17°C , Intermittent clouds | Kigali-Rwanda

Ku munsi w’Umugore, ‘Imbuto Foundation’ irahemba ‘Inkubito z’Icyeza’

Yanditswe na Mugabo Lambert

Ku ya 07-03-2019 saa 16:52:24
Madame Jeannette Kagame mu bihe byashize

U Rwanda kuri uyu wa Gatanu ruzifatanya n’Isi yose mu kwizihiza Umunsi Mpuzamahanga w’Umugore. Umuryango ‘Imbuto Foundation’ uzahemba abana b’abakobwa “Inkubito z’Ikeza” batsinze neza.

Ku rwego rw’Igihugu, Umunsi Mpuzamahanga w’Umugore uzizihirizwa mu Karere ka Nyamasheke, aho umushyitsi mukuru azaba Madamu Jeannette Kagame, Umuyobozi w’Ikirenga w’Umuryango yashinze wa “Imbuto Foundation”.

Ibiro bya Madamu wa Perezida wa Repubulika, Jeannette Kagame, bivuga ko mu Karere ka Nyamasheke, azahemba abana b’abakobwa batsinze neza 28 mu byiciro bitandukanye by’amashuri, batanu basoje umwaka wa gatandatu w’amashuri yisumbuye, umwe wasoje ikiciro rusange, na 22 basoje amashuri abanza. Ariko muri rusange, mu rwego rw’Igihugu, uyu mwaka, uyu muryango uteganya guhemba abakobwa 234.

Madamu Jeannette Kagame avuga ko kuba “Inkubito y’Icyeza’ atari ukugira ubumenyi gusa, ati “…Mbibutse ko kuba ‘Inkubito y’Icyeza’, atari ukugira ubumenyi gusa, ahubwo bijyana no kugira uburyo n’imitekerereze izana impinduka n’ibisubizo ababyeyi, igihugu cyanyu n’umugabane turimo tubatezeho.”

Umwe mu bahawe igihembo na Madamu Jeannette Kagame, witwa Jeannette Nyiramana, umunyeshuri ufite imyaka 23, avuga ko yahembwe na “Imbuto Foundation” mu 2011, nyuma yo gusoza ikiciro rusange muri ESA Birambo. Ati “Nahoze nifuza guhembwa n’Imbuto Foundation mu mashuri y’ikiciro rusange, kubera ko nagiye mbona kenshi abandi bana b’abakobwa babaye indashyikirwa mu masomo bahabwa ibyo bihembo.”

Nyiramana avuga ko guhabwa igihembo na Jeannette Kagame byamuteye ibyishimo binamutera imbaraga zo gukora kurushaho ngo abone amanota meza azamuhesha ibindi bihembo, kandi yaje kubigeraho. Ati “Nongeye guhembwa n’Imbuto Foundation nk’Inkubito y’Icyeza, nyuma yo gusoza amashuri yisumbuye. Nta bwo byarangiriye aho gusa, kuko byampesheje kubona igihembo cya Nyakubahwa Perezida cyo kwiga amashuri ya Kaminuza muri California Baptist University, aho nize Biomedical Engineering, nkaba narasoje amasomo muri Gicurasi 2018.”

Uyu Nyiramana azakomeza ikiciro cya kabiri muri Kaminuza muri Biomedical Engineering muri Tulane University, ibi bikaba ngo bizamufasha gukomeza kwihugura mu bumenyi ndetse no gufasha igihugu na we ubwe. Ashimira Madamu Jeannette Kagame ku bikorwa by’indashyikirwa akora binyuze mu muryango ‘Imbuto Foundation’.

‘Imbuto Foundation’ imaze guhemba abana b’abakobwa 4,852

‘Imbuto Foundation’ iyobowe na Madamu Jeannette Kagame, yatangiye mu 2005 ubukangurambaga ku burezi bw’umwana w’umukobwa hagamijwe kubashishikariza kujya mu mashuri no gutsinda neza mu myigire yabo.

Iyo gahunda yari igamije kandi gukangurira umuryango nyarwanda, ababyeyi, abarezi, abayobozi b’Inzego z’ibanze, imiryango itegamiye kuri Leta, ndetse n’abana b’abahungu, gushyira hamwe mu guteza imbere uburezi bw’abana b’abakobwa.

Buri mwaka, ‘Imbuto Foundation’ ifatanyije n’abafatanyabikorwa batandukanye, ihemba abana b’abakobwa ku rwego rw’igihugu. Kugeza ubu hamaze guhembwa abakobwa 4,852 babaye indashyikirwa mu mitsindire.

Ibihembo ku bana b’abakobwa bitangwa bihabwa umukobwa w’indashyikirwa mu mashuri abanza; umukobwa w’indashyikirwa mu kiciro rusange ku rwego rw’Akarere; abakobwa batanu b’indashyikirwa mu kiciro cya kabiri ku rwego rw’Intara. Aba bana b’abakobwa bahembwa ibikoresho bitandukanye birimo ibikoresho by’ishuri, amahugurwa ku bijyanjye n’ikoranabuhanga ndetse n’amafaranga yo gutangira imishinga iciriritse.

Madame Jeannette Kagame mu bihe byashize

Umwanditsi:

Mugabo Lambert

Tanga Igitekerezo

Email yanyu ntigaragazwa ku rubuga. Amazina na Email ni ngombwa.