25°C , Mostly cloudy | Kigali-Rwanda

Kigali: Imiryango 1100 ituye mu manegeka igiye kwimurwa vuba

Yanditswe na Sezibera Anselme

Ku ya 09-03-2020 saa 16:08:47
Gahunda yo kwimura abatuye ahashyira ubuzima bwabo mu kaga irakomeje, mu rwego rwo kubarengera bo n'ibyabo mu bihe nk'ibi by'imvura nyinshi

Mu gihe hateganywa kugwa imvura nyinshi mu bihe bya vuba nk’uko bitangazwa n’Ikigo k’Igihugu cy’Ubumenyi bw’Ikirere Meteo Rwanda, ubuyobozi bw’Umujyi wa Kigali buratangaza ko indi miryango igera ku 1100 ari yo itahiwe kwimurwa mu bice byagaragaye ko byashyira ubuzima bw’abahatuye mu kaga.

Byatangajwe kuri uyu wa 09 Werurwe 2020 mu kiganiro ubuyobozi bw’Umujyi wa Kigali, inzego zitandukanye bagiranye n’itangazamakuru hagamijwe kugaragaza imiterere y’umugi ndetse no kugaragaza ahantu hatameze neza ku bijyanye n’imvura ishobora guteza amazi menshi uduce tumwe na tumwe bikaba byashyira ubuzima bw’abantu bahatuye mu kaga.

Umuyobozi w’Umujyi wa Kigali Rubingisa Pudence avuga ko nyuma y’ibipimo by’imvura nyinshi iteganyijwe muri ibi bihe bahawe n’Ikigo k’Igihugu cy’Ubumenyi bw’Ikirere, Umujyi wa Kigali wasanze hari ibice bisabwa kwitabwaho by’umwihariko muri iyi minsi imvura igenda iba myinshi.

Yagize ati: “Mu gishanga cya Kangondo (Bannyahe) hari imiryango 297 ikodesha mu manegeka yahasigaye amazi agenda asatira aho batuye, hari kandi imiryango 131 ituye Mpazi igomba kuvanwamo kuko igenda isatirwa n’amazi kandi hakaba hakomeje ibarura ry’abantu”.

Minisitiri wa MINALOC Prof. Shyaka Anastase hagati, Minsitiri ushinzwe ubutabazi bw’ibanze Kayisire M. Solange iburyo hamwe na Meya w’umujyi wa Kigali Rubingisa Pudence(Foto Sezibera)

Rubingisa akomeza agaragaza ko uko kwimura iyo miryango bisaba Umujyi wa Kigali ingengo y’imari ingana n’amafaranga miriyoni 80 cyane cyane yo kubafasha gukodesherezwa mu gihe hari amazu 392 azaba amaze kuzura muri gahunda yo kubakira abatishoboye muri rusange, kandi hararebwa uburyo imibare y’abagomba gukodesherezwa yakwiyongera.

Gusa asobanura ko uvanywe mu bishanga atari buri wese wemererwa kuba yafashwa na Leta mu buryo bwo kubona kuri izo nzu ahubwo abasanzwe mu kiciro gifashwa ari bo bazarebwaho. Nk’uko abigarukaho, abavanwa mu bishanga bakomeza gukurikiranwa aho batuye, abasanzwe mu byiciro bifashwa bagakomeza guhabwa ubufasha burimo no kubakodeshereza.

Rubingisa akomza agira ati: “Dufite gahunda yo kubaka amazu 392 akajyamo abantu bagomba gufashwa bo mu kiciro cya mbere cy’ubudehe kandi muri Kamena 2020 azaba yuzuye. Ikindi ubu dukomeza kubakodeshereza tukanabashakira ikibatunga no kureba niba abana babo biga neza.

Visi Meya w’Umujyi wa Kigali ushinzwe ibikorwa remezo n’imiturire Nsabimana Erneste, avuga ko uko imvura igwa ari ko ubutaka bugenda buhaga amazi, bityo na yo akagenda azamuka ari yo mpamvu hakwiye ingamba zihagije zo guhangana n’imvura itegerejwe.

Nsabimana atangaza ko kubera imiturire ya hamwe na hamwe mu mujyi wa Kigali, uko imvura nyinshi igwa ari ko ihungabanya ubutaka n’inzu zibwubatseho mu bice byinshi cyane cyane abatuye ahegereye za ruhurura, ku mikingo no mu bishanga kandi ibyo ngo bigaragara henshi muri uwo mugi.

Avuga ko Gikondo, Carwash, One Love ahazwi nko kwa Rasta, mu myembe, Kangondo, Rwampara, Gatsata na Mpazi ari hamwe mu hantu h’ibishanga hahurira amazi menshi ashobora guteza ibyago byinshi ku bahegereye kuko amazi y’imvura agenda azamuka asatira abaturage. Nsabimana aboneraho gusaba abantu kureba uburyo bunoze bwo gufata amazi cyangwa kwiga aho bazayerekeza mbere y’uko bubaka amazu.

