22°C , Partly cloudy | Kigali-Rwanda

Kompanyi zitwara abagenzi zirasabwa gucunga neza imizigo yabo

Yanditswe na Tumukunde Georgine

Ku ya May 11, 2018 saa 7:14

Urwego Ngenzuramikorere     ( RURA) rurasaba  kompanyi zitwara abagenzi mu modoka gushyiraho uburyo bunoze bwo gucunga imizigo y’abagenzi kuko hakomeje kugaragara ibibazo by’abavuga ko babuze imizigo yabo.

Abatwara abagenzi bafite inshingano zo gucunga neza imizigo y’abo batwaye

Abatwara abagenzi bakwiye kugira umuntu wakira imizigo akayibika mu  modoka ahatandukanye n’aho abantu bicara,  no mu gihe cyo  kuyikuramo umugenzi ageze aho ajya,  hakaba hari umuntu ubishinzwe uyimuhereza kandi  akaba azi neza ko iyo amuhaye ari iye adatwaye iy’abandi.

Mukamurera Vénérande ushinzwe ishami rirengera abafatabuguzi  muri RURA avuga ko hari ubwo  umuntu bamupakirira   umuzigo yagera aho ajya agasanga ntawukirimo.  Arasaba abatwara abagenzi kugira uburyo bunoze bwo gucunga imizigo.

Ati: “ Umuzigo muto ni wo umugenzi akwiye kwicungira kuko aba awicaranye, hanyuma umuzigo munini upakirwa ahabugenewe, mu gihe ubuze uba ugomba kubazwa nyiri imodoka wawumupakiriye. Twakira ibirego byinshi by’abagenzi babuze imizigo yabo, tukabahuza n’abo baba babapakiriye,  ubashije kugaragaza ikimenyetso cy’umuzigo we akawishyurwa, ariko ubundi ntibikwiye ko ibyo bibazo bikomeza kubaho.”

RURA irategura amabwiriza y’uburyo imizigo y’abagenzi yajya icungwa.  Mukamurera ati: “Turateganya kugirana ikiganiro n’abatwara abagenzi  kugira ngo uburyo bwo gutwara imizigo y’abantu bunozwe. Hakwiye kubaho nk’ikimenyetso gishyirwa  ku muzigo w’umuntu, na we agahabwa ikindi  gihuye  n’ikiri ku muzigo we,  mu gihe cyo kuwukuramo akaba ari cyo yerekana hakarebwa ko ari uwe koko.”

Hari abagaragaza ko imizigo yibirwa mu nzira

Tuyishime Clarisse ukunze kuvana ibicuruzwa mu Mujyi wa Kigali abijyanye mu Karere ka Ruhango, yavuze ko akenshi imizigo iburira mu nzira. Ati: “ Ubundi iyo ufite umuzigo munini bisaba ko winjira mu modoka ubonye ko bawupakiye  koko, hanyuma ukicara ku ntebe y’inyuma ukajya ucunga ko ntawe uwukuramo, ariko nyine ibyo ntibihagije kuko hari igihe bawukuriramo mu nzira nk’iyo imodoka igeze ahaterera igenda gahoro. Mbona bakwiye gushaka uburyo ibutu (aho imizigo ibikwa) yafungwa neza.”

Hari n’abavuga   ko iyo bwije,  umuzigo bawukuramo imodoka itaranahaguruka,  kuko hari abiyita ko  bashinzwe gupakira imizigo kandi ahubwo ari abagamije kwiba.

Bamwe mu batwara abagenzi bavuga  ko iyo hari umuzigo ugomba gupakirwa inyuma mu modoka basaba umugenzi kwicara aho abasha kuwucunga. Gusa na bo bagaragaza imbogamizi z’uko abajura bayibira mu nzira imodoka igenda.

Nyinawumuntu Solange ushinzwe imitangire ya serivisi ( Customer Care) muri Horizon Ltd, imwe muri kompanyi zitwara abagenzi ziva mu Mujyi wa Kigali zerekeza mu zindi ntara,  yagize ati: “Nka hariya  i Gihinga ( mu Karere ka Kamonyi) haterera, imodoka iba igenda gahora wenda ikurikiye   ikamyo, hari abantu bagenda bakica butu (car boot) bagakuramo imizigo […],   ariko icyo gihe nyiri umuzigo na we aba abibona ko twese twagize ibyago tukibwa. Icyo kibazo twakigaragarije ubuyobozi bwa hariya. Gusa hari abo twafashishe gushakisha imizigo yibwe iraboneka.”

Ku bijyanye n’uko bapakira imizigo yagize ati:  “ Iyo hari abafite imizigo minini tuyipakira inyuma mu modoka, tukabasaba kwicara ku ntebe y’inyuma bakajya bayicunga. Hagira umugenzi  uvamo mu nzira yari afite umuzigo inyuma bakareba ko nta yabo bakuyemo. Kuri bisi nini twatangiye  gukoresha, zigira imizigo myinshi rimwe na rimwe, twandika ku muzigo wa buri muntu, kandi  igapakirwa hakurikijwe uko abantu baza kugenda bavamo n’aho baviramo, ubatwara na we areba uko ipakirwa kugira ngo aze kubona uko ayibaha.”

RURA ivuga ko ibyo bibazo by’abagenzi babura imizigo bikwiye gukemurwa, abatwara  abagenzi bakumva ko ari inshingano zabo gucunga neza  imizigo y’abagenzi.