23°C , Mostly cloudy | Kigali-Rwanda

Kigali: Ikibazo cy’umubyigano w’imodoka kizakemuka mu mezi ane

Yanditswe na KAYITARE JEAN PAUL

Ku ya 17-04-2018 saa 07:24:54

Abakoresha umuhanda Rwandex ugana mu mugi ndetse no mu bice bya Gatenga werekeza Kicukiro Centre bagaragaza ko kugera ku kazi birimo kubagora muri iyi minsi harimo gukorwa umuhanda Prince House- Rwandex- Kanogo- mu mugi. Ubuyobozi bw’Umujyi wa Kigali bukavuga ko iyo mihanda irimo kwagurwa ku buryo ikibazo cy’umubyigano w’imodoka kizaba cyakemutse mu mezi ane ari imbere.

Ejo hashize ku wa Mbere haramutse umubyigano w’imodoka ziva Kicukiro, Gatenga zigana mu mugi, n’iziva i Remera zigana mu mugi bituma abakoresha uyu muhanda bagera ku kazi bakerewe.

Umubyigano w’imodoka mu muhanda Kicukiro, Gatenga, mu mugi ntiworoheye abakoresha uyu muhanda (Foto James R.)

Uwimana Chantal ukorera muri MAGERWA avuga ko kuva i Remera kugera aho akorera yahakoresheje isaha irenga bitewe n’umubyigano w’imodoka, akavuga ko impamvu yawo ari ikorwa ry’umuhanda ririmbanyije.

Yagize ati “Birababaje kuba nakoreshaga iminota itagera kuri 30 kugira ngo ngere ku kazi ariko nkaba nakoresheje isaha irenga. Impamvu zabiteye ndabona ari ikorwa ry’umuhanda kuko nta kindi kibazo cyari cyabaye ariko turasaba ko ababishinzwe bakwihutisha ikorwa ryawo kugira ngo iki kibazo gikemuke natwe bidufashe kudakomeza gukererwa ku kazi.”

Imihanda yose hamwe irimo gukorwa mu Mujyi wa Kigali izarangirana n’ukwezi kwa Kamena uyu mwaka

Bimenyimana Elie we avuga ko yahisemo guparika imodoka ye agahitamo gutega moto kugira ngo abone uko agera ku kazi atarakererwa cyane kuko yari amaze kurenzaho iminota nka mirongo itanu y’ubukererwe. Na we asaba ko uyu muhanda wakorwa vuba, cyane ko babangamiwe n’ubunyereri bahura na bwo iyo bageze Rwandex.

Umuyobozi ushinzwe ibikorwaremezo mu mujyi wa Kigali, Eng. Rwunguko Jean d’Amour, avuga ko ikorwa ry’umuhanda Prince House- Sonatube- Rwandex- Kanogo -mu mugi uzaba warangiye mu kwezi kwa Kanama 2018.

Ati “Mu kwa Gatandatu ni bwo umuhanda uzaba urangiye neza ariko hari imihanda imwe bafunga kugira ngo bongereho akantu ko hejuru. Navuga ko mu kwezi kwa Kanama ikibazo cy’umubyigano w’imodoka kizaba cyakemutse”.

Eng. Rwunguko yari yatangarije Imvaho Nshya muri Werurwe 2018 ko imihanda iri ku burebure bw’ibilometero 105 irimo kubakwa hirya no hino mu mujyi wa Kigali, umwaka w’ingengo y’imari utaha wa 2018/2019 izaba yarangiye kubakwa.

Hari imishinga minini mu mujyi wa Kigali nko kwagura imihanda itari iyo mu makaritsiye, imihanda minini ihuza Kigali n’izindi Ntara ndetse ikanahuza n’ibindi bihugu, nk’umushinga wa kilometero 54 urimo imihanda iva mu mugi igera mu Gatsata inyuze Nyabugogo, uva mu Kanogo- Rwandex- Prince House n’umuhanda wo ku Irebero unyura i Gikondo-Miduha na Nyamirambo.

TANGA IGITEKEREZO

Leave a Reply

Your email address will not be published. Required fields are marked *