Umuyobozi w’Ikigo k’Igihugu cy’ubumenyi bw’ikirere Gahigi Aimable, avuga ko mu mpera za Gashyantare batangaje ishusho y’uko igihembwe k’itumba 2020 kizaba kifashe ndetse biyemeza kujya batangaza amakuru agezweho ya buri kwezi.

Gahigi avuga ko ishusho y’ukwezi kwa Werurwe kugera muri Gicurasi 2020, mu gihugu imvura iteganyijwe itangana hose kuko Intara y’Amajyepfo, Amajyaruguru, Umujyi wa Kigali n’Akarere ka Bugesera hateganyijwe imvura ingana na mirimetero 400-500. Yongeraho ko igice cy’Uburengerazuba, Nyaruguru na Nyamagabe ari ho hazagwa imvura nyinshi ugereranyije n’ahandi mu gihugu ku gipimo kiri hajuru ya mirimetero 500.

Gahigi avuga ko ahenshi mu gihugu imvura y’itumba yatangiye ariko igice kinini k’igihugu imvura ikazacika mu kwezi kwa Gicurasi 2020. Gahigi kandi avuga ko muri iri tumba hateganywa ingaruka zitari nziza kubera ko urugaryi rwavuye mu Kuboza, Mutarama na Gashyantare haguye imvura nyinshi ibishanga bikareka kandi ikaba igikomeje mu bihe bigiye kuza.

Agira ati: “By’umwihariko muri uku kwezi kwa Werurwe 2020, Umujyi wa Kigali, Gicumbi, Kayonza, Rwamagana, Gatsibo, Nyagatare no ku gace kegereye ishyamba ni ho harimo imvura nyinshi kurusha ahandi mu gihugu”.

Umuyobozi w’Ikigo k’igihugu k’Ibidukikije Eng. Ruhamya Collette na we atangaza ko nta we ukwiye kubaka mu bishanga nk’uko itegeko ribiteganya kuko agomba gukoresha byibuze metero 20 uvuye ku gishanga. Asobanura ko iyo ahubatse iyo ibiza bije byangirika gusa hashobora guterwa ubusitani n’ibindi bitateza ibihombo igihe bibaye.

Minisitiri w’Ubutegetsi bw’Igihugu Prof. Shyaka Anastase avuga ko Guverinoma y’u Rwanda iri gukora ibishoboka byose kugira ngo ikomeze kurinda Abanyarwanda n’ibyabo. Avuga ko ibikorwa by’abantu bihabwa ingurane igihe bishatse kuvanwaho ngo hashyirwe ibikorwa rusange cyangwa bifite inyungu rusange.

Prof. Shyaka Anastase, Minisitiri w’ubutegetsi bw’igihugu asobanura ko nta ngurane ikwiye uwimuwe ahadafite inyungu rusange z’abaturage (Foto Sezibera)

Yagize ati: “Igihe Leta hagiye kunyuzwa umuhanda, hagiye gushyirwa ibitaro, kunyuzwa umuhanda, ishuri, icyo gihe umuturage wari uhari agomba guhabwa ingurane ku bo ihimuye bahafite ibikorwa. Nta bwo  aba bantu tuvana muri Gikondo, Cadillac, n’ahandi tudafite ikindi twenda kuhakorera muri ibyo bikorwa rusange bifite inyungu, ni mu rwego rw’ubutabazi no kurinda uyu mugi kugira ngo amazi abone inzira mbese nta ngurane”.

 

Prof. Shyaka avuga ko nka Leta icyo bashyize imbere ari ubutabazi bwo kuvana abantu ahashobora gushyira ubuzima bwabo mu kaga. Asaba abakiri mu manegeka kuyavamo badategereje guciririkanya bashaka ingurane kuko nta kiguranwa amagara.

Umujyi wa Kigali uri kuri Km2 730 ubwo hakorwaga ibarura ry’abantu bari mu gishanga mu buryo bwo guturamo ndetse n’abandi bafite ibikorwa bakoreramo mu kwezi k’Ukuboza 2019, imiryango igera ku 5600 mu turere 3 tugize Umujyi wa Kigali babashijwe kwimurwa. Usibye abari batuye muri ibyo bishanga, n’abakoreramo indi mirimo ubuyobozi bwiyemeje ko uku kwezi kwa Werurwe 2020 kurangira abari mu bishanga bamaze kuvamo.

Ibiganiro byitabiriwe n’abahagarariye inzego zinyuranye mu gushakira hamwe umuti wo guhangana n’ibiza by’amazi y’imvura(Foto Sezibera)

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.