26°C , Partly sunny | Kigali-Rwanda
Shirimpumu umaze gutezwa imbere n'ubworozi bw'ingurube (Foto Ngaboyabahizi P.)

Ku kwezi yibarira umushahara urenga miliyoni akesha korora ingurube

Yanditswe na admin

Ku ya 21-11-2017 saa 13:27:32

Shirimpumu Jean Claude ni umworozi w’ingurube utuye mu murenge wa Byumba, Akarere ka Gicumbi, avuga ko nyuma yo kurangiza ikiciro cya gatatu cya kaminuza, yatangiye umushinga wo korora ingurube, ahera kuri 5 none ageze kuri 800.

Avuga ko amaze gutera imbere ku buryo bugaragara, dore ko ku kwezi yibarira umushahara wa miliyoni n’igice  akura mu bworozi bw’ ingurube.

Shirimpumu umaze gutezwa imbere n’ubworozi bw’ingurube (Foto Ngaboyabahizi P.)

Avuga ko uyu mushinga yawukoze muri gahunda yo guhanga  umurimo, akaba akangurira urundi rubyiruko kwitabira ubu bworozi  kuko ingurube ari itungo ryororoka vuba, kandi rigatanga iterambere ku buryo bwihuse.

Mu kiganiro n’Imvaho Nshya Shirimpumu yagize ati “Nyuma yo kurangiza ikiciro cya gatatu cya kaminuza ( Masters), rwose nahembwaga amafaranga asaga ibihumbi 920 akazi ndagahagarika ntekereza kwikorera,  kuko nari nize ibijyanye no gukora imishinga ndetse no kuyicunga, nasanze nashora imari mu bworozi bw’ingurube, mpita ntangira uwo mushinga.”

Yakomeje avuga ko uyu atari umushinga ugoye akaba ashishikariza abarangije amashuri yisumbuye na kaminuza kuwukora kuko utanga umusaruro vuba kandi ubu inyama ziranakenewe cyane ku isoko,  ikindi kandi hari ingurube za kijyambere zitanarya byinshi nk’izari zisanzwe. Ngo nta n’ukwiye kubihinyura avuga ko ingurube zigira umwanda kuko hari uburyo bwo kuzitaho bugezweho.

Avuga ko  ingurube ya kijyambere   ishobora kurya ibiro bitatu by’ibiryo ku munsi, imwe ishobora gutanga umusaruro w’ingurube ziri hagati ya mirongo itandatu na mirongo inani ku mwaka.

Ati “Ni n’aho  mpera mpamagarira urubyiruko rwose korora izi ngurube kuko ni itungo ritanga inyama zikunzwe, zikenewe. Urubyiruko rwirinde kumva ko ruzatega Leta amaso ngo ibahe akazi.”

Shirimpumu akomeza avuga ko ubu bworozi bwamuteje imbere aho amaze kuzenguruka ibihugu byose byo muri Afurika y’Iburasirazuba ndetse no mu Burayi na Aziya, kubera ingendoshuri akora mu bijyanye n’ ubworozi bw’aya matungo.

Ingurube ngo zatumye agura imodoka agendamo n’umuryango we, ndetse n’umugore arangiza kaminuza ubu ni umukozi na we.

Yahaye abandi akazi

Abana be ngo biga mu mashuri meza, akaba yaratanze imirimo ku bakozi 2, barangije kaminuza mu by’ubworozi (Veterinaires), abize ayisumbuye 10, akagira abakora mu mirima ba nyakabyizi bagera kuri 50 ku munsi, kandi na bo ngo bahembwa neza, iyo ubasanze ku mirimo yabo na bo barabyemeza.

Kuri ubu Shirimpumu ngo iyo abaze nibura umushahara we ku kwezi ntabura kujya hejuru ya miliyoni imwe n’igice, ngo kuko ntabura nibura kuvukisha ingurube 300 ku kwezi kandi ngo ziba zifite abakiliya benshi bashaka kuzorora.  Ingurube ya make ayigurisha ibihumbi 200. Akaba yaratangiye ubu bworozi muri 2009.

Umuyobozi mukuru wungirije w’ikigo gishinzwe ibyoherezwa n’ibitumizwa mu mahanga, Urujeni Sandrine, avuga ko ubu inyama zikenewe cyane mu mahanga kuko hari ibihugu byinshi  bizitumiza mu Rwanda ku buryo ngo  uwakora ubwo bworozi yabona isoko.

Agira ati “ Ubu hari ibihugu bikeneye inyama ziva mu Rwanda urumva uwakora ubu bworozi ko yabona isoko kuko bwororoka vuba nk’uko ababukora babivuga, ikindi kandi urubyiruko nirwumve ko rukwiye gushora imari mu buhinzi n’ubworozi kuko amasoko yo hanze ategereje ibiva iwacu, kandi twifuza kohereza byinshi kuruta ibyo dukurayo.”

Muri iki gihe hirya no hino usanga  inyama y’ingurube ikunzwe dore ko banayita amazina atandukanye nk’ akabenzi kubera kuyikunda.

NGABOYABAHIZI PROTAIS

 

TANGA IGITEKEREZO

Leave a Reply

Your email address will not be published. Required fields are marked *