18°C , Partly cloudy | Kigali-Rwanda
Iyi ni imidugudu mu Karere ka Kirehe yubakirwa abatishoboye n'abakurwa mu manegeka, ni igikorwa kigikomeza nk'uko gahunda ya Guverinoma yo gutuza neza Abanyarwanda imeze (Foto Manishimwe N.)

Kirehe: Frw 1 800 000 000 amaze gushorwa mu gutuza abatishoboye 188

Yanditswe na MANISHIMWE NOËL

Ku ya 04-01-2018 saa 08:34:56

Imiryango y’abatishoboye n’abakuwe mu manegeka igera ku 188 yo mu Karere ka Kirehe mu Ntara y’Uburasirazuba ni yo imaze gutuzwa mu Midugudu y’Ikitegererezo yubatswe hirya no hino mu mirenge y’aka karere. Ibikorwa byo kuyubaka bikaba bimaze gutwara amafaranga y’u Rwanda asaga miliyari imwe na miliyoni 800.

Gutuza abaturage mu Midugudu y’Ikitegererezo biri muri gahunda ya Leta y’u Rwanda yo kunoza imiturire, aho abaturage batishoboye batuzwa n’abandi bagashishikarizwa gutura  neza mu midugudu myiza,  hafi y’ibikorwaremezo.

Iyi ni imidugudu mu Karere ka Kirehe yubakirwa abatishoboye n’abakurwa mu manegeka, ni igikorwa kigikomeza nk’uko gahunda ya Guverinoma yo gutuza neza Abanyarwanda imeze (Foto Manishimwe N.)

Mu Kiganiro n’Imvaho Nshya, Umuyobozi w’Akarere ka Kirehe  Muzungu Gerald  avuga ko kuva mu mwaka wa 2015 kugeza mu wa 2017 usojwe muri aka karere  hamaze kubakwa Imidugudu y’Ikitegererezo itatu, mu Mirenge ya Nasho ahatujwe imiryango 144, Mpanga ahatujwe imiryango 32 na Nyamugali ahari gutuzwa imiryango 12 imaze gutwara amafaranga y’u Rwanda asaga miliyari imwe na miliyoni 800.

Ku ikubitiro iyo midugudu yatujwemo abatishoboye n’abakurwa mu manegeka, uretse uwo mu Kagari ka Bukora, mu Murenge wa Nyamugali hagiye gutuzwa imiryango y’Abanyarwanda birukanywe muri Tanzaniya  batari babona amacumbi.

Abatujwe muri iyi midugudu batanga ubuhamya bw’uko bishimira iyi miturire myiza, bagashimira  Leta y’u Rwanda.

Aba ni abamaze imyaka 2 batujwe mu Mudugudu w’Ikitegererezo wa Nasho, kuva mu mwaka wa 2015, baganiriye n’Imvaho Nshya barimo Ntigurirwa Gaudence ugira ati “Mbere twari dutuye nabi, tukaryama ku bishangi (ibishogoshogo by’ibishyimbo), tukarwara inda n’amavuja. Ibyo twarabisezereye, twibereye mu nzu nziza.”

Mugenzi we witwa Ntakinanirimana Jean d’Amour na we avuga ko gutuzwa muri uwo Mudugudu w’Ikitegerezo byatumye baruhuka ingendo bakoraga bajya gushaka amazi kuko begerejwe umuyoboro w’amazi meza n’ibindi bikorwaremezo.

Agira ati “Nk’iki ni ikigega kirimo amazi (kiri ku nzu batujwemo), iyi ni robine. Turakanda ku gikuta umuriro ukaka, twegereye isoko n’ivuriro rigiye kuzura, nta cyo Leta itadukoreye.”

Muzungu Gerald,   Umuyobozi w’Akarere ka Kirehe avuga ko  abatujwe muri uyu mudugudu basabwa gufata neza ibikorwaremezo biwugize, no gukora cyane, bagakoresha amahirwe y’iterambere  n’ibikorwaremezo baba begerejwe;    bakiteza imbere.

Muzungu Gerald, umuyobozi w’Akarere ka Kirehe

Ati “Tumaze gutanga amafaranga yose hamwe arenga miliyari imwe na miliyoni 800 Leta yashyizemo. Ni agaciro rero igihugu kiba cyahaye Abanyarwanda.    Kandi iterambere rirambye ni iryo abo rigenewe bagiramo uruhare. Amazu  baba bahawe tubasaba kuyafata neza, bakayagirira isuku, no gukora ibikorwa bibateza imbere, ku buryo azabafasha gutera imbere.”

Muri buri Mudugudu w’Ikitegererezo wubakwa, haba harimo igikumba rusange abatujwemo bakoreramo ubworozi, kandi ukaba uri hafi y’ibikorwaremezo byinshi nk’amazi, amashanyarazi, ivuriro, imihanda myiza, ibigo by’amashuri, imyuga n’ikoranabuhanga n’aho kwidagadurira.

Mu mihigo y’Akarere ka Kirehe y’uyu mwaka wa 2017-2018 harimo ibikorwa byo kurangiza kubaka Umudugudu w’Ikitegererezo wa Nyamugali, no kwagura iya Cyambwe muri Nasho na Mpanga hongerwamo izindi nzu, n’ibikorwaremezo nk’amashuri, ibyumba by’imyidagururo n’inama, imihanda mito mito n’ibindi bizatwara amafaranga y’u Rwanda arenga miliyoni 500.

TANGA IGITEKEREZO

Leave a Reply

Be the First to Comment!

avatar