22°C , Partly cloudy | Kigali-Rwanda

Kigali: Umusore wo muri Congo wacuruzaga abakobwa yishwe arashwe

Yanditswe na Imvaho Nshya

Ku ya 01-08-2020 saa 19:10:34

Urwego rw’Igihugu rw’Ubugenzacyaha (RIB) rwatangaje ko David Shukuru Mbuyi, umuturage wa Repubulika Iharanira Demokarasi ya Congo (RDC), yishwe arashwe ubwo yageragezaga gutoroka ubutabera aho yari afungiwe kuri Sitasiyo ya Polisi ya Nyarugunga mu Karere ka Kicukiro mu Mujyi wa Kigali.

Uyu musore w’imyaka 25 y’amavuko yari akurikiranyweho icyaha cyo gushora abana b’abakobwa mu busambanyi n’icyo gucuruza abantu.

Ubuyobozi bwa RIB butangaza ko Mbuyi yari akiri gukorwaho iperereza nk’umwe mu bari mu ruhererekane rw’ubucuruzi bw’abana b’abakobwa bo mu Rwanda bashorwa mu mwuga w’uburaya haba mu Rwanda no mu mahanga.

Yatawe muri yombi mu ntangiriro z’iki cyumweru hamwe n’abakobwa b’Abanyarwandakazi bane bafashwe bakwirakwiza amashusho y’urukozasoni ku mbuga nkoranyambaga, bagamije kwicuruza.

Bahorera Dominique, Umujyanama w’ Umunyamabanga Mukuru wa RIB akaba arimo gukora nk’Umuvugizi w’Umusigire, yabwiye itangazamakuru ko Mbuyi ngo yabanzaga guha  abana b’abakobwa ibiyobyabwenge mbere yo kubakoresha ibikorwa by’urukozasoni birimo no kwiyerekana bambaye ubusa, hanyuma akabacuruza kugira ngo bage kubasambanya.

Bahorera yagize ati: “Icyo aba agamije ni uko abantu iyo bamaze kureba amashusho y’umukobwa wambaye ubusa bahindukira bakamubwira ko bumva bashaka kuryamana na we, icyo gikorwa kiganisha ku icuruzwa ry’abantu n’ibiyobyabwenge, kandi harimo no kwangiza umuco Nyarwanda”.

Bivugwa ko iraswa ry’uyu muturage wo muri Congo ryamaze kumenyeshwa Ambasade ya Repubulika Iharanira Demokarasi ya Congo iherereye i Kigali, ndetse iperereza rirakomeje kuri iki kirego gishobora kuba kirimo abandi bari mu ruhererekane rwo gucuruza abantu.

 

Umwanditsi:

Imvaho Nshya

One Comment on “Kigali: Umusore wo muri Congo wacuruzaga abakobwa yishwe arashwe”

  1. Rwose nago bikwiyeko abanyarwanda kazi
    Bashyira ubwambure bwabo kukarubanda
    Ibyo nuguta umucyo ,hakurikijwe amategeko
    Babskanire urubakwiye.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.