22°C , Mostly sunny | Kigali-Rwanda
Ngandahimana Ladislas, Umunyamabanga nshingwabikorwa wa RALGA

‘Kohereza abayobozi basoje manda kwiga ni ishimwe ry’imperekeza ry’Umukuru w’Igihugu’

Yanditswe na Mugisha Benigne

Ku ya 11-07-2019 saa 15:07:09

Umunyamabanga Mukuru w’Ishyirahamwe ry’uturere n’Umujyi wa Kigali (RALGA), Ngendahimana Ladislas, atangaza ko kohereza abayobozi b’uturere basoje banda zabo kwiga ari ishimwe ry’imperekeza bahawe n’Umukuru w’Igihugu Paul Kagame.

Ngendahimana yabitangarije Imvaho Nshya mu kiganiro yagiranye na yo, aho avuga ko iri shimwe ry’imperekeza rihabwa abayobozi b’uturere rinyuzwa muri RALGA rikanacungwa na yo, ariko ngo ni impano yihariye y’Umukuru w’Igihugu ku bayobozi basoje neza manda zabo, aho bajya gutyaza ubwenge muri kaminuza y’u Rwanda ngo babone impamyabumenyi y’ikiciro cya 3 cya kaminuza mu bijyanye n’imiyoborere.

Yagize ati: “Bikorwa ku bufatanye bwa RALGA na Kaminuza ya Leta mu buryo bw’amasezerano bagirana mu kwigisha aba bantu”.

Umunyambanga Mukuru RALGA avuga ko ibyo bigishwa muri iki kiciro bijyanye n’imiyoborere, akaba ari mu rwego rwo kubongerera ubumenyi n’ubushobozi, ngo nibakenerwa gufasha mu miyoborere n’iterambere ry’igihugu bazabe bafite ubumenyi buhagije bwo kujya mu nzego zinyuranye z’igihugu.

Ngendahimana avuga kandi ko guhabwa iri ishimwe n’Umukuru w’Igihugu ari uko abayobozi b’uturere n’ababungirije batagira umwanya wo kujya kwiga mu gihe bakiri muri iyi mirimo, bitewe n’inshingano baba bafite, ngo iyo barangije manda zabo rero bahabwa uburyo bwo gukomeza amashuri kuko noneho baba bafite umwanya wo kwiga no kwiyungura ubumenyi mu bijyanye n’imiyoborere.

Asobanura ko iri shimwe Perezida wa Repubulika agenera abayobozi b’uturere basoje neza manda zabo ritareba abayobozi bagiye begura kuri izi nshingano cyangwa abahamwe n’amakosa atuma bakurikiranwa n’inkiko.

Ngendahimana avuga ko iyi gahunda y’ishimwe ry’Umukuru w’Igihugu yatangiye kuva mu mwaka wa 2015, ikiciro cya mbere cy’aboherejwe kwiga kikaba cyararangije amasomo gihabwa n’impamyabumenyi, ab’ikiciro cya kabiri bakaba batarasoza.

Avuga ko aboherezwa kwiga na bo bagirana amasezerano na RALGA yo kuzatanga umusanzu mu gutanga ubumenyi ku bandi igihe cyose bazaba bakenewe.

Yongeyeho ko iyo bakenewe mu nzego z’imitegerekere y’igihugu n’izindi nka zo bitabira gutanga umusanzu aho bikenewe, ariko kandi akavuga ko badahabwa akazi muri RALGA cyangwa ngo bagasabirwe na yo, ahubwo ngo bitabira gupiganira isoko ry’umurimo nk’abandi Banyarwanda bose.

Ati: “Abahabwa ishimwe ry’imperekeza na Perezida iyo barangije amasomo yabo nta bwo RALGA ibashakira imirimo, barayishakira ariko iyo hari aho bakenewe gutanga umusanzu na byo barabikora”.

Ngendahimana avuga ko iyi gahunda yatanze umusaruro kuko yafashije abahoze ari abayobozi b’uturere kongera ubumenyi mu miyoborere no gutanga umusanzu mu iterambere ry’igihugu.

Kambayire Apolline, yahoze ari umuyobozi wungirije w’Akarere ka Nyanza, wasoje manda ye neza, akaba umwe mu boherejwe kwiga amasomo y’imiyoborere muri kaminuza y’u Rwanda mu rwego rwo kubona impamyabumenyi y’ikiciro cya gatatu, ashimira cyane ubuyobozi bwarebye kure bugatanga aya mahirwe ku bahoze ari abayobozi mu turere, kuko byabafashje kurushaho kwiyungura ubwenge mu bijyanye n’imiyoborere, kuri ubu bakaba bakomeje gutanga umusanzu mu iterambere ry’igihugu kimwe n’abandi Banyarwanda.

Avuga ko amasomo yigishwa muri iki kiciro cya gatatu cya kaminuza ari ingenzi ku bantu bakora mu nzego z’ibanze, kuko bigishwa uburyo bwo gukora ubukangurambaga mu baturage, gutegura ijambo bitewe n’ikiciro cy’abo uribwira, gutegura ijambo ushyikiriza abaturage n’ibindi, akaba asanga abayobozi bagombye kunyura muri iri shuri mbere y’uko batangira imirimo yabo kuko byafasha cyane kurushaho.

Ati: “Urebye ubumenyi mvanye muri ririya shuri nyuma yo gusoza manda yange, nsanga iyo mbugira mbere yo gutangira imirimo y’ubuyobozi nahozemo byari kumbera byiza kurushaho, gusa nanone kwiga ni uguhozaho, ubu bumenyi burimo kumfasha gukora neza aho ndi, naho ni mu nzego z’ibanze, bumfasha gushyira mu bikorwa imirimo nsabwa kandi ndabyishimiye.”

Avuga kandi ko kwiga ikiciro cya 3 cya kaminuza mu miyoborere bifasha abasoje manda zabo z’ubuyobozi kuguma mu ihuriro ry’abayobozi b’inzego z’ibanze, bakungurana ibitekerezo, bakaba abaturage beza aho bari bagafasha n’ubuyobozi bubasimbuye ku bw’ubunararibonye mu byo bari bashinzwe.

Kambayire avuga ko ashimira ubuyobozi bw’igihugu bwazirikanye imirimo myiza abayobozi bacyuye igihe bakoreye igihugu, bukaba bwarabashyiriye uburyo bwo gutyaza ubwenge no kongera ubumenyi, yemeza ko na bo bazirikana ayo mahirwe bahawe, bakaba bahora biteguye gutanga umusanzu uwo ari wo wose bakenerwaho n’igihugu.

Avuga ko iyo bagiye kwiga ikiciro cya gatatu cy’amashuri makuru, batangirwa 80% na bo ubwabo bagasabwa 20%, bakiga kugeza barangije porogaramu y’ikiciro cya gatatu cya kaminuza mu masomo y’imiyoborere yegerejwe abaturage.

Ngandahimana Ladislas, Umunyamabanga nshingwabikorwa wa RALGA

TANGA IGITEKEREZO

Leave a Reply

Your email address will not be published. Required fields are marked *