22°C , Mostly cloudy | Kigali-Rwanda

Ku munsi w’Intwari ndasaba urubyiruko gusigasira ibyagezweho-Lt. Col. Munyengango

Yanditswe na KAYITARE JEAN PAUL

Ku ya 02-02-2018 saa 07:23:40

Umuvugizi w’Ingabo z’u Rwanda Lt. Col. Munyengango Innocent asobanura ko Intwari ari indangagaciro, n’umuco u Rwanda rwubakiyeho kuko mu gihe na nyuma y’ubukoloni igihugu cyagiye kigira Intwari. Akaba asaba by’umwihariko urubyiruko gusigasira ibyagezweho.

Umuvugizi w’Ingabo z’u Rwanda Lt.Col. Mugemangango Innocent

Ibi yabitangaje mu kiganiro kihariye yagiranye n’Imvaho Nshya ubwo u Rwanda rwizihizaga umunsi w’Intwari ku munsi w’ejo hashize ku wa Kane, tariki ya 1 Gashyantare, umunsi ngarukamwaka. Lt. Col. Munyengango yishimira ko insanganyamatsiko y’umunsi w’Intwari yibanze cyane ku rubyiruko. Ati “Insanganyamatsiko y’umunsi w’Intwari irareba urubyiruko. Icyo nsaba urubyiruko ni ugushyiramo imbaraga, rugashaka aho rukomeza kujya imbere kandi heza no gusigasira ibyagezweho.”

Akomeza agira ati “Nk’urubyiruko kimwe nk’abandi bose ni amaboko y’u Rwanda, kugira ngo duteze igihugu cyacu imbere harimo n’indangagaciro zacu z’ubutwari nk’Abanyarwanda nko gukora umurimo unoze, gukunda igihugu, kugira ubutwari, harimo n’indagangaciro nyinshi kandi zubaka.” Asaba abari mu Rwanda no muri diyasipora gukomeza kuganisha u Rwanda aheza bifuza kuko nta wundi muntu ubereka inzira banyuramo, ahubwo bo bakoreshe iyo bihitiyemo, bakoreshe amaboko yabo.

Lt. Col. Munyengango yishimira iterambere u Rwanda rugezeho, no kwibuka abo batangiranye urugamba rwo kubohora igihugu bahasize ubuzima abakiriho bagahagarika Jenoside yakorewe Abatutsi mu 1994. Ashimangira ko amaraso y’abitangiye igihugu yamenetse akwiye gutera imbaraga buri munyarwanda kugira ngo hatazagira ugisubiza inyuma.

Ati “Bamwe muri twe twagize uruhare mu guhagarika Jenoside yakorewe Abatutsi no kubohora igihugu cyacu. Turibuka tukanashima bagenzi bacu bahasize ubuzima ariko tukishimira aho u Rwanda rugeze kuri uyu munota. Iyo tubireba dutyo, twifuza ko nta wakongera kudusubiza aho twari turi, ayo maraso yamenetse y’abana b’Abanyarwanda adutera izindi mbaraga zo gukomeza kurinda iki gihugu kugira ngo hatagira undi utekereza kudusubiza inyuma.”

Asobanura kandi ko uko Abanyarwanda bari barahungiye mu bihugu bitandukanye batozaga abana babo kubyina, kuririmba no gutarama, izo ndangagaciro bahabwaga ni zo zatumye bahaguruka bakaza kubohora igihugu. Yongeraho ko ari yo mpamvu abari muri diyasipora bakwiye kwigisha abana babo amahame yo gukunda igihugu ariko bakanagira n’umwanya wo kuza kureba iterambere igihugu cyabo kigezeho kandi bagafatanya n’Abanyarwanda kubaka igihugu.

Lt. Col. Munyengango ahamya ko ababyeyi kimwe n’igihugu bafite inshingano nini mu burere bw’abana b’igihugu. Abana b’u Rwanda ni ukubigisha umuco  nyarwanda ubahuza nk’Abanyarwanda, urimo kwanga ikibi, gukunda umurimo, gukunda igihugu no gukunda ikiza.

Yagize ati “Biriya byose ahantu ha mbere abana babitorezwa ni mu rugo. Haba hano mu gihugu, haba no hanze muri diyasipora, twese twize tukumva indangagaciro kimwe, tukumva ko zose ziganisha imbere igihugu cyacu, ndahamya ko imbere yacu ntacyahabuza kuba heza kandi ngira ngo ni byo uyu munsi utwibutsa, ni nabyo indi minsi itwibutsa.”

 

 

TANGA IGITEKEREZO

Leave a Reply

Be the First to Comment!

avatar