Kiyovu yahagaritse amasezerano y’abakozi bayo

Yanditswe na BUGINGO FIDELE

Ku ya 15-01-2021 saa 19:55:20
Kiyovu yamaze guhagarika amasezerano y'abakozi bayo

Kuva taliki 12 Ukuboza  2020, Minisiteri ya Siporo “MINISPORTS” yasabye ishyirahamwe ry’umupira w’amaguru mu Rwanda “FERWAFA” guhagarika shampiyona y’ikiciro cya mbere mu mupira w’amaguru  ya 2020-2021 mu bagabo  nyuma y’uko  amwe mu makipe atubahirije ingamba zo kwirinda no kurwanya  COVID-19.

Ibi byahise binahurirana n’uko ikipe y’igihugu “Amavubi” igomba  gutangira kwitegura imikino ya nyuma y’Afurika mu bakinnyi bakina imbere mu gihugu “CHAN 2021”, irushanwa rizatangira ku munsi w’ejo taliki 16 Mutarama 2021  muri Cameroun.

Kuri uyu wa Gatanu taliki 15 Mutarama 2021, ikipe ya Kiyovu ibinyujije ku rubaga rwayo rwa “Twitter” yatangaje ko bashingiye kuri iki cyemezo  cyo gusubika shampiyona bafashe umwanzuro wo gusubika amasezerano y’abakozi kugeza igihe irindi tangazo risubukura amarushanwa rizatangarizwa.

Bakomeza bavuga ko  ikipe izakomeza gushakisha uburyo bwo gufasha abakozi mu gihe bishoboka muri ibi bihe bigoye Isi yose yugarijwe na COVID-19.

Hatagize igihinduka bitewe n’iki cyorezo, shampiyona y’icyiciro cya mbere ishobora gusubukurwa nyuma y’imikino ya CHAN 2021, taliki 14 Gashyantare 2021.

Ikipe ya Kiyovu nyuma yo kubona ubuyobozi bushya  burangajwe imbere na Mvukiyehe Juvenal  kuva muri Nzeri 2020 yihaye intego yo kwegukana igikombe aho ubuyobozi  bwubatse ikipe bugura abakinnyi bakomeye bafite n’ubunararibonye ndetse  bunazana n’umutoza Karekezi Olivier. Gusa shampiyona yahagaritswe nyuma y’umunsi wa 3 aho iyi kipe  muri iyi mikino yari imaze gutsindwa 2 igatsinda umwe.

Umwanditsi:

BUGINGO FIDELE