22°C , Mostly cloudy | Kigali-Rwanda
Komiseri Mukuru Wungirije wa RRA Bizimana Ruganintwali Pascal (Foto Kayitare J. P)

Koreya yateye u Rwanda inkunga ya Miliyari zisaga 5

Yanditswe na KAYITARE JEAN PAUL

Ku ya 02-06-2018 saa 06:52:09

Leta ya Koreya ibinyujije mu Kigo cyayo gishinzwe iterambere mpuzamahanga (KOICA), yateye inkunga Leta y’u Rwanda ingana na miliyoni esheshatu z’amadolari, ni miliyari zirenga eshanu mu mafaranga y’u Rwanda. Aya mafaranga azakoreshwa mu rwego rwo kunoza uburyo bwo gusoresha hakoreshejwe ikoranabuhanga.

Komiseri Mukuru Wungirije wa RRA Bizimana Ruganintwali Pascal (Foto Kayitare J. P)

Komiseri Mukuru Wungirije w’Ikigo k’Igihugu k’Imisoro n’Amahoro, RRA, Bizimana Ruganintwali Pascal, yavuze ko iki ari ikiciro cya kabiri KOICA iteyemo inkunga nyuma y’iyo batanze mu gukora ikoranabuhanga rivuguruye rizajya ryifashishwa mu gutanga inyemezabwishyu (Upgraded EBM).

Bizimana asobanura ko aya mafaranga azakoreshwa mu kubaka urubuga, aho umuntu usora azajya anyura mu nzira imwe akinjira muri serivisi za RRA, akamenya uko ahagaze mu misoro atagombye kunyura mu nzira nyinshi nk’uko byari bisanzwe.

Ati “Miliyoni esheshatu baduhaye icyo zizakoreshwa cya mbere, ni uko tugiye kugura ibikoresho nk’ububiko (Server) kugira ngo amakuru yose aza kuko azaba ari menshi, tugire uburyo bwo kubicunga.”

Akomeza avuga ko abacuruzi 3000 batari muri TVA, Leta izatera inkunga umushinga wo kubagurira imashini bakazihabwa ku buntu mu gihe k’igerageza. Nyuma yo kubona ko bikora neza n’abandi bacuruzi batanditse ku musoro ku nyongeragaciro bazasabwa kuzitunga.

Lee Byung-hwa, Umuyobozi wa KOICA mu Rwanda, yavuze ko EBM nshya izagira uruhare rufatika mu iterambere ry’u Rwanda mu gihe kirekire.

Ati “Uyu mushinga uzatuma u Rwanda rugera ku ntego n’ikerekezo cyarwo kuko imisoro yinjiye neza ari ingenzi mu iterambere rirambye”.

Ikoranabuhanga rya EBM rimaze kongera 4% ku misoro ikusanywa, mu gihe umusoro ku nyongeragaciro ufite uruhare rwa 33% ku misoro yose ikusanywa mu gihugu. Abamaze guhabwa EBM ivuguruye ni 3000, abandi 8000 bamaze guhabwa amahugurwa kuri yo.

 

TANGA IGITEKEREZO

Leave a Reply

Be the First to Comment!

avatar