27°C , Mostly cloudy | Kigali-Rwanda

Ku myaka 70, Prof. Nkusi Laurent yapfuye azize uburwayi

Yanditswe na Imvaho Nshya

Ku ya 18-05-2020 saa 06:42:25

Prof. Nkusi Laurent wari umuhanga mu ndimi, akaba yarakoze imirimo inyuranye harimo kuba umwe mu bagize Guverinoma ndetse n’Umusenateri mu Nteko Ishinga Amategeko, yitabye Imana azize uburwayi mu rukerera rwo kuri uyu wa mbere tariki ya 18 Gicurasi 2020.

Amakuru yazindutse akwirakwira mu gitondo ni uko Prof. Nkusi yaguye mu Bitaro byitiriwe Umwami Fayisali biherereye ku Kacyiru mu mujyi wa Kigali, nyuma y’igihe gito yizihije isabukuru y’imyaka 70 y’amavuko kuko yavutse tariki 20 Werurwe 1950.

Bivugwa ko Prof Laurent Nkusi yashizemo umwuka mu masaha ya saa munani z’urukerera rwo kuri uyu wa Mbere,  aho yari arwariye nk’uko umwe mu bo mu muryango we yabitangarije itangazamakuru.

Prof Laurent Nkusi yari umwarimu n’umushakashatsi w’inararibonye. Yigishije mu cyahoze ari Kaminuza Nkuru y’u Rwanda kuva mu 1976 kugeza muri 2000, aba umuyobozi mu mashami yayo atandukanye, ndetse aba n’Umuyobozi w’Urwego rw’Ubushakashatsi.

Uyu yari akigisha nk’umwarimu udahoraho muri Kaminuza y’u Rwanda no mu zindi zitandukanye, akigisha iyigandimi, isesenguranyandiko, iyigamwuga n’iyigarutonde, ndetse n’amasomo ajyanye n’ihakana n’ipfobya rya Jenoside.

Prof Nkusi wari ufite impamyabumenyi y’ikirenga mu by’indimi n’ubumenyamuntu, yabaye Minisitiri muri Leta y’u Rwanda mu gihe k’imyaka umunani.

Kugeza mu mpera za 2019 ubwo yarangizaga manda ye, yari umusenateri mu Nteko Ishinga Amategeko y’u Rwanda, aho yari ahagarariye Abarimu n’Abashakashatsi ba Kaminuza zigenga.

Prof. Nkusi Laurent  yakundaga gusoma cyane, nk’uko byagaragajwe n’ubugenzuzi bwakozwe bukagaragaza ko ari we muntu watiye ibitabo byinshi mu Isomero ry’igihugu kuva ryashingwa mu 2012.

Ni we wayoboye bwa mbere ishuri ry’itangazamakuru n’itumanaho nyuma ya  Jenoside yakorewe Abatutsi ubwo ryashingwaga mu cyahoze ari Kaminuza y’u Rwanda (UNR/NUR).

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.