Ku myaka 55 abaye uwa 125 wishwe na COVID-19 mu Rwanda

Yanditswe na Imvaho Nshya

Ku ya 12-01-2021 saa 20:55:21

Kuri uyu wa Kabiri tariki ya 12 Mutarama 2021, Minisiteri y’Ubuzima yatangaje ko habonetse abarwayi bashya 166 b’icyorezo cya COVID-19 batumye umubare w’abamaze gutahurwaho icyo cyorezo ugera ku 9,950 barimo abakirwaye 2,851 n’abamaze kubura ubuzima 125 barimo umugabo w’imyaka 55 wapfuye mu masaha 24 ashize i Kigali.

Impuzandengo y’abamaze guhitanwa n’icyo cyorezo mu Rwanda igeze kuri 1.2%. Minisiteri y’Ubuzima yihanganishije imiryango y’ababuze ababo kubera COVID-19.

Abarwayi bashya babonetse  barimo abo mu Mujyi wa Kigali 108, Huye 18, Kirehe 9, Rwamagana 7, Nyagatare 7, Rubavu 6, Muhanga 6, Nyamasheke 3, Rusizi 1, no mu Karere ka Bugesera 1.

Uyu munsi nta muntu n’umwe wakize bituma umubare w’abamaze gukira uguma ku 6,974 bangana na 70 % by’abamaze gutahurwaho icyo cyorezo mu Rwanda, ahamaze gufatwa ibipimo 771,275 birimo 1,937  byafashwe uyu munsi.

Kuva mu ntangiriro z’ukwezi k’Ukuboza hagiye hagaragara imibare idasanzwe y’abandura ndetse n’abahitanwa na COVID-19, Inzego z’ubuzima zikaba zemeza ko icyo cyorezo kimaze kugira ubukana buteye inkeke mu Gihugu hose.

Abaturage barasabwa kutirara kuko icyorezo kigihari ndetse bigaragara ko imibare y’abandura ku munsi yikubye inshuro ebyiri  iy’abapfa n’abarembye yikuba inshuro enye.

Kuri ubu  mu Rwanda ingendo zirabujijwe guhera saa mbiri z’ijoro kugeza saa kumi za mugitondo, ingendo zihuza Uturere dutandukanye zikaba zibujijwe ndetse n’izihuza Uturere n’Umujyi wa Kigali zirabujijwe, keretse gusa ku mpamvu za serivisi z’ubuzima cyangwa izindi z’ingenzi.

Guhera tariki 5 Mutarama 2020, ibikorwa byose harimo iby’ubucuruzi, resitora, butiki, amasoko n’amaduka (malls and markets) bizajya bifunga saa kumi n’ebyiri za nimugoroba (6:00pm) kugira ngo abantu babashe kubahiriza isaha yo kuba bageze mu ngo zabo.

Abaturarwanda barasabwa kwitwararika no kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Muri Afurika abamaze kwandura COVID-19 bamaze kurenga miliyoni eshatu n’ibihumbi 81.8, barimo abantu barenga miliyoni ebyiri n’ibihumbi 483 bakize, n’abandi basaga ibihumbi 73.4 bahitanywe na cyo. Abamaze kwandura ku Isi barasaga miliyoni 91.7 barimo abasaga  miliyoni 65.6 bakize n’abapfuye barenga miliyoni imwe n’ibihumbi 964.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.