Kirehe: Bungutse ibyumba by’amashuri 28 bizagabanya ubucucike mu mashuri

Yanditswe na MANISHIMWE NOEL

Ku ya 04-02-2018 saa 10:30:53
Ibi byumba bitarubakwa abanyeshuri bicaraga ku ntebe ari 5, none bari kwicara bisanzuye (Foto Manishimwe N)

Abanyeshuri n’abarezi ku Rwunge rw’Amashuri rwa Gashongora (GS Gashongora), mu Murenge wa Gahara, mu Karere ka Kirehe, bavuga ko bashimira Leta yashyizeho gahunda yo kubaka ibyumba by’amashuri bine kuri iri shuri.

Ibi byumba bitarubakwa abanyeshuri bicaraga ku ntebe ari 5, none bari kwicara bisanzuye (Foto Manishimwe N)

Bakagaragaza ko bije ari igisubizo ku kibazo cy’ubucucike cyabangamiraga imyigire y’abanyeshuri, kuko mbere bigaga bicaye ku ntebe ari 5, ibi byumba bishya bikaba bigiye gutuma bazajya biga bicaye ku ntebe ari 2 cyangwa 3.

Ibi byishimo abanyeshuri n’abarezi bo kuri iri shuri babigaragaje tariki ya 02 Gashyantare 2018, ubwo Ubuyobozi bw’Akarere ka Kirehe bwifatanyaga n’abaturage mu gutaha ibyumba 4 bishya byubatswe kuri iki kigo cy’amashuri cya G.S Gashongora, kiriho gahunda y’uburezi bw’ibanze bw’imyaka 9.

Ibi byumba 4 byubatswe kuri iki kigo, ni bimwe muri 28 n’ubwiherero 36 byubatswe hirya no hino mu mirenge 12 igize Akarere ka Kirehe mu buryo budasanzwe, gahunda yatangijwe mu mpera z’umwaka wa 2017.

Kwihangana Simon Pièrre, umwarimu wigisha mu Rwunge rw’Amashuri rwa  Gashongora, avuga ko ibi byumba 4 byubatswe kuri iki kigo bije ari igisubizo gikomeye ku kibazo cy’ubucucike bari bafite, bwanagiraga ingaruka zikomeye ku ireme ry’uburezi batanga.

Yagize ati “Ubu ibi byumba bine (4) bitashywe, hatangiye kwigiramo abanyeshuri bo mu mwaka wa mbere no mu wa gatandatu. Bije ari igisubizo cyane kuko ubundi mu ishuri harimo abana 100, ubu ibi byumba ubwo tubibonye  biradushimishije, wenda nta bwo bihagije  ariko  ni inkunga ikomeye.  Nibura abana bagiye kujya biga bicaye ku ntebe ari 3, mu gihe ubundi bicaragaho babyigana ari 4-5.”

Kwihangana akomeza avuga ko kuba ikibazo cy’ubucucike kivuyeho, bigiye kuzamura ireme ry’uburezi, umusaruro ukazagaragarira mu mitsindishirize.

Yagize ati “Ku myigishirize iyo ufite abana benshi kubakurikirana usanga bigoye. Ubu bigiye gutanga igisubizo ku myigishirize n’imyigire kandi n’ireme ry’uburezi  rigiye kunozwa. Intebe zabonetse, twabonye amashuri meza, ubu tugiye kwita ku bana tunabakurikirane neza.”

Abanyeshuri  biga mu Rwunge rw’Amashuri rwa Gashongora na bo bavuga ko imyigire yabo igiye kurushaho kuba myiza nk’uko bigaragazwa  na Tuyisabimana Jean Claude, wiga mu mwaka wa mbere  mu burezi bw’imyaka 9.

Yagize ati “Bigiye kudufasha kwiga, amasomo agende neza, harimo ibikoresho n’intebe nziza bizadufasha kwiga.Tuzatera imbere mu bumenyi, no gutsinda.”

Mugenzi we witwa Mushimiyimana Dévotha, nawe yagaragaje ko kuba bicaraga ari 5 ku ntebe byababangamiraga cyane, ku buryo wasangaga hari n’abinubira kuza kwiga bitewe no kutisanzura mu ishuri.

Yagize ati “Twajyaga twicara turi bane cyangwa batanu ku ntebe imwe, ariko ubu ni byiza tuzajya twicara turi babiri cyangwa batatu. Bizadufasha kunguka ubumenyi no kwiga twisanzuye kuko ubundi kubera ko twabaga turi benshi   byatubangamiraga, twabyiganaga.”

Mukandarikanguye Géraldine, Umuyobozi w’Akarere ka Kirehe wungirije ushinzwe  imibereho myiza y’abaturage, avuga ko ibi byumba by’amashuri bije gukemura ikibazo cy’ubucucike, gusa akagaragaza ko ikibazo cy’ubucucike  mu bigo by’amashuri  muri aka karere kigihari, hakaba hakenewe  ubufatanye  ngo gikemuke burundu.

Yagize ati “Nta bwo turagera kuri 50% ku byo twifuza gukora ku kibazo cy’ubucucike, turacyakeneye kubaka ibyumba bindi by’amashuri, hari n’imirenge twubatsemo ibyumba bindi by’amashuri bitari muri iyi gahunda idasanzwe.

Ni gahunda ikomeje gushyira imbaraga mu kubaka ibyumba by’amashuri kugira ngo hatabaho abana babuzwa amahirwe yo kwiga bitewe n’impamvu iyo ari yo yose.”

Ubuyobozi bwashimiye abaturage bo muri aka karere ubushake n’umusanzu batanze mu kubaka ibyumba by’amashuri byatashywe, abanyeshuri basabwa kwiga bashyizeho umwete, kandi buri mwana wese ugejeje igihe cyo kwiga; akiga.

Ibyumba by’amashuri 28 n’ubwiherero 36 bwubatswe mu buryo budasanzwe  kuva muri Nzeri 2017 mu Karere ka Kirehe, byuzuye bitwaye amafaranga y’u Rwanda agera kuri miliyoni 196, byubatswe ku bufatanye bw’inzego zitandukanye zirimo Akarere,  abaturage n’ingabo z’u Rwanda.

Abaturage bo muri aka karere kandi basabwe kugira uruhare mu kubungabunga ibi byumba by’amashuri byubatswe, dore ko banazi imbaraga nyinshi byasabye, kuko n’abo ubwabo babigizemo uruhare.

Iyi gahunda yo kubaka ibyumba by’amashuri bishya no gusana ibishaje iri mu turere twose tw’igihugu, ikaba yaratekerejwe mu gukemura ikibazo cy’ubucucike mu mashuri, bwatumaga hamwe na hamwe abana batiga neza.

 

Umwanditsi:

MANISHIMWE NOEL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.