22°C , Partly cloudy | Kigali-Rwanda

Koronavirusi: Polisi yashyizeho ingamba zikomatanyije zo guhangana n’abatubahiriza amabwiriza

Yanditswe na Mutungirehe Samuel

Ku ya 25-03-2020 saa 13:36:15
Umuvugizi wa Polisi y'u Rwanda, CP John Bosco Kabera

Mu gihe u Rwanda rwashyizeho ingamba icumi zifasha guhangana no kuba icyorezo cya Coronavirus cyugarije Isi cyakomeza kwiyongera mu baturage no mu bice bitandukanye by’igihugu, Polisi y’igihugu nka rumwe munzego z’umutekano zifasha mu kugenzura ko abaturage bubahiriza izo ngamba, yatangije ingamba zikomatanyije zo kuburira no kuvana abantu mu mihanda bari mu bikorwa n’ingendo zitemewe bagasubira mu ngo no guhana ababirengahi nkana.

Ni ingamba Umuvugizi wa Polisi CP Kabera Jean Bosco, yavuze ko bafashe zigamije gutuma abantu bumva ubutumwa bakwiye gukurikiza muri ibi bihe, birinda gukwirakwiza icyorezo, cyane ko uwacyanduye adahita agaragaza ibimenyetso ako kanya ngo umubona amwirinde.

Ati “Ikigaragara ni uko hari abantu batari bumva iyi gahunda yo kwirinda, yo kuguma mu rugo; hari abasohoka mu ngo zabo bakaguma hanze ku muhanda bakareba imodoka zihita cyangwa bakareba abandi bantu bahita, hari abakora siporo hanze mu mihanda kandi ntibyemewe.

Twayitangije rero kugira ngo dukangurire abantu nubwo hariho n’izindi ngamba zisanzwe, zo kubabaza iyo bava, iyo bajya; kureba ba bantu badakwiye kuba bagenda. Ni iyunganira ibikorwa byo gukangurira abantu mu makaritsiye, mu mihanda, ku masoko, kugira ngo bumve nyine ubwo butumwa; ni ugukorera ibintu byinshi icyarimwe, ni ukwigisha, kugenzura ko ibintu byubahirizwa, ni ugutanga ubundi butumwa.”

CP Kabera yakomeje avuga ko ahari inzego z’umutekano nazo zashyizeho aho kubariza umuntu aho agana n’ikihutirwa kimujyanye ariko hakabaho n’ubutumwa butangwa bazenguruka.

Ati “Twabitangije hano mu Mujyi wa Kigali, hari ubutumwa bundi twatanze hirya no hino mu ntara, biraza gukomeza mu modoka za police aho bagenda bagahagarara hari abantu benshi kugira ngo ubwo butumwa butambuke ndetse n’abapolisi bakagira inama abantu gusubira mu ngo, bakava ku mihanda bakareka gukomeza kuzerera.

Ni ibikorwa byinshi rero birakomeza ariko icyo dukeneye ni uko abantu benshi babyumva, itangazamakuru rikagira uruhare mu kubyumvisha abantu, ubwo butumwa bakaba babunyuzaho kugira ngo bakomeze kubwira abantu uburyo bakifata muri ibi bihe.”

Umuvugizi wa Polisi CP Kabera yashimangiye ko abantu bagenda babyumva umunsi ku wundi, abantu bagenda bava mu kumva ko ari ibisanzwe ariko hakenewe gushyirwaho izindi ngamba nyinshi zikomatanyije.

Ati “Aho abayobozi b’inzego z’ibanze batari, aho abapolisi batashyize bariyeri hakaba hari izo mikoro zikagenda zivuga, zizenguruka hirya no hino abapolisi bakangurira abantu gusubira mu ngo zabo cyane cyane muri za karitsiye aho twagiye tubona amashusho amwe n’amwe bigaragara ko abantu bicaye imbere y’amabaraza, imbere y’inzu, abandi bicaye ku muhanda abandi bagenda.

Ni ibyo rero turanabashishikariza ko tutagomba no gupima igipimo cy’ubwitabire cyangwa se cyo kumva; bakwiye kubyumva 100%, kuko ntabwo ibijyanye n’icyorezo no kwandura iyi ndwara ugomba kubura amahirwe, kabone n’iyo yaba ari 0.001%. Oya, nta buryo bishoboka ko amahirwe yo kwandura bayaha igipimo.”

Kuba hari abaturage kugeza ubu polisi ibona mu muhanda, CP Kabera yasobanuye ko ari ikibazo k’imyumvire mike kandi nayo idafite ishingiro, idafite impamvu kandi nayo ari yo bakirwana nayo umunsi ku wundi, gusa kuyihanganira bikaba byarahagaze ingufu ziri mu bikorwa byo gusubiza abantu mu ngo kugira ngo birinde icyorezo kitarobanura uwo gifata.

Leta y’u Rwanda yafashe indi ngamba yo kubanza gushyira mu kato abantu bose baturutse kanze y’u Rwanda, mu gihe k’iminsi 14 uwanduye Coronavirus byanze bikunze aba yagaragaje ibimenyetso, inasaba abandi bageze mu gihugu mbere kwishyira mu kato k’iyo minsi bahereye igihe bagereye mu Rwanda bityo ugaragaje kimwe mu bimenyetso bya Corona abashe guhamagara 114 kugirango afashwe byihuse atanduje abandi.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.