Koperative igurisha Tungurusumu mu mahanga ihangayikishijwe n’ubwanikiro

Yanditswe na KAYITARE JEAN PAUL  

Ku ya 30-07-2020 saa 06:40:56
Tungurusumu zera cyane mu Karere ka Musanze

Koperative “Dutere Imbere Dukoresheje Amaboko Yacu” yo mu karere ka Musanze mu Ntara y’Amajyaruguru igurishiriza Tungurusumu hanze y’Igihugu, ihangayikishijwe no kutagira ubwanikiro cyangwa imashini yumutsa.

Manaturikumwe Noel, Perezida wa Koperative, yabwiye Imvaho Nshya ko ku wa Kabiri tariki 28 Nyakanga 2020 bakiriwe na Guverineri w’Amajyaruguru Hon Gatabazi JMV mu biro bye, bakamugezaho iki kibazo.

Avuga ko bafite tungurusumu ariko ubushobozi bwo kuzigurisha hanze y’u Rwanda bikibabereye imbogamizi ari nazo bagaragarije ubuyobozi bw’intara.

Yagize ati: “Imbogamizi twagejeje kuri Guverineri ni ubwanikiro kuko hari ubwo tuzipakira tuzijyanye hanze zikaborera mu modoka bitewe n’urugendo rurerure.

Iyo tuzigejeje hanze abaturage baho banga kuzigura ari nyinshi kubera kwanga ko zababoreraho, bivuze ko bagura tungurusumu nkeya mu gihe bakaguze nyinshi bakazibika”.

Manaturikumwe Noel umwe mu batangiye kohereza Tungurusumu mu mahanga asanga ubwanikiro ari cyo gisubizo cya Koperative

Akomeza avuga ko babonye imashini yumutsa cyangwa ubwanikiro bwa Tungurusumu byabafasha gukomeza kugeza umusaruro wabo ku isoko ryo hanze.

Guverineri w’Intara y’Amajyaruguru, Hon Gatabazi JMV, yahamirije Imvaho Nshya ko Intara y’Amajyaruguru isanzwe igira ubwanikiro bw’ibigori n’indi myaka, ariko ko hatari hamenyereye ubwanikiro bwa Tungurusumu.

Akomeza avuga ko hari inama yagiriye abagize Koperative ubwo yabakiraga mu biro ku munsi w’ejo ku wa Kabiri tariki 28 Nyakanga 2020.

Ati: “Twabagiriye inama yo gukora ubwanikiro bakwanikaho batandaraje hejuru nkuko ikawa zanikwa, bityo bakanikaho Tungurusumu kandi zikuma neza”.

Akomeza agira ati: “Twabasabye ko bareba uko ubwanikiro bwa Tungurusumu buba buteye noneho bakazaterwa inkunga kuko bitananirana nkuko abahinzi b’ibirayi bafashwa aho bakusanyiriza umusaruro wabo”.

Abantu bafite gahunda ihamye baterwa inkunga kandi ngo bizashyirwa muri gahunda y’Akarere ka Musanze ariko ngo babone ubwanikiro bwa Tungurusumu.

Guverineri Gatabazi asaba urubyiruko kudasuzugura ubuhinzi ahubwo ko ari uburyo bwo kwihangira imirimo rwaheraho.

Ati “Urubyiruko rusuzugura ubuhinzi, rugomba kumva ko ubuhinzi bugezweho bw’iterambere, buhingira isoko bukohereza mu mahanga. Ni ikintu rugomba kwitabira”.

Igitekerezo cyo gushinga Koperative, Manaturikumwe avuga ko yagiye gushaka isoko hanze agatwara agafuka kibiro 50 muri Uganda bakamuhera amafaranga 1,500 ku kiro mu gihe mu Rwanda yakiguraga amafaranga 400.

Ati: “Gushinga Koperative byatewe nuko abantu bankurikiraga bakaza kureba aho ngurisha, tuza guhura n’ikibazo cy’uko buri wese azi aho zijya, twagerayo tugahomba kubera guhurira ku isoko turi benshi”.

Akomeza agira ati: “Twahisemo kwihuza turi abantu15 tukavuga tuti uyu munsi harapakira uyu, nyuma y’umunsi hakagira ukurikiraho, tukajya tugenda ku murongo”.

Asaba urubyiruko kuvana amaboko mu mifuka kandi rugashishikarira gukora imirimo y’ubuhinzi kuko yarufasha gutera imbere.

Igiciro cya Tungurusumu zasaruwe mu mpera z’umwaka ushize, cyari gihagaze hagati y’amafaranga ibihumbi bibiri na bitatu ku masoko yo mu gihugu.

Mu Gihugu hose hari abahinzi ba Tungurusumu bagera ku 14,500, Akarere ka Musanze kihariye abahinzi ibihumbi 12 bari mu makoperative 11.

Guverineri Gatabazi JMV yakiriye mu biro bye abagize Koperative igurisha Tungurusumu hanze y’u Rwanda (Foto Damascene)

Umwanditsi:

KAYITARE JEAN PAUL  

Tanga Igitekerezo

Email yanyu ntigaragazwa ku rubuga. Amazina na Email ni ngombwa.