17°C , Partly sunny | Kigali-Rwanda
Kayirebwa ubwo yaririmbaga

Kigali:Kidum na Kayirebwa bashimishije abantu

Yanditswe na admin

Ku ya 27-12-2017 saa 12:02:33

Nimbona Jean Pierre uzwi nka Kidum, umuhanzi ukomoka mu Burundi ariko akaba aba  muri Kenya we na Cécile Kayirebwa umwe mu  bahanzikazi bafite ubunararibonye muri muzika nyarwanda mu ijoro ryo  ku ya 22 Ukuboza 2017 i Kigali i Gikondo muri Expo Ground bataramiye abantu  barishimna.

Kayirebwa yageze ku rubyiniro saa tatu z’ijoro zirengaho iminota 23 maze aririmbira abantu indirimbo ze zitandukanye zirimo iyitwa “Inzozi”, “Iwacu”, “None twaza”, “Mazi ya nyanja, “ Inyange” n’izindi.

Ubwo Kayirebwa yari ku rubyiniro aririmbira abantu yafashwaga n’abahanzi barimo kuzamuka mu muziki barimo uwitwa Ange n’undi witwa Pamela ubusanzwe  bakunda cyane no gusubiramo indirimbo ze.

Ku rundi ruhande kandi n’abantu bari mu gitaramo ubwo  Kayirebwa yabaga arimo kubaririmbira bamwe bahagurukaga bagacinya  akadiho.

Umuhanzikazi Kayirebwa yakoze uko ashoboye kugira ngo ashimishe abantu gusa yakunze gutenguhwa n’ibyuma bya muzika bitavugaga neza mu mwanya muto ubundi bikongera bikavuga neza.

Bamwe mu banyeshuri biga mu ishuri rya Green Hills baje kuza kujya ku rubyiniro kuramutsa Kayirebwa kuko  ibihangano bye bituma barushaho gukunda umuco nyarwanda.

Saa yine  z’ijoro n’iminota 35  zigeze, Kayirebwa yaje gusezera ku rubyiniro hajyaho Hope Irakoze asubiramo indirimbo z’abahanzi batandukanye barimo “ Yasa n’irirenga” indirimbo y’i Burundi ndetse n’izindi zirimo iyitwa “Vimba vimba” itsinda rya Three Hills abarizwamo ryakoranye indirimbo na Kidum iza no gukundwa cyane.

Ubwo saa  tanu z’ijoro zageraga Kidum yasesekaye ku rubyiniro aririmbira abantu indirimbo ze nyinshi zirimo iyitwa “ Amozi y’urukundo”, “Nitafanya”, yakoranye na Lady Jay Dee, “ Haturudi nyuma” yakoranye na Juliana Kanyomozi  gusa yanaririmbye n’izindi.

Uyu muhanzi n’ubusanzwe uzwiho ubuhanga bwinshi mu muziki yashimishije abantu cyane.

Mbere y’uko kandi aba bahanzi  bombi  bajya ku rubyiniro  habanjeho  abahanzi barimo itsinda ribyina ry’Inganzo ngari.

Iri torero naryo ryashimishije abantu cyane ubwo ryababyiniraga bijyanye n’umuco nyarwanda.

Igitaramo cyabaye cyahawe inyito ya “Rwanda Konnect Gala” cyari kigendereye guhuza  ababa mu mahanga baje mu Rwanda mu kiruhuko n’inshuti  ndetse  n’imiryango  yabo.

Miss Queen Kalimpinya, Miss Keza Joannah  na Kate Bashabe bari mu bitabiriye iki gitaramo. Intore Masamba na we kandi yari muri icyo gitaramo.

 NDAMYIROKOYE FRANÇOIS

TANGA IGITEKEREZO

Leave a Reply

Your email address will not be published. Required fields are marked *