19°C , Clear | Kigali-Rwanda

Kigali Peace Marathon 2018: Abakinnyi bazaserukira igihugu batangiye umwiherero

Yanditswe na NKOMEJE GUILLAUME

Ku ya 02-05-2018 saa 05:53:29

Tariki 20 Gicurasi 2018, i Kigali mu Rwanda hazabera isiganwa rya Marato Mpuzamahanga y’Amahoro “Kigali International Peace Marathon 2018” ku nshuro ya 14, abakinnyi 21 bazahagararira igihugu bamaze gutangira umwiherero urimo kubera mu Karere ka Gicumbi.

Nyirarukundo Salome ubwo yari amaze kwambikwa umudali wa zahabu na Minisitiri w’Umuco na Siporo, Uwacu Julienne nyuma yo kuba uwa mbere mu isiganwa riheruka mu 2017

Karasira Eric, umutoza w’aba bakinnyi yabwiye Imvaho Nshya ko uyu mwiherero ugamije kwitegura iyi  Marato Mpuzamahanga y’Amahoro  watangiye ku Cyumweru tariki 29 Mata ukazageza tariki 20 Gicurasi 2018.

Avuga ko muri uyu mwiherero barimo gukora cyane kugira ngo bazabashe kwitwara neza muri iyi Marato. Yagize ati Gahunda nta yindi, ni ukwitoza tugamije Kwitwara neza cyane muri iriya Kigali International Peace Marathon”.

Mu bakinnyi 21 bazaserukira igihugu muri iyi Marato bagabanyijemo ibice bibiri ari byo abazasiganwa mu kwiruka igice cya Marato (21 Km) abagore n’abagabo ndetse n’ikiciro cy’abagabo bazasiganwa mu kwiruka Marato (42km).

Mu isiganwa “Kigali International Peace Marathon 2017” ryabaye mu mwaka ushize wa 2017, Nyirarukundo Salome yegukanye umudali wa zahabu nyuma yo kuba uwa mbere mu gice cya Marato aho mu gusiganwa ibilometero  21 yakoresheje isaha  1, iminota 15 n’amasegonda 28.

Mu bagabo, uwabaye uwa mbere ni Kipkoech Kiptoo wo muri Kenya wakoresheje isaha 1, iminota 4 n’amasegonda 25  akurikirwa na Mutai Kimeli nawe ukomoka muri Kenya.

Muri  Marato,  Chumba Gilbert  wo muri Kenya ni we wabaye uwa mbere mu bagabo mu kwiruka ibilometero 42 akaba yakoresheje amasaha 2, iminota 19 n’amasegonda 49, yakurikiwe na mugenzi we, Kiyeng Kemboi Tallam James wegukanye iri rushanwa umwaka ushize wa 2016 bose bakaba bakomoka muri Kenya.

Mu bagore, abakinnyi bo muri Kenya ni bo bihariye imyanya y’imbere bayobowe na  Rutto Jepkorir wakoresheje amasaha 2, iminota 46 n’amasegonda 38 akurikirwa na  Bundotich ndetse na Sarah  Legat.

ABAKINNYI BARI MU MWIHERERO

Mu gusiganwa igice cya Marato (21km) mu bahungu  hari Sugira James, Myasiro Jean Marie Vianney (Mountain Classic Athletics Club), Hakizimana John, Tuyishime Christophe, Hitimana Noel, Ntawuyirushintege Potien (APR AC), Gakuru Dawidi (Rutsiro) ndetse na Manirafasha Primien (Rulindo).

Abakobwa ni Nyirarukundo Salome, Yankurije Marthe, Niragire Vivine (APR AC), Niyirora Primitive (NAS), Ntahobavukira Francine (Huye), Dushimirimana Claudine (Rutsiro AC) na Uwimana Consessa (Ngororero).

Mu gusiganwa muri Marato (42km) mu bagabo hari   Nizeyimana Alexis (APR AC), Dushimumukiza Thomas (Rutsiro), Shyaka Olivier (Rulindo), Dushimimana Gilbert (Bugesera), Ndagijimana Enock (Police AC) ndetse na Uwumukiza Marcel (Gicumbi).

TANGA IGITEKEREZO

Leave a Reply

Be the First to Comment!

avatar