19°C , Partly sunny | Kigali-Rwanda

Koronavirusi: Kylie Jenner yatanze ubufasha mu kurwanya COVID-19

Yanditswe na Ndamyirokoye François

Ku ya 27-03-2020 saa 10:22:33
Icyamamare Kylie Jenner akaba ari umuvandimwe wa Kim Kardashian

Kylie Jenner umuvandimwe wa Kim Kardashian, akaba ari umunyamideli, yatanze akayabo ka miiyoni y’amadorali y’Amerika mu gikorwa cyo kwirinda icyorezo cya Coronavirus kimaze kugera hafi mu bihugu byose byo ku isi.

Ubu bufasha biteganyijwe ko buzifashishwa hagurwa udufupfukamunwa (Face Masks), ndetse n’ibindi bizakoresho nk’ubwirinzi ku baganga n’abandi bari kwita ku buzima bw’abanduye iki cyorezo.

Dr. Thais Aliabadi wakiriye iyi nkunga yashimiye Kylie Jenner by’umwihariko ku bw’impano y’ubugwaneza yabahaye. Uyu muganga n’amarangamutima menshi yagize ati “Ubu nabuze icyo mvuga, amaso yanjye yuzuye amarira y’ibyishimo n’umutima wanjye uranezerewe. Nasabye isi ko yadushakira ibikoresho by’ibanze ku baganga bacu none uyu munsi inzozi zanjye zibaye impamo”.

Yakomeje agira ati “Ntabwo nigeze mbifata nk’umugisha kuba umuganga, nk’uko nishimira gufasha bagenzi banjye ndetse n’abarwayi banjye. Bivuye ku mutima wanjye, wakoze cyane Kylie Jenner. Uri intwari yanjye. Iyi nkunga yawe izafasha mu kurokora ubuzima bw’abantu benshi. Isi yacu ni nziza kuko uyirimo. Ndagukunda cyane”.

Kylie Jenner abaye umwe mu bantu b’ibyamamare batanze inkunga mu gufasha nyuma ya Arnold Schwarzenegger na we watanze miliyoni imwe y’Amadorali y’Amerika kugira ngo harwanywe iki cyorezo. Kylie Jenner kandi yabaye umwe mu batanze ubutumwa bwo kwirinda Coronavirus abicishije ku mbuga nkoranyambaga ze nk’uko tubikesha ikinyamakuru cya TMZ.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.