16°C , Partly cloudy | Kigali-Rwanda

Kiziguro: BPR Atlas Mara yibutse abari abakozi bayo bazize Jenoside

Yanditswe na Amani Claude

Ku ya Apr 16, 2018 saa 12:24

Abakozi ba Banki y’Abaturage y’u Rwanda (BPR Atlas Mara) bifatanyije n’abaturage bo mu murenge wa Kiziguro mu karere ka Gatsibo gusoza iminsi 7 yo kwibuka ku nshuro ya 24 inzirakarengane zazize Jenoside yakorewe Abatutsi.

Abakozi ba BPR Atlas Mara batangije umuhango n’urugendo rwo kwibuka

Kuwa 13 Mata 2018 BPR Atlas Mara yabaye ikigo cy’imari cya mbere cyunamiye Abatutsi 14,865 bashyinguye mu Rwibutso rwa Jenoside rwa Kiziguro; uyu muhango wabanjirijwe n’urugendo rwo kwibuka, nyuma abakozi basobanurirwa amateka yihariye aka gace muri Jenoside kuko hiciwe Abatutsi bakusanyijwe bavuye muri komini zirenga eshatu.

Nyuma yo gusura urwibutso no kwibuka abahoze ari abakozi ba BPR bishwe muri Jenoside, Umuyobozi wa BPR Atlas Mara Maurice K. Toroitich yashyikirije ubuyobozi bw’Akarere ka Gatsibo inkunga ya miliyoni ebyiri z’amafaranga y’u Rwanda igenewe ibikorwa byo gusana Urwibutso rwa Kiziguro.

Umuyobozi wa BPR Maurice K. Toroitich n’Umuyobozi ushinzwe Iterambere ry’Ubukungu mu karere ka Gatsibo Manzi Theogene, bashyira indabo ku mva

Abakozi ba  BPR Atlas Mara bahise bifatanya n’abaturage b’i Kiziguro mu gusoza icyunamo, bagenera imiryango 15 y’abarokotse Jenoside yakorewe Abatutsi miliyoni 6 z’amafaranga y’u Rwanda yo kugura ibikoresho byo mu nzu.

Inkunga ya miliyoni 2 yahawe Urwibutso rwa Kiziguro

Uwanyirigira Egidie umwe mu bagize imiryango yatewe inkunga utuye mu kagari ka Gakomeye yashimye BPR Atlas Mara yabibutse mu gihe gito bari bamaze bimukiye muri izi nzu bubakiwe na Leta nk’abatishoboye.

Uwanyirigira Egidie umwe mu bagize imiryango yatewe inkunga

Yagize ati: “Ni ukuri nkimara kubyumva nabyakiriye neza, cyane ko hashize igihe gito batwubakiye, hakaba habonetse n’ibikoresho by’ibanze byo mu nzu. Twari twatangiye kuzibamo nta ntebe n’ibindi bikoresho dufite.”

Umuyobozi ushinzwe Iterambere ry’Ubukungu mu karere ka Gatsibo, Manzi Theogene yagarutse ku ruhare rukomeye BPR Atlas Mara yagize mu umushinga bafite wo gutunganya Urwibutso rwa Kiziguro.

Yagize ati “Inkunga baduhaye izafasha mu gukora inkuta zanditsweho amazina y’abashyinguwe mu rwibutso, kandi nk’uko bwanagize uruhare mu gufasha abaturage ndabasezeranya ubufatanye n’Akarere kugira ngo BPR ikomeze itere imbere mu bucuruzi bwayo.”

Inkunga ya miliyoni 6 yahawe imiryango 15 yarokotse Jenoside

Umuyobozi Mukuru wa Banki y’Abaturage y’u Rwanda (BPR Atlas Mara) Maurice K. Toroitich, yavuze ko bazakomeza gufatanya na Leta y’u Rwanda mu bikorwa by’iterambere, bagakomeza kuba hafi abarokotse Jenoside yakorewe Abatutsi bibanda ku batishoboye n’imiryango y’abahoze ari abakozi ba Banki y’Abaturage bishwe muri Jenoside.