19°C , Partly cloudy | Kigali-Rwanda
Abaturage bakanguriwe kujya bisuzumisha indwara zirimo n'iz'amaso (Foto Archives)

Kirehe: Abagera kuri 211 basuzumwe amaso

Yanditswe na MANISHIMWE NOËL

Ku ya 11-10-2018 saa 18:53:57

Mu kwizihiza Umunsi Mpuzamahanga wo kubungabunga amaso, abaturage bo mu Karere ka Kirehe bahawe ubujyanama bwo kuyabungabunga, abagera kuri 211 barasuzumwa.

Muzungu Gerald, Umuyobozi w’Akarere ka Kirehe, yasabye abaturage kujya bitabira kwisuzumisha amaso no kuyivuza hakiri kare ku bayarwaye, kuko iyo yangiritse iterambere rya nyirayo, abamukomokaho; n’iry’igihugu muri rusange ridindira.

Yagize ati: “Ni byiza ko dukumira indwara harimo n’iz’amaso, kuko ni indwara mbi, ziri mu bintu byatuma umuntu atabasha gukora ubuhinzi n’ubworozi, ntiwakora ubucuruzi urwaye amaso, kandi byagira ingaruka nyinshi ku mibereho y’uyarwaye, ku muryango we no ku gihugu muri rusange”.

Yasabye kandi abaturage kureka imyumvire idakwiye, igifitwe na bamwe barwara amaso ntibihutire kwivuza bikaba byabaviramo ubumuga.

Ati: “Dukwiye gufatanya tukamagana ubujiji bwa bamwe mu barwara ntibage kwivuza, kandi bakabaye bivuje bakavuga ko barozwe, aho kugira ngo bage kwisuzumisha hakiri kare, bikagera aho bapfa cyangwa bakamugara. Ibyo dufatanye tubyirinde, kandi dufite abafatanyabikorwa badufasha; dufite ibitaro by’Akarere, tukagira n’abafatanyabikorwa barimo ‘Fred Hollows Foundation’ badufasha kurwanya uburwayi bw’amaso no kubuvura”.

Abaturage bakanguriwe kujya bisuzumisha indwara zirimo n’iz’amaso (Foto Archives)

Ntorano Claude, umuturage w’imyaka 70 wo mu Murenge wa Mahama wavuwe indwara y’ishaza agakira, yatanze ubuhamya bw’uburyo yari yaragize ikibazo cy’ubuhumyi, ariko nyuma yo kuvurwa akaba abona.

Ati: “Ubu ngiye kumara umwaka ndeba neza, ariko namaze imyaka irenga 3 ntabona, icyo gihe nta kintu nakoraga kuko narakanuraga ariko sinabashaga kureba umuntu ngo mumenye, navuriwe ku Bitaro bya Kirehe”.

Hitiyaremye Nathan, Umuyobozi w’Ishami ry’Ubuzima mu Karere ka Kirehe yabwiye Imvaho Nshya ko nubwo bamwe mu bantu batita ku kwisuzumisha no kwivuza amaso hakiri kare, bagirwa inama yo kujya babikora kuko iyo hari abafite uburwayi bworoheje bahabwa imiti, abafite ikibazo cyo kutabona neza bahagabwa indorerwamo, abatarwaye bakagirwa inama y’uburyo bakwirinda”.

Hitiyaremye avuga ko ubugenzuzi bwakozwe n’Akarere ka Kirehe mu kwezi kumwe kwa Gicurasi 2017 bwagaragaje ko mu mirenge 12 ikagize, harimo abafite ibibazo by’uburwayi butandukanye bw’amaso 636.

Mu mwaka ushize wa 2017-2018 ku bufatanye n’umuryango ‘Fred Hollows Foundation’ n’Ibitaro by’Akarere ka Kirehe abantu bagera ku 131 bafite ikibazo k’ishaza barabazwe, baravurwa, hasigara abagera kuri 80 bo ngo biteganyijwe ko bazabagwa mu mpera z’uyu mwaka wa 2018.

Umunsi mpuzamahanga wo kubungabunga ubuzima bw’amaso ubusanzwe wizihizwa buri wa mwaka, ku munsi wa Kane w’icyumweru cya kabiri cy’ukwezi k’Ukwakira. Uw’uyu mwaka ufite insangamatsiko igira iti: “Ubuvuzi bw’amaso kuri bose”.

Habayeho no gusuzuma Diyabete n’umuvuduko ukabije w’amaraso ku bantu 94.

TANGA IGITEKEREZO

Leave a Reply

Your email address will not be published. Required fields are marked *