26°C , Partly sunny | Kigali-Rwanda
APR FC ni iyo ikomeje kuyobora urutonde rwa shampiyona

Kiyovu yatsinze AS Kigali bituma APR FC ikomeza kuyobora shampiyona

Yanditswe na BUGINGO FIDELE

Ku ya 23-05-2018 saa 09:04:11

Kirehe FC 0-2 Sunrise FC 
Police FC 3-0 Espoir FC
Rayon Sports 1-1 Etincelles FC 
Miroplast FC 0-2 Musanze FC 
Gicumbi FC 0-0 Mukura
APR FC 6-0 Amagaju FC
Kiyovu 4-1 AS Kigali

Nyuma y’imikino y’umunsi wa 24, ikipe ya APR FC ni yo iyoboye urutonde rwa shampiyona n’amanota 47 yagize ubwo yatsindaga Amagaju FC ibitego 6-0.

APR FC ni iyo ikomeje kuyobora urutonde rwa shampiyona

Gukomeza kuyobora urutonde rwa shampiyona y’ikiciro cya mbere kuri APR FC byaturutse ku gutsindwa kw’ikipe ya AS Kigali yari imaze iminsi iyoboye.  Iyi kipe ya AS Kigali yatsinzwe na Kiyovu ibitego 4-1 byatsinzwe na Mustapha Francis watsinze ibitego 3 na Mugheni Fabrice ku ruhande rwa Kiyovu naho igitego rukumbi cya AS Kigali gitsindwa na Ndarusanze Jean Claude.

Nyuma y’uyu mukino, umutoza wa AS Kigali, Nshimiyimana Eric yavuze ko   umupira w’amaguru ari uku bigomba kugenda. Ati Ibyo twashakaga gukora byose  nta na kimwe cyakunze, tugiye gukomeza kwitegura umukino utaha”. AS Kigali igomba kwakira Bugesera FC tariki 25 Gicurasi 2018 mu mukino w’umunsi wa 25.

Umutoza wa Kiyovu, Casa Mbungo Andre yavuze ko ashimira abakinnyi be uko bitwaye. AtiTwakinnye n’ikipe ikomeye nayo yashakaga gutsinda ari nayo mpamvu umukino wari ufunguye”. Tariki 26 Gicurasi 2018, Kiyovu izasura Etincelles FC i Rubavu  ku mukino w’umunsi wa 25.

Kubera uyu mukino byahise biha amahirwe APR FC yo gukomeza kuyobora urutonde aho yari yitwaye neza itsinda Amagaju FC ibitego 6-0 mu mukino w’umunsi wa 24 wabaye tariki 21 Gicurasi 2018. Ibi  bitego bikaba byaratsinzwe na Hakizimana Muhadjiri, Bigirimana Issa, Sekamana Maxime watsinze 2, Twizerimana Onesme ndetse  na Nzubahimana Emmanuel witsinze igitego.

 Hari n’indi mikino yabaye

Indi mikino y’umunsi wa 24 yabaye, Kirehe FC yatsinzwe na Sunrise FC ibitego 2-0, Police FC itsinda Espoir FC ibitego 3-0, Rayon Sports inganya na Etincelles FC igitego 1-1, Musanze FC itsinda Miroplast FC ibitego 2-0 naho Gicumbi FC inganya na Mukura 0-0. Umukino wagombaga guhuza ikipe ya Bugezera FC na Marines FC nta bwo wabaye kuko abakinnyi ba Marines FC bari mu ikipe y’igihugu y’abatarengeje imyaka 20 bari muri Zambia.

Nyuma y’iyi mikino y’umunsi wa 24, APR FC irayoboye n’amanota 47 n’umukino umwe w’ikirarane, ikurikiwe na AS Kigali n’amanota 45 ikaba ifite imikino 2 y’ibirarane, ku mwanya wa 3 hari Kiyovu n’amanota 41 n’umukino umwe w’ikirarane, ku mwanya wa 4 hakaza Rayon Sports ifite amanota 37 n’imikino 4 y’ibirarane. Ikipe ya Miroplast FC ni yo iri ku mwanya wa nyuma wa 16 n’amanota 17 n’umukino umwe w’ikirarane.

TANGA IGITEKEREZO

Leave a Reply

Be the First to Comment!

avatar