25°C , Partly sunny | Kigali-Rwanda
Gahunda yo kubaka no kwagura imihanda mu Mujyi wa Kigali irakomeje, kandi igeze ku gipimo gishimishije (Foto Mutungirehe S.)

Kigali: Kubaka imihanda y’ibilometero 105 bigeze kuri 75%

Yanditswe na KAYITARE JEAN PAUL

Ku ya 12-03-2018 saa 06:26:02

Imirimo yo kubaka imihanda hirya no hino mu Mujyi wa Kigali irarimbanyije. Ubuyobozi bw’umugi butangaza ko umushinga wo gukora imihanda ku burebure bw’ibilometero 105, ugamije gukwirakwiza imihanda cyane cyane harebwa imihanda yunganira iminini, ubu ugeze ku kigero cya 75%.

Gahunda yo kubaka no kwagura imihanda mu Mujyi wa Kigali irakomeje, kandi igeze ku gipimo gishimishije (Foto Mutungirehe S.)

Umuyobozi ushinzwe ibikorwaremezo mu Mujyi wa Kigali, Eng. Rwunguko Jean d’Amour, avuga ko gukora iyi mihanda y’ibilometero 105 bigeze kuri 75% kandi ko ibi bikorwa mu rwego rwo kugira ngo imihanda igere aho abantu batuye no gukemura ikibazo cy’umubyigano w’imodoka ukunze kubaho no kugira ngo Kigali ibe umugi ugendwa n’abantu bagere ku kazi bakoresheje iyi mihanda.

Eng. Rwunguko atangaza ko iyi mihanda iri ku burebure bw’ibilometero 105 irimo kubakwa, umwaka w’ingengo y’imari utaha wa 2018/2019 izaba yarangiye. Ati “Uyu mushinga ugeze kuri 75% ushyirwa mu bikorwa, biteganyijwe ko uzarangira 2018/2019 akaba ari bwo uzaba ugeze ku 100%.  Ni umushinga urimo gukorwa mu bice bitandukanye by’Umujyi wa Kigali, birimo Nyamirambo, Gikondo, Kagarama, Gacuriro, ibice bya Gisozi, Kibagabaga na Kabuga noneho umushinga wose ukaba ari ibilometero 105.”

Hari imishinga minini mu Mujyi wa Kigali nko kwagura imihanda itari iyo mu makaritsiye, imihanda minini ihuza Kigali n’izindi Ntara ndetse ikanahuza n’ibindi bihugu. Nk’umushinga wa kilometero 54 urimo imihanda iva mu mugi igera mu Gatsata inyuze Nyabugogo, uva mu Kanogo, Rwandex na Prince House, n’umuhanda wo ku Irebero unyura i Gikondo, mu Miduha na Nyamirambo.

Haza n’igice kindi kiva Nyabugogo-Gitikinyoni, imihanda yose irimo gukorwa igomba kuzaba yarangiye mu mwaka wa 2019 mu kwezi k’Ukwakira nkuko Eng. Rwunguka yabibwiye Imvaho Nshya.

Ikibazo cy’umuhanda unyura ku kigo nderabuzima cya Gatenga mu karere ka Kicukiro utarakomeje ngo ukorwe ugere i Murambi nkuko byari biteganyijwe, Eng. Rwunguko avuga ko uyu muhanda wa Gatenga werekeza i Murambi inyigo yawo irimo gukorwa.

Ati “Inyigo y’umuhanda uva ku kigo nderabuzima cya Gatenga werekeza i Murambi irimo irakorwa nirangira uzahita ukorwa. Muri iyi gahunda ya Leta y’imyaka irindwi uyu muhanda urateganyijwe, ukazava mu Gatenga ku kigo nderabuzima kugera i Nyanza ndetse ugahita uhura n’indi mihanda irimo kwagurwa nka Nyanza, Rebero na Nyamirambo.”

