21°C , Partly sunny | Kigali-Rwanda

Kuba Afurika yarasigaye inyuma tugomba gukora vuba-Kagame

Yanditswe na MUGABO LAMBERT

Ku ya 08-05-2018 saa 05:44:12

Umukuru w’Igihugu Paul Kagame, atangaza ko kuba Afurika yarasigaye inyuma bizwi kuva kera, abantu badakwiye guhora babivuga nk’aho bishimishije, ahubwo bikwiye kuba impamvu yo gukora vuba.

Ibi Perezida Paul Kagame yabivuze ku munsi w’ejo hashize ku ya 7 Gicurasi 2018 ubwo yasozaga Inama ya Komisiyo y’Umurongo Mugari wa Interineti yaberaga i Kigali.

Perezida Paul Kagame nyuma yo gutangiza inama ya Komisiyo y’Umurongo mugari wa Interineti ari kumwe n’abayitabiriye

Mu ijambo rye, Kagame akaba yaragize ati “Kuba Afurika yarasigaye inyuma ni byo ariko kandi turabizi kuva kera. Tuzi impamvu ndetse tuzi n’igikenewe kugira ngo ibi bihinduke”.

Umukuru w’Igihugu yavuze ko atari ibyo guhora abantu basubiramo kuko bidashimishije. Aha yagize ati “Kuba twarasigaye inyuma nta bwo twahora tubivuga nk’aho bishimishije. Tugomba kumva ko ari impamvu yo gukora vuba, ndetse ko tutabigeraho nk’Afurika twenyine, ahubwo ko dukeneye gufatanya n’abandi tukagera aho dushaka”.

Kagame akaba avuga ko Abanyafurika bagomba kwireba nk’abantu bafite ubushobozi kuko hari icyo bageraho. Ati “Tugomba kwireba nk’abantu bifitemo ubushobozi, tukongera imbaraga kugira ngo tugeze imiryango yacu, abaturage bacu n’Isi muri rusange aho dushaka”.

Kagame akaba yaravuze ko ITU (Umuryango Mpuzamahanga w’Itumanaho) n’Umuryango w’Afurika Yunze Ubumwe (AU) bafatanyije n’abikorera bazakomeza gukorana cyane kugira ngo intego z’iyi Komisiyo y’Umurongo Mugari wa Internet zigerweho.

Ati “Gutera ingabo mu bitugu izi mbaraga bizafasha mu gukuraho icyuho tugifite muri Afurika binyuze mu kumenya neza ibikenewe kugira ngo umuyoboro mugari wa internet ugere mu mashuri ndetse no ku baturage batandukanye muri Afurika”.

Akaba avuga ko ibi bizafasha no mu gushimangira intego za ‘Smart Africa’ ari zo Internet kuri bose no muri byose, n’Uburezi kuri bose.

TANGA IGITEKEREZO

Leave a Reply

Your email address will not be published. Required fields are marked *