21°C , Partly cloudy | Kigali-Rwanda

Koronavirusi: Rihanna yatanze Miliyoni 5 z’Amadolari zo kugoboka abari mu kaga

Yanditswe na Ndamyirokoye François

Ku ya 26-03-2020 saa 11:13:50
Umuhanzikazi Rihanna

Robyn Rihanna Fenty uzwi nka  Rihanna abinyujije  muri kompanyi ye “Clara Lionel Foundation”  yashinze mu 2012, yatanze   inkunga ya miliyoni eshanu z’Amadorari y’Amerika, hafi Miliyari eshanu z’Amafaranga y’u Rwanda, mu rwego   rwo kugoboka  Abanyamerika bari mu kaga ka Covid-19 ngo ariko hari n’abandi iyi nkunga izageraho.

Usibye Amerika, hari ibindi bihugu byavuzwe  ko byafashwa ku nkunga uyu muhanzi yatanze, harimo Malawi, Haiti n’ahandi.

Iyi kompanyi   ni umushinga wa Rihanna utagamije inyungu, ahubwo nk’uko yagiye abisobanura kenshi ni uburyo bwo gufasha mu gihe byabaye ngombwa, haba mu by’ubuzima, ubutabazi, ibyorezo  no mu burezi.

Rihanna kandi kubera kwitanga no gukunda ikiremwamuntu ibi byatumye agirwa Ambasaderi w’Igihugu akomokamo cya Barbados gifatwa nk’ikirwa giherereye mu Majyaruguru ya Amerika.

Ubusanzwe Rihanna ntabwo akora ibijyanye na muzika gusa kuko  ashakira amafaranga mu bintu bitandukanye birimo kwerekana imideli  akaba afite inzu itunganya imideli yitwa “Fenty beauty” yashinze mu 2017.

Rihanna yamamaye ku Isi mu ndirimbo zakunzwe na benshi nka “Man down”,  “Where have you been”, “What is my name”, “We found love”, “Umbrella” n’izindi.

Ku rundi ruhande uyu muhanzikazi yavuzwe cyane mu rukundo na Chris Brown baza gutandukana nabi cyane aho uyu muhanzikazi yakubiswe urushyi mu ruhame n’uwo yitaga umukunzi we Chris Brown.

Amerika rero iri mu bihugu biri kwibasirwa n’icyorezo cya Coronavirus aho nibura abagera ku  68,581banduye naho 1,036 bamaze gupfa.

Ku Isi hose abantu 22,021bamaze guhitanwa n’iki cyorezo, abenshi muri bo akaba ari abo mu gihugu cy’u Butaliyani. Mu Rwanda, abamaze kwandura iki cyorezo ni abantu 41 nk’uko tubikesha Minisiteri y’Ubuzima (MINISANTE).

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.