17°C , Partly cloudy | Kigali-Rwanda
Mukazayire Nelly, Umuyobozi mukuru wa Rwanda Convention Bureau (Foto/Ububiko)

Kigali ku mwanya wa 2 muri Afurika mu hantu heza ho gukorera inama n’ibirori

Yanditswe na Mutungirehe Samuel

Ku ya 16-05-2019 saa 12:16:23

Umuryango mpuzamahanga ufasha ba mukerarugendo n’abandi kumenya ahantu heza ho gukorera inama mpuzamahanga zikomeye (International Congress and Convention Association, ICCA) washyize Umujyi wa Kigali ku mwanya wa kabiri nk’ahantu heza ho gukorera inama n’ibirori ku mugabane w’Afurika.

Uyu muryango washyize Umujyi wa Kigali ku mwanya wa kabiri nyuma y’Umujyi wa Cape Town wo muri Afurika y’Epfo, muri raporo yawo ya 2018, Kigali ikaba igiye kuri uyu mwanya ivuye ku mwanya wa gatatu ku rutonde rwasohowe n’uyu muryango mu 2017.

Gushyira ku rutonde imigi ibereye inama n’ibirori, nk’uko uyu muryango ubitangaza, bishingira ku mubare w’inama zabereye muri uwo mugi mu mwaka umwe cyangwa ibiri, kandi nibura inama yaritabiriwe n’abantu batari munsi ya 50.

Umuyobozi nshingwabikorwa w’Ikigo gishinzwe ubukerarugendo bushingiye ku nama mu Rwanda (Rwanda Contention Bureau), Mukazayire Nelly, yavuze ko bashimishijwe n’umwanya mwiza Umujyi wa Kigali ugezeho, avuga ko bashishikajwe no kugera ku mwanya mwiza kurushaho binyuze mu kwakira inama nyinshi.

Ati “Twizera ko gukorana n’imiryango y’imbere mu gihugu bizafasha u Rwanda kuza imbere ku rutonde rw’umuryango ICCA mu myaka iri imbere. U Rwanda rwakiriye abantu 38.745 mu 2018, bavuye ku 28.308 mu 2017. Ubukerarugendo ni kimwe mu byinjiriza igihugu amadevize menshi kandi kwakira inama biri kugira akamaro kanini muri byo, kuko byihariye 20% y’ubukerarugendo bwose.

Ubukerarugendo bushingiye ku nama bwinjirije igihugu miriyoni 56 z’Amadorali y’Amerika mu 2018, kandi no muri uyu mwaka turizera ko aziyongera akagera kuri miriyoni 88 z’Amadolari y’Amerika.”

Umuyobozi mukuru wungirije w’Urwego rw’Igihugu rw’Iterambere, Hategeka Emmanuel, yavuze ko kuzamuka mu mwanya gutyo bikigaragaza ko ingamba zo guteza imbere ubukerarugendo, bwaba ubwo kwakira inama, abasura ibyiza nyaburanga, imurikagurisha n’ibindi bihesha agaciro u Rwanda.

Yongeyeho ko hamwe n’inkunga ya Guverinoma y’u Rwanda, kimwe n’urwego rw’abikorera, u Rwanda rwabashije kwigaragaza nk’ikerekezo ku mahitamo y’aho gukorera inama zitekanye, bitewe n’aho kwakirira inama hatandukanye, uburyo bwo gucumbikira abari mu nama, gutembera, na serivisi zihuse bitewe n’uruhare rw’ikigo cyo kwakira inama.

Umuryango ICCA uvuga kandi ko u Rwanda rwabaye ikerekezo mu kwakira inama n’ubukerarugendo bushingiye ku nama kubera uburyo rworohereza abantu kubona Visa ugeze mu gihugu, no gufasha abantu kugera mu gihugu bakoresheje indege ya RwandAir. Ngo mu Rwanda kandi hari amahoteri akomeye yo kwakira inama mpuzamahanga nka Kigali Convention Centre, umudugudu wa Kigali Conference and Exhibition Village na Intare Conference Arena n’indi ya Kigali Arena iri kubakwa, bikazatuma vuba aha u Rwanda ruza imbere ku mugabane w’Afurika.

Umusaruro w’ubukerarugendo bushingiye ku kwakira inama n’ibikorwa mpuzamahanga ugenda wiyongera cyane, mu myaka icumi ishize, aho mu 2010 u Rwanda rwinjije amadolari 17, 863, 560, mu 2013 rwinjiza miliyoni zisaga 23 z’amadolari, 2014 agera kuri miliyoni zisaga 29 z’amadolari, mu 2015 agera kuri miliyoni zisaga 37 z’amadolari.

Mu 2016 umusaruro wageze kuri miliyoni 47 z’amadolari, mu 2017 zigera kuri miliyoni zirenga 41 z’amadolari. Umwaka ushize, 2018, ubukerarugendo bushingiye ku kwakira inama bwinjije miliyoni 52 z’amadolari, zivuye mu kwakira inama 201 zitabiriwe n’abantu ibihumbi 35, bivuze ko hiyongereyeho miliyoni 11 z’amadolari.

Mukazayire Nelly, Umuyobozi mukuru wa Rwanda Convention Bureau (Foto/Ububiko)

TANGA IGITEKEREZO

Leave a Reply

Your email address will not be published. Required fields are marked *