.

Kabera Juliet, Umuyobozi w’Ikigo cy’Igihugu gishinzwe kubungabunga Ibidukikije (REMA), yavuze ko  nta wakwirengagiza uruhare rw’ubuyobozi bukuru bw’Igihugu ndetse na Politiki zihamye zashyiriweho gushyigikira gahunda zo kubungabunga ibishanga n’umutungo kamere w’amazi mu Gihugu hose.

Yashimangiye ko iyo ari yo ntandaro y’ibyagezweho byose mu rugendo rwo guharanira iterambere ritangiza ibidukikije, ndetse akaba ari n’umusingi w’ibiteganyijwe gukorwa ku bufatanye n’abafatanyabikorwa batandukanye.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.