27°C , Partly sunny | Kigali-Rwanda

Koronavirusi: Hashimangiwe akato k’iminsi 14 ku bagenderera ibihugu bya EAC

Yanditswe na Ntawitonda Jean Claude

Ku ya 26-03-2020 saa 10:26:14
Ibihugu bya EAC byiyemeje korohereza ibicuruzwa no gufasha abagizweho ingaruka n'ifungwa ry'imipaka

Abaminisitiri b’Ubuzima, ab’Ubucuruzi, abashinzwe Ubutwererane bw’Ibiguhugu bigize Umuryango w’Afurika y’Iburasirazuba (EAC), n’Abanyamabanga ba Leta muri Minisiteri z’Ububanyi n’Amahanga,  bashimangiye ko abagenderera ibihugu bigize uwo muryango bagomba gupimwa no gushyirwa mu kato k’iminsi 14 mu gukumira ikwirakwira rya Koronavirusi (COVID-19).

Itangazo rikubiyemo imyanzuro y’iyo nama yakorewe ku ikoranabuhanga (video conference) ryerekana ko yakozwe hagamijwe gusangira amakuru n’ubumenyi bihari ku cyorezo cya COVID-19, gufata ingamba zo kugikumira no kwirinda ko cyakomeza gukwirakwira, ndetse no gutegura gahunda ihamye yo guhangana n’ingaruka z’iki cyorezo mu bihugu bya EAC.

Iyo nama yayobowe na Minisitiri w’Ubuzima mu Rwanda akaba n’Umuyobozi w’Inama y’Abaminisitiri b’Ubuzima muri EAC Dr Ngamije Daniel, yemeje ko hashyirwaho hakanashyigikirwa komite yihariye ikurikirana ishyirwa mu bikorwa ry’imyanzuro yafashwe.

Abo bayobozi bateranye mu gihe ibihugu bine muri bitandatu bagaragayemo abarwayi 96 kugeza ubu (Uganda 14; Kenya 28; u Rwanda 41 na Tanzania 13), aho u Burundi na Sudani y’Epfo  bitaratangaza umurwayi n’umwe.

Indi myanzuro yafashwe irimo guhagarika inama z’imbonankubone, hakimakazwa ikoranabuhanga mu guhanahana amakuru no koroshya urujya n’uruza rw’ibicuruzwa byambuka imipaka.

Buri kamyo itwaye ibicuruzwa ntigomba kurenza abantu batatu kandi bazajya bapimirwa ku mupaka mbere yo kwambuka, mu gihe bafite ibimenyetso byo kwandura bashyirwe mu kato ariko ibyo batwaye bishakirwe uko byagezwa ku cyerekezo cyabyo bikimara guterwa imiti yica virusi.

Ba nyiri ibicuruzwa barasabwa kumenyekanisha ingendo nyambukamipaka mbere yo kuzikora kandi bakajya bahagarara gusa ahabugenewe mu kwirinda ko bagira uruhare mu ikwirakwizwa ry’icyorezo.

Za Ambasade z’ibihugu zasabwe gufasha abagizweho ingaruka n’ifungwa ry’imipaka bakabona uburyo bagera mu cyerekezo cyabo mu karere.

Ibihugu byanasabwe gufasha ibigo n’inganda gutunganya ibiribwa n’ibikoresho nkenerwa bihagije cyane cyane ibyifashishwa mu isuku no mu guhangana na COVID-19.

Imibare itangwa n’Ishami ry’Umuryango w’Abibumbye ryita ku buzima (WHO) yerekana ko kuri uyu wa Kane tariki 26 Werurwe 2020,  abamaze kwandura COVID-19 ari 472,907 , abayikize ni 114,775, na ho abo imaze gutwara ubuzima ni 21,315.

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.