Amatara ku mihanda

Bitewe n’ingengo y’imari iba yarateganyijwe, iyo hamaze kubakwa imihanda, hari ihita ishyirwaho amatara ariko hari n’indi idahita ishyirwaho amatara yo ku muhanda, ikazashyirwaho nko mu mwaka utaha ariko muri gahunda Umujyi wa Kigali ufite, ni uko umuhanda urangiza gukorwa hagahita hashyirwaho n’amatara yo ku muhanda.

Umukozi ushinzwe ibikorwaremezo mu Mujyi wa Kigali, Eng. Rwunguko, yagize ati “Si akazi gakorerwa rimwe umuhanda urabanza ukarangira, umwaka ukurikiyeho hakarebwa uko hashyirwaho n’amatara kugira ngo n’abawukoresha bawukoreshe neza nta kibazo bagize.”

Akomeza agira ati “Dufite umushinga wo gukwirakwiza amatara yo ku muhanda wa kilometero 25, tukagira n’umuhanda wa kilometero 20 na wo wenda kurangira. Turimo dutekereza no ku zindi karitsiye zose, aho imihanda yose iri haba hacanye ku buryo umutekano uba uri wose abantu bagashobora gukora amasaha 24/24.”

Ku rundi ruhande abatuye Umujyi wa Kigali barasabwa gufata neza ibikorwaremezo, bagafatanya kubibungabunga birinda kugenda bajugunya imyanda, bata uducupa, n’indi myanda iyo ari yo yose, ahubwo igashyirwa ahabugenewe, ikindi bakabuza abana babo kwegera amatara yo ku mihanda no kuyangiza.

Ruhurura zatekerejweho mu kurinda ibikorwaremezo

Umujyi wa Kigali watekereje uburyo bwo gufatanya n’abaturage kugira ngo amazi y’imvura afatwe, andi asagutse agende anyura muri za ruhurura hagamijwe kurinda ibikorwaremezo birimo imihanda.

Eng. Rwunguko akomeza avuga ko buri wa kabiri ubuyobozi bw’Umujyi wa Kigali buhura n’abaturage bukabakangurira gutunga ibigega by’amazi bakaba bayakoresha mu bintu bitandukanye.

Ati “Dusaba abatuye Umujyi wa Kigali gutunga ibigega ariko n’ubundi ibigega rimwe na rimwe ntibiba bihagije kuko bisaba ko tunabakangurira gucukura imyobo kugira ngo amazi avuye ku nzu zabo, age ajya muri iyo myobo abe yakongera gukoreshwa cyangwa se niba anakamye, akamire muri ibyo byobo ariko birumvikana ko hari n’amazi agenda agwa mu mihanda ndetse n’ahandi hadatuwe mu bice bitandukanye by’Umujyi wa Kigali bisaba ko habaho za ruhurura.”

Umujyi wa Kigali wiyemeje kubaka nibura ruhurura eshatu ndende buri mwaka. Ati “Izo dukoreye inyigo muri uyu mwaka tuba tuzazubaka mu mwaka utaha. Ubu mu mihigo ya 2017/2018 hari ruhurura tumaze kubaka. Dufite mu mihigo kubaka ruhurura ya Kabasengerezi, Mumena, na Rugenge, uwo ni umuhigo dufite kandi ugomba kurangira uyu mwaka ikindi ni uko imirimo imwe n’imwe yatangiye.” Biteganyijwe ko hazubakwa izindi ruhurura 3 zirimo ruhurura ya Kanyonyomba, Gatsata na Rwezamenyo.

Ubuyobozi bw’Umujyi wa Kigali bwiyemeje kujya bwubaka umuhanda, nyuma hagahita hashyirwaho na ruhurura kugira ngo ayo mazi age ahita ajya mu gishanga aho akwiye kujya.

TANGA IGITEKEREZO

Leave a Reply

2 Comments on "Kigali: Kubaka imihanda y’ibilometero 105 bigeze kuri 75%"

avatar
Sort by:   newest | oldest | most voted
GANZA ARTHUR
Guest

Mukomeze Imihigo bayobozi bacu turabemera.

Luimeme
Guest

Ko nta muhanda wa Kimisange numvise muyo Eng. Rwunguko yavuze