17°C , Partly sunny | Kigali-Rwanda
Aha hari mu gikorwa Umunyamabanga wa Leta muri MINEDUC, yashyikirizaga ibihembo bya Mudasobwa abarimu babaye indashyikirwa

Ku munsi wabo, abarimu bazahembwa iby’agaciro ka miliyoni 30

Yanditswe na MUGISHA BENIGNE

Ku ya 10-09-2018 saa 07:16:02

Mu gihe u Rwanda rwitegura kwizihiza umunsi mpuzamahanga w’umwarimu, uzatwara ingengo y’imari ingana na miliyoni 30 z’amafaranga y’u Rwanda, azakoreshwa mu kugura ibihembo bizahembwa abarimu bitwaye neza kurusha abandi.

Aha hari mu gikorwa Umunyamabanga wa Leta muri MINEDUC, yashyikirizaga ibihembo bya Mudasobwa abarimu babaye indashyikirwa

Ku munsi mpuzamahanga w’umwarimu, hazakoreshwa ingengo y’imari ingana n’amafaranga y’u Rwanda miliyoni 30 azakoreshwa mu guhemba abarezi babaye  indashyikirwa kuva ku rwego rw’Umurenge kugeza ku rwego rw’Igihugu, ahazatagwa ibihembo bya mudasobwa 452, modem n’inka 5.

Nk’uko bisobanurwa na Nzitabakuze Claudien, Umuyobozi Mukuru mu  Kigo k’igihugu cy’Uburezi ushinzwe amahugurwa no guteza imbere abarezi, avuga ko abarezi babaye indashyikirwa ku rwego rw’imirenge uko ari 416 bazahembwa mudasobwa ku munsi mpuzamahanga w’Umwarimu wizihizwa tariki ya 05 Ukwakira buri mwaka, kongeraho ababaye indashyikirwa ku rwego rw’Akarere, abo ku rwego rw’Intara n’Umujyi wa Kigali ndetse n’umwe wo ku rwego rw’Igihugu, bikazatwara ingengo y’imari ingana na miliyoni 30 z’amafaranga y’u Rwanda.

Ati “Hakozwe isuzuma ry’abarezi bakoze neza kurusha abandi, batorwa na bagenzi babo ku rwego rw’ishuri, barakomeza bagera ku rwego rw’imirenge, abo ni bo bazahabwa ibihembo bya mudasobwa kuko bahize abandi. Ni igikorwa kizatwara ingengo y’imari ingana na miliyoni 30 z’amafaranga y’u Rwanda.”

Avuga kandi ko hari n’ibihembo biri ku rwego rw’Intara n’Umujyi wa Kigali, abatoranyijwe kuri urwo rwego bakazahabwa inka buri wese, akaba ari mu rwego rwo koroza abarezi no kubashimira ko bakoze neza.

Ati “Iyo umuntu akoze neza arashimirwa, hari abarezi bitangira akazi kandi bakigisha abana neza bagatsinda ari benshi, abo ni bo batorwa na bagenzi babo bakagenda bazamuka kugeza ku rwego rw’Intara.”

Uretse izo nka 5 zizatangwa kuri uwo munsi, Nzitabakuze avuga kandi ko hateganyijwe korozwa n’abandi barezi biturutse ku nka zabyaye, abazihawe bakazaziturira abandi.

Ati “Ubusanzwe hari inka zahawe abarezi, abazihawe rero basabwe kuziturira abandi mu gihe zizaba zimaze kororoka, izavutse ubwo zizahabwa abandi, muri gahunda yo koroza abarimu inka zibafasha kwiteza imbere.”

Nyirabahire Emeritha ni umurezi mu Rwunge rw’amashuri St Paul Kabere, ruherereye mu Murenge wa Kayumbu, Akarere ka Kamonyi, nk’umwe mu barezi bahawe ibihembo bya Mudasobwa umwaka ushize nk’umurezi wahize abandi, avuga ko yishimiye kubona iki gihembo kandi ko cyagize impinduka nziza ku mikorere ye nk’umurezi n’iterambere mu muryango we.

Ati “Nyuma yo kubona igihembo cya mudasobwa, mbasha gutegura neza amasomo mpa abanyeshuri, nkora ubushakashatsi bunyuranye mu rwego rwo kwiyungura ubumenyi no gucukumbura amasomo nigisha, ndetse ngenda ngira ubumenyi bwisumbuye mu ikoranabuhanga uko ngenda mara iminsi nkoresha iyi mashini.”

Nyirabahire avuga kandi ko imashini ye yamufashije kwigisha abana be ikoranabuhanga, kuri ubu ngo abana be biga mu mashuri abanza ndetse n’ayisumbuye bazi gukoresha mudasobwa.

Kamanayo Emeritha, umurezi ku ishuri ribanza rya Shyanda na we ni umwe mu bategereje guhabwa ibihembo ku munsi mpuzamahanga wa Mwarimu, kuko yabaye indashyikirwa ku rwego rw’Umurenge wa Kayumbu, mu Karere ka Kamonyi.

Ati “Nishimiye ko natoranyijwe na bagenzi bange nk’umurezi wahize abandi nkagera ku rwego rw’umurenge, ntegereje ibihembo ku munsi w’umwarimu kandi ndabyishimiye cyane kuko ibyo nkora bibonwa n’abandi bakanabimpera ikizere nkagera kure.”

Avuga ko iyo mashini namara kuyihabwa izamufasha gukora imirimo ye ya buri munsi mu burezi, gutegura amasomo no gukora ubushakashatsi mu rwego rwo kurushaho kunoza umurimo we w’uburezi.

Insanganyamatsiko y’umunsi mpuzamahanga wa mwarimu iragira iti “Uburenganzira ku burezi, ni uburenganzira ku mwarimu ushoboye.”

 

TANGA IGITEKEREZO

One Comment on “Ku munsi wabo, abarimu bazahembwa iby’agaciro ka miliyoni 30”

  1. Biranejeje kubona abarimu bahize abandi ku nzego zitandukanye bahabwa ishimwe ry’uko bakora neza umwuga wabo. Hakwiye kureba uruhare rwa mwarimu mu iterambere,akarushaho gushyikirwa.

Leave a Reply

Your email address will not be published. Required fields are marked *