21°C , Intermittent clouds | Kigali-Rwanda
Bishop Margret Rwandamura, Umuyobozi mukuru w'Itorero rya UCC-Gikondo

Kigali: UCC-Gikondo yateguye igiterane k’ivugabutumwa

Yanditswe na Nkomeje Guillaume

Ku ya 29-07-2019 saa 12:37:28

Itorero rya United Christian Church “UCC-Gikondo”, Ishami rya Gikondo ryateguye igiterane k’ivugabutumwa kiza gutangira ku gicamunsi cyo kuri uyu wa 29 Nyakanga kizasozwe tariki 04 Kanama 2019.

Iki giterane ngarukamwaka gifite insanganyamatsiko igira iti “Umwaka umwami agiriyemo imbabazi”, iboneka mu gitabo cy’ubutumwa bwiza bwa Luka ibice 4, umurongo wa 18 n’uwa19 (Luka 4:18-19).

Mu kiganiro kihariye Imvaho Nshya yagiranye n’Umushumba Mukuru w’Itorero rya UCC-Gikondo, Bishop Margret Rwandamura yatangarije ko iki giterane bagiteguye kugira ngo bagarure ububyutse ku bakrisito b’itorero.

Avuga ko iki giterane cy’uyu mwaka bafite intego yo kugikoreramo umurimo wo kwamamaza ubutumwa bwiza kugira ngo abantu babohoke bave mu mbaraga z’umwanzi satani.

Yagize ati “Ni igiterane, duhora dutegura buri mwaka kikaba kirema ububyutse mu itorero, kuri iyi nshuro kije ari igiterane kibanda cyane ku ivugabutumwa kugira ngo abantu babohoke bave mu byaha, bave mu nzira mbi kandi bave no mu mbaraga mbi z’umwanzi satani n’uburyo atoteza abantu.”

Bishop Margret Rwandamura avuga ko iki giterane bakitezeho umusaruro w’ububyutse ku Itorero rya Kristo.

Ati “Tukitezeho umusaruro cyane, uwa mbere ni uwo gusubizwamo intege ku itorero ndetse n’abatari bakizwa bashobora kukizamo bakakira Kristo Yesu nabo ntabwo bahejwe.”

Asaba abantu kuzitabira iki giterane ari benshi. Ati “Icyo twasaba abantu ni ukwitabira. Twifuza ko umuntu wese yakitabira akajya aza muri iki giterane buri munsi kuko abantu bazagira urwego bavaho bagere ku rundi rwego mu nzira y’agakiza.”

Muri iki giterane kizaba kirimo abakozi b’Imana batandukanye barimo; Apostle Charles Rwandamura,Umuyobozi Mukuru w’Itorero rya UCC mu Rwanda, Bishop Margret Rwandamura, Bishop Bagambe Moses, Pastor Mugeme Thomas na Pastor Emma Masisi.

Kizaba kirimo kandi n’amatsinda aririmba indirimbo zo kuramya no guhimbaza Imana arimo; Worship Team (UCC-Gikondo), Worship Team (UCC-Niboye), Korali Imigezi y’ubugingo, Blessed Generation (UCC Niboye), Korali Abanyamugisha, Planet Shakers (UCC Gikondo) n’umuhanzi Pastor Kayiranga.

Iki giterane kizajya kibera ku itorero rya UCC-Gikondo mu masaha y’umugoroba.

Bishop Margret Rwandamura, Umuyobozi mukuru w’Itorero rya UCC-Gikondo

Pastor Emma Masisi

Bishop Bagambe Moses

Apostle Charles Rwandamura,Umuyobozi Mukuru w’Itorero rya UCC mu Rwanda

Planet Shakers ya UCC Gikondo

Worship Team ya UCC-Gikondo, ni bambwe mu itsinda ririmba indirimbo zo kuramya no guhimbaza Imana bari muri iki giterane

TANGA IGITEKEREZO

Leave a Reply

Your email address will not be published. Required fields are marked *